മട്ടാഞ്ചേരി: ക്രിക്കറ്റ് കളിക്കിടെ കായലിൽ വീണ് കാണാതായ കപ്പൽ ജീവനക്കാരന്റെ മൃതദേഹം കണ്ടെത്തി. ജിയോളജിക്കൽ സർവേ ഓഫ് ഇന്ത്യയുടെ ആർ.വി. സമുദ്ര സൗദി കാമ ഷിപ്പിലെ സീമാൻ ഉത്തർപ്രദേശ് സ്വദേശി സക്കീർ ഹുസൈന്റെ മകൻ ഫഹദ് റമീസ് (25) ആണ് മരിച്ചത്. വില്ലിങ്ടൻ ഐലൻഡിലെ തുറമുഖ ബെർത്തിൽ സഹപ്രവർത്തകരോടൊപ്പം കളിക്കുന്നതിനിടെയാണ് ദാരുണ സംഭവം നടന്നത്.(Body of the missing ship crew has been found in Kochi)

തിങ്കളാഴ്ച വൈകീട്ട് ആറോടെയായിരുന്നു അപകടമുണ്ടായത്. ക്രിക്കറ്റ് കളിച്ചുകൊണ്ടിരിക്കേ ബോൾ പിടിക്കാൻ ശ്രമിക്കവേ കാൽവഴുതി കായലിലേക്ക് വീഴുകയായിരുന്നു. ഫഹദിന് നീന്തൽ അറിയാമായിരുന്നുവെങ്കിലും ബോയിലർ സ്യൂട്ടും ഗൺ ബൂട്ടും അണിഞ്ഞിരുന്നതിനാൽ മുങ്ങി പോകുകയായിരുന്നു. ഒൻപതാം തീയതി കൊച്ചിയിലെത്തിയ കപ്പൽ തിങ്കളാഴ്ച മടങ്ങാനിരിക്കേയാണ് അപകടം നടന്നത്. സംഭവത്തിൽ കപ്പൽ ക്യാപ്റ്റന്റെ പരാതിയിൽ ഹാർബർ പോലീസ് കേസെടുത്തിട്ടുണ്ട്.

ചൊവ്വാഴ്ച പുലർച്ചെ അഞ്ചരയോടെ കണ്ടെത്തിയ മൃതദേഹം നേവി കരയ്ക്കെത്തിച്ചു. തുടർന്ന് ഹാർബർ പോലീസ് മേൽ നടപടികൾക്കുശേഷം മൃതദേഹം എറണാകുളം ജനറൽ ആശുപത്രിയിലേക്ക് മാറ്റി. ബന്ധുക്കൾ വന്നതിനുശേഷം പോസ്റ്റ്‌മോർട്ടം നടക്കും.