മലയാളി മോഡൽ അലീനയും സംഘവും കുടുങ്ങിയത് എങ്ങനെ? യുവതികളുടെ ചിത്രങ്ങൾ അയച്ച് വാട്സ്ആപ്പിൽ വിലപേശൽ നടത്തിയെന്ന് കണ്ടെത്തൽ; ദുബായിലെ മനുഷ്യക്കടത്തിന്റെ ചുരുളഴിയുമ്പോൾ
കൊച്ചി: മോഡലിങ്, മേക്കപ്പ് ആർട്ടിസ്റ്റ് ജോലി എന്നിവ വാഗ്ദാനം ചെയ്ത് കേരളത്തിൽ നിന്നുള്ള യുവതികളെ ദുബായിലേക്ക് കൊണ്ടുപോയി ലൈംഗിക ചൂഷണത്തിന് ഇരയാക്കിയ കേസിൽ അന്വേഷണ സംഘം നിർണായക തെളിവുകൾ കണ്ടെത്തി. കേസിലെ മുഖ്യപ്രതിയായ സിന്ധു എന്ന സ്റ്റോയിസി യുവതികളുടെ ചിത്രങ്ങൾ പങ്കുവെച്ച് വാട്സ്ആപ്പ് വഴി വിലപേശൽ നടത്തിയിരുന്നതായാണ് അന്വേഷണത്തിലെ കണ്ടെത്തൽ.
മുംബൈയിൽ നിന്ന് അറസ്റ്റിലായ 56കാരിയായ സിന്ധുവിനെ കൊച്ചിയിലെത്തിച്ച് 14 ദിവസത്തേക്ക് റിമാൻഡ് ചെയ്തു.
യുവതികളെ വിദേശത്തേക്ക് കടത്തുകയും ലൈംഗിക ചൂഷണത്തിന് നിർബന്ധിതരാക്കുകയും ചെയ്ത ശൃംഖലയുടെ പ്രധാന കണ്ണിയാണ് സിന്ധുവെന്നാണ് അന്വേഷണ സംഘം കോടതിയിൽ സമർപ്പിച്ച റിമാൻഡ് റിപ്പോർട്ടിൽ പറയുന്നത്. കൊച്ചിയിലെ ചില ക്രിമിനൽ സംഘങ്ങളുമായും പ്രതിക്ക് ബന്ധമുണ്ടെന്നാണ് കണ്ടെത്തൽ.
ഫെബ്രുവരിയിൽ പരാതിക്കാരിയായ യുവതിയെ മകളുടെ പേരിലുള്ള ഇവന്റ് മാനേജ്മെന്റ് സ്ഥാപനത്തിൽ ജോലി നൽകാമെന്ന് പറഞ്ഞ് ദുബായിലേക്ക് കൊണ്ടുപോയതായാണ് കേസ്. ഇതിനായി 4.70 ലക്ഷം രൂപ വാങ്ങിയതായും റിപ്പോർട്ടിലുണ്ട്.
ദുബായിലെത്തിച്ച ശേഷം യുവതിയെ ബർദുബായിലെ ഒരു ഫ്ലാറ്റിൽ പാർപ്പിച്ച് തടങ്കലിൽ വെച്ചതായും അന്വേഷണ സംഘം വ്യക്തമാക്കി. പാനീയത്തിൽ ലഹരിവസ്തു കലർത്തി നൽകി മയക്കിയ ശേഷം യുവതിയെ പുരുഷന്മാർക്ക് കൈമാറിയെന്നാണ് കണ്ടെത്തൽ.
മറ്റ് പ്രതികളായ മഞ്ജിമ പി.യും അലീന എബ്രഹാമും പണം വാങ്ങി ആളുകളെ യുവതിയുടെ മുറിയിലേക്ക് പ്രവേശിപ്പിച്ചുവെന്നും റിപ്പോർട്ടിൽ പറയുന്നു. സംഭവങ്ങളുടെ ദൃശ്യങ്ങൾ സിന്ധു മൊബൈലിൽ പകർത്തി യുവതിയുടെ ഭർത്താവിനും ബന്ധുക്കൾക്കും അയച്ചതായും അന്വേഷണ സംഘം കണ്ടെത്തി.
ദുബായിലേക്ക് കൊണ്ടുപോയ മറ്റ് യുവതികളുടെ ചിത്രങ്ങൾ ഉപയോഗിച്ചും വാട്സ്ആപ്പിലൂടെ ഇടപാടുകൾ നടത്തിയതിന്റെ തെളിവുകൾ അന്വേഷണ സംഘം ശേഖരിച്ചിട്ടുണ്ട്. സിന്ധുവിന്റെ മൊബൈൽ ഫോൺ വിശദമായി പരിശോധിച്ചുവരികയാണ്.
ഇതിനിടെ മറ്റൊരു യുവതിയെയും സമാന രീതിയിൽ കുടുക്കി ലൈംഗിക ചൂഷണത്തിന് ഇരയാക്കിയതായി മൊഴി ലഭിച്ചിട്ടുണ്ട്. പരാതിക്കാരിയെ മർദിക്കുകയും ഭീഷണിപ്പെടുത്തുകയും ചെയ്തതായും അന്വേഷണം വ്യക്തമാക്കുന്നു.
പരാതി നൽകിയാൽ കൊല്ലുമെന്ന് ഭീഷണിപ്പെടുത്തിയതായും റിമാൻഡ് റിപ്പോർട്ടിൽ പറയുന്നു. സിന്ധുവും മറ്റ് പ്രതികളായ മഞ്ജിമയും അലീനയും തമ്മിലുള്ള വാട്സ്ആപ്പ് സന്ദേശങ്ങളും പണമിടപാട് രേഖകളും അന്വേഷണ സംഘം കണ്ടെത്തിയിട്ടുണ്ട്.
നിരവധി ക്രിമിനൽ കേസുകളിൽ പ്രതിയായ ഔറംഗസേബ് എന്നയാൾക്ക് സിന്ധു പണം കൈമാറിയതായും റിപ്പോർട്ടിൽ പരാമർശമുണ്ട്.
കേസിലെ മൂന്നും നാലും പ്രതികളായ മഞ്ജിമ പി., അലീന എബ്രഹാം എന്നിവർ നിലവിൽ ജുഡീഷ്യൽ കസ്റ്റഡിയിലാണ്. ദുബായിലുള്ള മറ്റ് പ്രതികളെ നാട്ടിലെത്തിക്കാനുള്ള നടപടികളും പുരോഗമിക്കുകയാണ്.
English Summary
Investigators probing a human trafficking and sexual exploitation case involving young women from Kerala found evidence that the main accused used WhatsApp to bargain by sharing victims’ photos. The accused, Sindhu alias Stoicy, has been remanded for 14 days.
