പൊള്ളാച്ചി ; സർക്കാർ ആശുപത്രിയിൽ ശുചിമുറിയിൽ ഒളിക്യാമറ വെച്ച് ദൃശ്യങ്ങൾ പകർത്തിയ ട്രെയിനി ഡോക്ടർ അറസ്റ്റിൽ. കൃഷ്ണഗിരി ജില്ലയിലെ ഊത്തങ്കര സ്വദേശി വെങ്കിടേഷാണ് (32) പോലീസിൻ്റെ പിടിയിലായത്. വനിതാ ഡോക്ടർമാരും നേഴ്സുമാരും ഉപയോഗിക്കുന്ന ശുചിമുറിയിലാണ് ക്യാമറ സ്ഥാപിച്ചത് .
ഒട്ടേറെ വനിതാ ഡോക്ടർമാരും നേഴ്സുമാരും ട്രെയ്നി ഡോക്ടർമാരും ഉള്ള ആശുപത്രിയാണ് ഇത്. രണ്ടുദിവസം മുൻപു ശുചിമുറിയിൽ പോയ സ്റ്റാഫ്നേഴ്സാണ് പേനയുടെ ആകൃതിയിലുള്ള ക്യാമറ കണ്ടത്.
ആശുപത്രി സൂപ്രണ്ടിനെ വിവരം അറിയിച്ചതോടെ ക്യാമറ വെച്ചത് ആരാണെന്ന് കണ്ടെത്താൻ സിസിടിവി ക്യാമറ പരിശോധിച്ചപ്പോഴാണു പിന്നിൽ ഡോക്ടറാണെന്നു വ്യക്തമായത്. തുടർന്ന് പൊലീസിൽ പരാതി നൽകുകയായിരുന്നു.
നവംബർ 16 മുതൽ ശുചിമുറിയിൽ ക്യാമറ സ്ഥാപിച്ച് ദൃശ്യങ്ങൾ പകർത്തിയതായി ചോദ്യം ചെയ്യലിൽ വ്യക്തമായി. ഇയാളുടെ ഫോൺ പരിശോധിച്ചപ്പോൾ ഓൺലൈനിൽ ക്യാമറ വാങ്ങിയതിൻ്റെ രേഖകൾ കണ്ടെത്തി.
കോയമ്പത്തൂർ മെഡിക്കൽ കോളജിൽ എംഎസ് ഓർത്തോ വിഭാഗം മൂന്നാംവർഷ വിദ്യാർത്ഥിയും പൊള്ളാച്ചിയിലെ സർക്കാർ ആശുപത്രി ട്രെയ്നി ഡോക്ടറുമാണ് പിടിയിലായ വെങ്കിടേഷ്.
