ഹൈദരാബാദിനെ നടുക്കി മുൻ ഐപിഎസ് ഉദ്യോഗസ്ഥന്റെ ഭാര്യയുടെ മരണം
ഹൈദരാബാദിലെ ജൂബിലി ഹിൽസിലുള്ള പ്രശാസൻ നഗറിൽ വിരമിച്ച ഐപിഎസ് ഉദ്യോഗസ്ഥന്റെ ഭാര്യ കൊല്ലപ്പെട്ട സംഭവം അതീവ ഗൗരവത്തോടെയാണ് പോലീസ് കാണുന്നത്
ആന്ധ്രപ്രദേശ് കേഡറിലെ 1986 ബാച്ച് ഐപിഎസ് ഉദ്യോഗസ്ഥനും മുൻ ജയിൽ ഡിജിപിയുമായിരുന്ന വിനയ് രഞ്ജൻ റേയുടെ ഭാര്യ തനുജ രഞ്ജനെ (62) ആണ് സ്വന്തം വസതിയിൽ അതിക്രൂരമായി കൊല്ലപ്പെട്ട നിലയിൽ കണ്ടെത്തിയത്.
ആസൂത്രിതമായ കവർച്ചാ ശ്രമത്തിനിടയിലാണ് ഈ കൊലപാതകം നടന്നതെന്നാണ് പ്രാഥമിക നിഗമനം. വീട്ടിലെ വിശ്വസ്തയായ ജോലിക്കാരി തന്നെ ഇതിന് പിന്നിൽ ചരടുവലിച്ചതായാണ് പോലീസ് സംശയിക്കുന്നത്.
വ്യക്തിപരമായ ആവശ്യങ്ങൾക്കായി വിനയ് രഞ്ജൻ റേ ബെംഗളൂരുവിലേക്ക് പോയ സമയത്താണ് അക്രമികൾ ഈ കൃത്യം നടത്തിയത്. വ്യാഴാഴ്ച രാത്രി തനുജ ഒന്നാം നിലയിലെ മുറിയിൽ ഉറങ്ങാൻ പോയതായിരുന്നു. മക്കൾ രണ്ടാമത്തെ നിലയിലുള്ള മുറികളിലായിരുന്നതിനാൽ അമ്മയുടെ നിലവിളിയോ മറ്റ് ശബ്ദങ്ങളോ അവരുടെ ശ്രദ്ധയിൽപ്പെട്ടില്ല.
വെള്ളിയാഴ്ച രാവിലെ മറ്റൊരു വീട്ടുജോലിക്കാരി എത്തിയപ്പോഴാണ് കൊലപാതക വിവരം പുറംലോകം അറിയുന്നത്. കൈകാലുകൾ ബന്ധിച്ച നിലയിൽ തറയിൽ കിടന്നിരുന്ന തനുജയുടെ വായിൽ രക്തം പുരണ്ട തുണി തിരുകിയിരുന്നു. ശ്വാസം മുട്ടിച്ചാകാം കൊലപാതകം നടത്തിയതെന്നാണ് പോലീസ് നിഗമനം.
വിനയ് രഞ്ജന്റെ അമ്മയെ പരിചരിക്കാനായി ജോലിക്ക് നിയോഗിച്ചിരുന്ന കൽപ്പന എന്ന നേപ്പാൾ സ്വദേശിനിയാണ് ഈ കേസിലെ പ്രധാന കണ്ണി.
വീട്ടിലെ സാഹചര്യങ്ങളും വിലപിടിപ്പുള്ള വസ്തുക്കൾ എവിടെയാണ് സൂക്ഷിച്ചിരിക്കുന്നതെന്നും കൃത്യമായി അറിയാവുന്ന കൽപ്പന, മോഷണ സംഘത്തിന് വീടിനുള്ളിലേക്ക് കടക്കാൻ സഹായം ചെയ്തുകൊടുത്തതായാണ് പോലീസ് കരുതുന്നത്.
കൊലപാതകത്തിന് ശേഷം കൽപ്പന ഒളിവിൽ പോയത് ഈ സംശയം ബലപ്പെടുത്തുന്നു. ആഭരണങ്ങളും മറ്റ് വിലപിടിപ്പുള്ള വസ്തുക്കളും വീട്ടിൽ നിന്ന് നഷ്ടപ്പെട്ടിട്ടുണ്ട്.
സിസിടിവി ദൃശ്യങ്ങൾ പരിശോധിച്ചതിൽ നിന്ന് കേസിലെ നിർണ്ണായക വിവരങ്ങൾ പോലീസിന് ലഭിച്ചു. പുലർച്ചെ ഒരു മണിയോടെ മൂന്ന് പേർ വീട്ടിലേക്ക് അതിക്രമിച്ചു കയറുന്നതും ഏകദേശം ഒന്നര മണിക്കൂറിന് ശേഷം ബാഗുകളുമായി പുറത്തേക്ക് പോകുന്നതും ദൃശ്യങ്ങളിൽ വ്യക്തമാണ്.
ജൂബിലി ഹിൽസിൽ നിന്നും ഓട്ടോറിക്ഷയിൽ നാമ്പള്ളി റെയിൽവേ സ്റ്റേഷനിലെത്തിയ സംഘം അവിടെനിന്ന് തെലങ്കാന എക്സ്പ്രസ്സിൽ നാഗ്പുർ ഭാഗത്തേക്ക് കടന്നതായാണ് സൈബർ സെൽ നൽകുന്ന വിവരം. ഇവർ സംസ്ഥാനം വിടാൻ സാധ്യതയുള്ളതിനാൽ റെയിൽവേ പോലീസിനും അയൽ സംസ്ഥാനങ്ങളിലെ പോലീസിനും ജാഗ്രതാ നിർദ്ദേശം നൽകിയിട്ടുണ്ട്.
ഉയർന്ന പോലീസ് ഉദ്യോഗസ്ഥന്റെ വീട്ടിൽ നടന്ന ഈ കൊലപാതകം ഹൈദരാബാദ് നഗരത്തിലെ സുരക്ഷാ ക്രമീകരണങ്ങളെക്കുറിച്ച് ഗൗരവമേറിയ ചോദ്യങ്ങൾ ഉയർത്തുന്നുണ്ട്. സിറ്റി പോലീസ് കമ്മിഷണർ നേരിട്ടെത്തി സംഭവസ്ഥലം സന്ദർശിക്കുകയും അന്വേഷണ പുരോഗതി വിലയിരുത്തുകയും ചെയ്തു.
പ്രതികളെ എത്രയും വേഗം പിടികൂടുന്നതിനായി പത്തോളം പ്രത്യേക അന്വേഷണ സംഘങ്ങളെയാണ് നിയോഗിച്ചിരിക്കുന്നത്. വീട്ടുജോലിക്കാരെ നിയമിക്കുമ്പോൾ അവരുടെ പശ്ചാത്തലം കൃത്യമായി പരിശോധിക്കണമെന്ന് പോലീസ് ജനങ്ങൾക്ക് വീണ്ടും നിർദ്ദേശം നൽകി.
