കൊച്ചി: റെയിഡിനെ തുടർന്ന് നടൻ സൗബിൻ ഷാഹിറിനെ ചോദ്യം ചെയ്യാനൊരുങ്ങി ആദായ നികുതി വകുപ്പ്. കഴിഞ്ഞ ദിവസം വീട്ടിലെയും ഓഫീസുകളിലെയും പരിശോധനയിൽ രേഖകൾ പിടിച്ചെടുത്തിരുന്നു. ഇത് വിശദമായി പരിശോധിച്ച ശേഷം നോട്ടീസ് നൽകാനാണ് തീരുമാനം.(Actor Soubin Shahir will be questioned by Income Tax Department)
സൗബിന്റെ പറവ ഫിലിംസ് കമ്പനിയുടെ ഓഫീസ്, ഡ്രീം ബിഗ് ഡിസ്ട്രിബ്യൂട്ടേഴ്സ് ഓഫീസ് അടക്കമുള്ള സ്ഥലങ്ങളിലാണ് ഇന്നലെ ഐടി റെയ്ഡ് നടത്തിയത്. അര്‍ധരാത്രിയോടെയാണ് റെയ്ഡ് അവസാനിച്ചത്. പറവ ഫിലിംസ് കമ്പനി നടത്തിയ സാമ്പത്തിക ഇടപാടുകൾ, നികുതി വെട്ടിപ്പ് സംബന്ധിച്ച പരാതികൾ തുടങ്ങിയവയിലാണ് പരിശോധന നടത്തിയത്.
സൗബിന്റെ മൊഴി ആദായ വകുപ്പ് രേഖപ്പെടുത്തിയിട്ടുണ്ട്. മഞ്ഞുമ്മൽ സിനിമയുടെ നിർമാണത്തിന്‍റെ മറവിൽ നടന്ന കള്ളപ്പണ ഇടപാടുകൾ സംബന്ധിച്ച് എൻഫോഴ്സ്മെന്‍റ് ഡയറക്ടറേറ്റും അന്വേഷണം നടത്തുന്നുണ്ട്.
