ചിക്കാഗോ: അമേരിക്കയിലെ ഇന്ത്യൻ വംശജനായ വിദ്യാർത്ഥിയെ ആക്രമിച്ച് കവർച്ച. ആയുധധാരിയായ സംഘം വിദ്യാർത്ഥിയെ ആക്രമിച്ചതിന് ശേഷം ഫോൺ മോഷ്ടിക്കുകയായിരുന്നു. ഹൈദരാബാദ് സ്വദേശിയായ സയ്യിദ് മസാഹിർ അലിയാണ് ആക്രമണത്തിന് ഇരയായത്. ചിക്കാഗോയിലെ ഇന്ത്യാന വെസ്‌ലിയൻ സർവകലാശാലയിൽ ബിരുദാനന്തര ബിരുദ വിദ്യാർത്ഥിയാണ് അലി.
ആക്രമണം സംബന്ധിച്ച് അലിയുടെ ഒരു വീഡിയോയും പുറത്തുവന്നിട്ടുണ്ട്. വീഡിയോയിൽ വീട്ടിലേക്ക് പോകുമ്പോൾ നാല് പേർ തന്നെ ആക്രമിച്ചതായി അലി പറയുന്നത് കേൾക്കാം. ഞാൻ ഭക്ഷണവും വാങ്ങി വീട്ടിലേക്ക് വരുമ്പോൾ നാല് പേർ എന്നെ വളയുകയും ചവിട്ടുകയും മർദിക്കുകയും എൻ്റെ ഫോൺ പിടിച്ചു വാങ്ങി രക്ഷപ്പെടുകയും ചെയ്തു എന്ന് അലി പറയുന്നു. ഇക്കാര്യത്തിൽ ദയവായി ആരെങ്കിലും എന്നെ സഹായിക്കണമെന്നും അലി വിഡിയോയിൽ അഭ്യർത്ഥിക്കുന്നുണ്ട്.
ഭാര്യയും പ്രായപൂർത്തിയാകാത്ത മൂന്ന് കുട്ടികളും ഉൾപ്പെടുന്നതാണ് അലിയുടെ കുടുംബം. ആക്രമണത്തിൻ്റെ പശ്ചാത്തലത്തിൽ യുഎസിലേക്ക് പോകാനുള്ള സഹായം അഭ്യർത്ഥിച്ച് അലിയുടെ ഭാര്യ വിദേശകാര്യ മന്ത്രി എസ് ജയശങ്കറിനെ സമീപിച്ചിരിക്കുകയാണ്. ചിക്കാഗോയിലെ ഇന്ത്യൻ കോൺസുലേറ്റ് ചൊവ്വാഴ്ച അലിയുമായും ഭാര്യയുമായും ബന്ധപ്പെട്ടിട്ടുണ്ടെന്നും വിഷയത്തിൽ സാധ്യമായ എല്ലാ സഹായവും അവർക്ക് ഉറപ്പുനൽകിയിട്ടുണ്ടെന്നും ഇന്ത്യൻ കോൺസുലേറ്റ് എക്‌സിലൂടെ വ്യക്തമാക്കിയിരുന്നു.
Read Also:കണ്ണൂർ പഴയങ്ങാടിയിൽ നിയന്ത്രണം വിട്ട ഗ്യാസ് ടാങ്കർ മറിഞ്ഞു വൻ അപകടം; 8 പേർക്ക് പരിക്ക്
