20 ഓവറും ബാറ്റ് ചെയ്താൽ ഡബിൾ സെഞ്ചറി ഉറപ്പ്! കെവിൻ പീറ്റേഴ്സന്റെ അഭിമുഖത്തിൽ തന്റേടത്തോടെ ആഗ്രഹം തുറന്നുപറഞ്ഞ് ഇന്ത്യൻ യുവ സെൻസേഷൻ
ന്യൂഡൽഹി: ട്വന്റി20 ക്രിക്കറ്റിൽ ഇരട്ട സെഞ്ചറി നേടുന്ന ആദ്യ താരമാകണമെന്ന വലിയ സ്വപ്നവുമായി ഇന്ത്യൻ യുവതാരം വൈഭവ് സൂര്യവംശി. മുൻ ഇംഗ്ലണ്ട് നായകൻ കെവിൻ പീറ്റേഴ്സന്റെ യൂട്യൂബ് ചാനലിൽ നൽകിയ അഭിമുഖത്തിലാണ് വൈഭവ് തന്റെ ആഗ്രഹങ്ങൾ തുറന്നുപറഞ്ഞത്.
ട്വന്റി20യിൽ അർധസെഞ്ചറിയും സെഞ്ചറിയും നേടുന്നത് സാധാരണ കാര്യമായിരിക്കാമെങ്കിലും തന്റെ ലക്ഷ്യം അതിലും വലിയതാണെന്നാണ് വൈഭവിന്റെ വാക്കുകൾ.
“എനിക്ക് ട്വന്റി20യിൽ 200 റൺസ് നേടണം. ക്രിസ് ഗെയിലിന്റെ റെക്കോർഡ് തകർക്കണം,” എന്നാണ് വൈഭവ് പറഞ്ഞത്.
2013 ഐപിഎല്ലിൽ പൂനെ വാരിയേഴ്സിനെതിരെ ആർസിബിക്കായി കളിക്കുമ്പോഴാണ് ക്രിസ് ഗെയിൽ 175 റൺസ് നേടിയത്. ട്വന്റി20 ചരിത്രത്തിലെ ഉയർന്ന വ്യക്തിഗത സ്കോറായ ആ റെക്കോർഡ് ഇതുവരെ ആരും മറികടന്നിട്ടില്ല.
20 ഓവറും ബാറ്റ് ചെയ്യാൻ അവസരം ലഭിച്ചാൽ ആ റെക്കോർഡ് തകർക്കാൻ കഴിയുമെന്നാണ് വൈഭവിന്റെ ആത്മവിശ്വാസം.
സമ്മർദമില്ലാതെ ആക്രമണ ബാറ്റിംഗ്
സെഞ്ചറിക്ക് അടുത്തെത്തുമ്പോൾ സമ്മർദമുണ്ടാകാറില്ലെന്നും സ്വാഭാവികമായ ആക്രമണ ബാറ്റിംഗ് തുടരാറാണ് പതിവെന്നും വൈഭവ് വ്യക്തമാക്കി.
അണ്ടർ-19 ലോകകപ്പ് ഫൈനലിൽ 175 റൺസ് നേടിയ വൈഭവ് ലോകകപ്പ് ഫൈനലിലെ ഏറ്റവും ഉയർന്ന വ്യക്തിഗത സ്കോറിന്റെ റെക്കോർഡും സ്വന്തമാക്കിയിരുന്നു.
2025-26 വിജയ് ഹസാരെ ട്രോഫിയിൽ ബിഹാറിനായി 190 റൺസ് നേടിയതും ശ്രദ്ധേയ നേട്ടമായി. ഔദ്യോഗിക റെക്കോർഡിൽ ഉൾപ്പെടാത്ത ഒരു ആഭ്യന്തര മത്സരത്തിൽ പുറത്താകാതെ 335 റൺസും താരം നേടിയിട്ടുണ്ടെന്ന് അഭിമുഖത്തിൽ വെളിപ്പെടുത്തി.
ഐപിഎല്ലിൽ മിന്നും പ്രകടനം
ഈ സീസണിൽ 14 മത്സരങ്ങളിൽ നിന്ന് 583 റൺസാണ് വൈഭവ് നേടിയത്. ഒരു സെഞ്ചറിയും മൂന്ന് അർധസെഞ്ചറികളും താരം സ്വന്തമാക്കി.
103 ആണ് ഉയർന്ന സ്കോർ. 232.27 എന്ന അതിവേഗ സ്ട്രൈക്ക് റേറ്റോടെയാണ് താരം സീസൺ പൂർത്തിയാക്കിയത്.
50 ഫോറുകളും 53 സിക്സറുകളും നേടിയ വൈഭവാണ് ഈ സീസണിൽ ഏറ്റവും കൂടുതൽ സിക്സറുകൾ നേടിയ താരവും.
English Summary
Young Indian batter Vaibhav Suryavanshi has revealed his dream of becoming the first player to score a double century in T20 cricket. Speaking to Kevin Pietersen, the youngster said he wants to break Chris Gayle’s record of 175 runs in a T20 innings.
