ദേ പിന്നേം നീലക്കുറിഞ്ഞി! ഇത്തവണ വിരിഞ്ഞത് കള്ളിപ്പാറയിൽ അല്ല, ചതുരംഗപ്പാറയിൽ

നെടുങ്കണ്ടം: ഇടുക്കിയിലെ പ്രധാന സഞ്ചാര കേന്ദ്രമാണ് ചതുരംഗപ്പാറ. കുമളി – മൂന്നാർ സംസ്ഥാനപാതയിൽ ഉടുമ്പൻചോലയ്ക്കു സമീപമാണ് ചതുരംഗപ്പാറ. ആയിരക്കണക്കിന്‌ അടി ഉയരത്തില്‍ നില്‍ക്കുന്ന ചതുരംഗപ്പാറ മലയുടെ ഒത്ത നെറുകയിലാണ്‌ ഇപ്പോള്‍ നീലക്കുറിഞ്ഞികള്‍ പൂവിട്ടിരിക്കുന്നത്‌

കള്ളിപ്പാറ മലനിരകളിൽ നിന്നാൽ തൊട്ടടുത്തായി ചതുരംഗപ്പാറയിലെ കാറ്റാടി പാടം കാണാം. ശാന്തൻപാറയിൽ നിന്ന് ഏഴ് കിലോമീറ്റർ അകലെ ഉടുമ്പൻചോല, ശാന്തൻപാറ പഞ്ചായത്തുകളുടെ അതിർത്തിയിലുള്ള ഇൗ ദൃശ്യവിസ്മയം. മലമുകളിൽ കയറിയാൽ ചുറ്റിലും നിറയുന്ന ദൂരക്കാഴ്ചയാണു പ്രധാനം.

തമിഴ്നാട്ടിലെ കോംബേ, തേവാരം, കൊരങ്ങിണി വനമേഖല, കമ്പം എന്നീ സ്ഥലങ്ങളുടെ വിദൂരമെങ്കിലും വ്യക്തമായ കാഴ്ചകൾക്കൊപ്പം സദാസമയവും വീശിയെത്തുന്ന കാറ്റും ചതുരംഗപ്പാറമെട്ടിന്റെ പ്രത്യേകതയാണ്. രാമക്കൽമേടിനെ അനുസ്മരിപ്പിക്കുന്നതാണ് ചതുരംഗപ്പാറ യിലെ കാഴ്ചകൾ.

കുറിഞ്ഞിപ്പൂക്കള്‍ മാത്രമല്ല മനോഹരമായ കാഴ്‌ചകളുടെ മലമേട്‌ കൂടിയാണ്‌ ചതുരംഗപ്പാറ.
രണ്ടു വര്‍ഷങ്ങള്‍ക്ക്‌ മുമ്പ്‌ ഈ മലനിരകള്‍ക്ക്‌ എതിര്‍വശത്തുള്ള കള്ളിപ്പാറ മലനിരയില്‍ വ്യാപകമായി കുറിഞ്ഞി പൂത്തിരുന്നു.

ഇതോടെ ഇവിടേക്ക്‌ സഞ്ചാരികളുടെ ഒഴുക്കായിരുന്നു. ഏറ്റവും കൂടുതല്‍ നീലക്കുറിഞ്ഞികള്‍ പൂവിട്ടത്‌ ഈ മലനിരകളിലായിരുന്നു. അന്ന്‌ രണ്ടു ലക്ഷത്തിലധികം ആളുകളാണ്‌ മലകയറി കുറഞ്ഞി വസന്തം ആസ്വദിക്കാന്‍ എത്തിയത്‌.

ആയിരക്കണക്കിന്‌ അടി ഉയരത്തില്‍ നില്‍ക്കുന്ന മലയുടെ ഒത്ത നെറുകയിലാണ്‌ ഇപ്പോള്‍ നീലക്കുറിഞ്ഞികള്‍ പൂവിട്ടിരിക്കുന്നത്‌.

പ്രകൃതി മനോഹാരിതയുടെ നടുവില്‍ വീണ്ടും കുറഞ്ഞി വസന്തം വിരുന്നെത്തിയത്‌ വലിയ പ്രതീക്ഷയാണ്‌ വിനോദസഞ്ചാര മേഖലയ്‌ക്ക് പകര്‍ന്നു നല്‍കുന്നത്‌.

നീലക്കുറിഞ്ഞികള്‍ മാത്രമല്ല മഞ്ഞുമൂടുന്ന മലനിരകളും തമിഴ്‌നാടിന്റെ വിദൂര ദൃശ്യവും എല്ലാം ചതുരംഗപ്പാറയില്‍ നിന്നുള്ള മനോഹര കാഴ്‌ചകളാണ്‌.

Not only the blue Kurinjis, the snow-capped mountains, and the distant view of Tamil Nadu are beautiful sights from Chaturangapara.