നിതീഷ് കുമാർ രാജിവച്ചു; ബിഹാറിൽ പുതിയ അധ്യായം, സാമ്രാട് ചൗധരി മുഖ്യമന്ത്രി
പട്ന: ബിഹാറിൽ ദീർഘകാലം നീണ്ട ഭരണത്തിന് വിരാമമിട്ട് നിതീഷ് കുമാർ മുഖ്യമന്ത്രി സ്ഥാനത്ത് നിന്ന് രാജിവച്ചു.
രാജ്യസഭാംഗമായി തെരഞ്ഞെടുക്കപ്പെട്ടതിനെ തുടർന്ന് ഗവർണറെ കണ്ടാണ് അദ്ദേഹം രാജി സമർപ്പിച്ചത്.
20 വർഷം മുഖ്യമന്ത്രിയായി പ്രവർത്തിക്കാനായതിൽ നന്ദി രേഖപ്പെടുത്തിയ നിതീഷ് കുമാർ, താൻ ബിഹാർ വിടില്ലെന്നും സംസ്ഥാനത്തിന്റെ മാർഗദർശിയായി തുടരുമെന്നും വ്യക്തമാക്കി.
പുതിയ സർക്കാരിന് പിന്തുണ നൽകുമെന്നും അദ്ദേഹം കൂട്ടിച്ചേർത്തു.
നിതീഷ് കുമാറിന്റെ മകൻ നിശാന്ത് കുമാർ മന്ത്രിസഭയിൽ ഇടം നേടില്ലെന്നാണ് പാർട്ടി വൃത്തങ്ങൾ സൂചിപ്പിക്കുന്നത്.
പുതിയ മുഖ്യമന്ത്രി: സാമ്രാട് ചൗധരി
സാമ്രാട് ചൗധരിയാണ് ബിഹാറിന്റെ പുതിയ മുഖ്യമന്ത്രിയായി എത്തുന്നത്. നാളെ സത്യപ്രതിജ്ഞ ചെയ്ത് അദ്ദേഹം അധികാരമേൽക്കും.
57-കാരനായ സാമ്രാട് ചൗധരി ബി.ജെ.പി സംസ്ഥാന അധ്യക്ഷനായും ആഭ്യന്തര മന്ത്രിയായും പ്രവർത്തിച്ചിട്ടുണ്ട്.
മുൻപ് ആർ.ജെ.ഡി വഴി രാഷ്ട്രീയത്തിലേക്ക് എത്തിയ അദ്ദേഹം പിന്നീട് ബി.ജെ.പിയിൽ ചേർന്നു. ഒബിസി നേതാവെന്ന നിലയിൽ സംസ്ഥാനത്ത് ശക്തമായ സ്വാധീനമുള്ള നേതാവാണ്.
പുതിയ മന്ത്രിസഭയിൽ രണ്ട് ഉപമുഖ്യമന്ത്രിമാരും ഉണ്ടാകും. വിജേന്ദ്ര യാദവ്, വിജയ് ചൗധരി എന്നിവരാകും സ്ഥാനമേൽക്കുക എന്ന സൂചനയുണ്ട്.
നിതീഷ് കുമാറിന്റെ ദീർഘകാല ഭരണത്തിന് ശേഷം ബിഹാർ പുതിയ രാഷ്ട്രീയ ഘട്ടത്തിലേക്ക് കടക്കുകയാണ്. പുതിയ നേതൃത്വത്തിന്റെ പ്രവർത്തനം ഇനി സംസ്ഥാന രാഷ്ട്രീയത്തിലെ പ്രധാന ചര്ച്ചയാകും.
English Summary:
Nitish Kumar has stepped down as Bihar Chief Minister after serving the state for around two decades, marking the end of a significant political era. Following his resignation, Samrat Choudhary is set to take over as the new Chief Minister and is expected to be sworn in soon. While stepping down, Nitish Kumar stated that he would continue to remain active in Bihar’s political landscape and support the new government, signaling a transition in leadership while maintaining his influence in the state.
