കൊച്ചി: ട്രാഫിക് എസിപിയുടെ വാഹനമിടിച്ച് ഗുരുതരമായി പരിക്കേറ്റ് ചികിത്സയിലായിരുന്ന വയോധികൻ മരിച്ചു. പുത്തന്വേലിക്കര സ്വദേശി ഫ്രാന്സിസ് (78) ആണ് മരിച്ചത്. ഈ മാസം ആദ്യം പുത്തന്വേലിക്കരയില് വച്ചാണ് അപകടം നടന്നത്.(Traffic ACP’s vehicle hit; old age man under treatment died)
എസിപി എ എ അഷ്റഫ് ഓടിച്ച ജീപ്പ് ഫ്രാന്സിസിനെ ഇടിച്ചുതെറിപ്പിക്കുകയായിരുന്നു. അപകടത്തെ തുടർന്ന് പൊലീസ് ജീപ്പില് തന്നെയാണ് ഫ്രാന്സിസിനെ ആശുപത്രിയില് എത്തിച്ചത്. തലയ്ക്ക് ഗുരുതരമായി പരിക്കേറ്റ് ചികിത്സയിലായിരുന്ന ഫ്രാന്സിസ് ഇന്ന് രാവിലെ തൃശൂരിലെ ആശുപത്രിയിൽ വെച്ചാണ് മരിച്ചത്.
അപകടദിവസം നല്ല മഴയായിരുന്നു. പള്ളിയില് നിന്ന് തൊട്ടുമുന്പിലുള്ള വീട്ടിലേക്ക് കടക്കുന്നതിനിടെയാണ് ഫ്രാന്സിസിനെ വാഹനമിടിച്ചത്. എസിപി ഓടിച്ച വാഹനം അമിത വേഗതയിലായിരുന്നുവെന്ന് പൊലീസിന്റെ പ്രാഥമിക അന്വേഷണത്തില് കണ്ടെത്തിയിരുന്നു.
