ആധുനിക ലോകത്ത് നാം ഉപയോഗിക്കുന്ന ഒന്നിനും ഗ്യാരണ്ടിയില്ല. ഏതൊക്കെ എന്തിലൊക്കെയാണ് ഉപയോഗിച്ചിരിക്കുന്നത് എന്ന് സാധാരണക്കാർക്ക് അറിയാൻ പ്രത്യേക മാർഗവുമില്ല. നാം ഉപയോഗിക്കുന്ന പല വസ്തുക്കളിലും അനാരോഗ്യകരമായ പല വസ്തുക്കളും ഉണ്ടെന്ന് അറിവുള്ളതാണ്. അത്തരത്തിലൊരു റിപ്പോർട്ടാണ് ഇപ്പോൾ പുറത്തു വന്നിരിക്കുന്നത്. (Continuous use of this famous company’s mouthwash can cause cancer study)
എപ്പോഴെങ്കിലുമൊക്കെ മൗത്ത് വാഷുകൾ ഉപയോഗിക്കുന്നവരാണ് നാമെല്ലാവരും. അതിനാൽ തന്നെ ഈ കണ്ടെത്തൽ ആശങ്ക ഉണർത്തുന്നതാണ്. പ്രമുഖ കമ്പനിയുടെ മൗത്ത് വാഷ് ഉപയോഗം ക്യാൻസറിലേക്ക് നയിക്കും എന്നാണ് പുതിയ പഠന റിപ്പോർട്ടുകൾ പുറത്തുവരുന്നത്. ബൽജിയത്തിലെ ഇൻസ്റ്റിറ്റ്യൂട്ട് ഒഫ് ട്രോപ്പിക്കൽ മെഡിസിൻ ഇൻ ആൻവേർപ്പിൽ നടന്ന പഠനത്തിലാണ് ഞെട്ടിക്കുന്ന വെളിപ്പെടുത്തൽ.
ലിസ്റ്ററിൻ എന്ന ബ്രാൻഡ് മൗത്ത് വാഷാണ് അപകടം ഉണ്ടാക്കുമെന്ന് കണ്ടെത്തിയിരിക്കുന്നത്. ഫ്യൂസോ ബാക്ടീരിയം ന്യൂക്ളിയേറ്റം, സ്ട്രെപ്ടോകോക്കസ് ആഞ്ചിനോസസ് എന്നീ ബാക്ടീരിയകളാണ് കാൻസറിന് കാരണമാകുന്നത്. ലിസ്റ്ററിൻ മൗത്ത് വാഷിലെ ആൽക്കഹോളിന്റെ ആധിക്യം ഈ ബാക്ടീരിയകളെ സൃഷ്ടിക്കുന്നുവെന്നാണ് പഠനത്തിൽ പറയുന്നത്.
സ്ഥിരമായി ഇത് ഉപയോഗിക്കുന്നവർ വളരെയധികം ശ്രദ്ധിക്കണമെന്നാണ് മുന്നറിയിപ്പ്. മൗത്ത് വാഷ് കൂടിയേ തീരൂ എന്ന് നിർബന്ധമുള്ളവർ ആൽക്കഹോൾ കണ്ടന്റ് കുറഞ്ഞത് തിരഞ്ഞെടുക്കണം എന്നും പഠനം വ്യക്തമാക്കുന്നു.
യൂണിവേഴ്സിറ്റിയിലെ പ്രൊഫസറായ ക്രിസ് കന്യോണിന്റെ നേതൃത്വത്തിലാണ് പഠനം നടന്നത്. മറ്റുചില രോഗങ്ങളും ഇതേ മൗത്ത് വാഷ് കാരണം ഉണ്ടാകാൻ സാദ്ധ്യതയുണ്ടെന്നാണ് ക്രിസ് കന്യോൺ പറയുന്നത്.
നേരത്തെ നടത്തിയ പല പഠനങ്ങളിലും മൗത്ത് വാഷുകൾ കാൻസറിന് കാരണമാകുന്നുവെന്ന് നിഗമനത്തിലെത്തിയിരുന്നു. സ്ഥിരമായി ഉപയോഗിക്കുന്നവരിൽ തല, കഴുത്ത് തുടങ്ങിയ ഭാഗങ്ങളിലാണ് കാൻസർ ബാധിക്കുന്നതായി കണ്ടെത്തിയത്.
59 പേരിലാണ് പരീക്ഷണം നടത്തിയത്. മൂന്ന് മാസത്തേക്ക് ദിവസേനെ ലിസ്റ്ററിൻ ഇവരിൽ ഉപയോഗിക്കപ്പെട്ടു. തുടർന്നാണ് ബാക്ടീരിയകളുടെ സാന്നിദ്ധ്യം കണ്ടെത്തിയത്.
