ഫാസ്ടാഗ് കൈയിൽ പിടിച്ചാൽ പണി കിട്ടും; വാഹനങ്ങൾ ബ്ലാക്ക്ലിസ്റ്റ് ചെയ്യുമെന്ന മുന്നറിയിപ്പുമായി എൻഎച്ച്എഐ
ന്യൂഡൽഹി: ദേശീയപാതകളിലൂടെ യാത്ര ചെയ്യുന്ന വാഹന ഉടമകൾക്ക് കർശന മുന്നറിയിപ്പുമായി നാഷണൽ ഹൈവേ അതോറിറ്റി ഓഫ് ഇന്ത്യ (എൻഎച്ച്എഐ). ഫാസ്ടാഗ് വാഹനത്തിന്റെ മുൻ ഗ്ലാസിൽ ശരിയായി ഒട്ടിക്കാതെ കൈയിൽ പിടിച്ച് ടോൾ പ്ലാസയിലൂടെ കടന്നുപോകുന്ന വാഹനങ്ങൾ ബ്ലാക്ക്ലിസ്റ്റ് ചെയ്യപ്പെടാനിടയുണ്ടെന്ന് അധികൃതർ അറിയിച്ചു.
ടോൾ പിരിവ് സംവിധാനം കൂടുതൽ കാര്യക്ഷമമാക്കാനും ഗതാഗതക്കുരുക്ക് കുറയ്ക്കാനുമാണ് പുതിയ നിർദ്ദേശം. പല വാഹന ഉടമകളും ഫാസ്ടാഗ് സ്റ്റിക്കർ വിൻഡ്ഷീൽഡിൽ പതിക്കാതെ കൈയിൽ പിടിച്ച് സ്കാൻ ചെയ്യിക്കുന്നതായി എൻഎച്ച്എഐ കണ്ടെത്തിയിട്ടുണ്ട്. ഇത് സ്കാനിംഗ് പ്രക്രിയ വൈകിപ്പിക്കുകയും ടോൾ പ്ലാസകളിൽ നീണ്ട നിരക്കും തിരക്കും ഉണ്ടാക്കുകയും ചെയ്യുന്നതായാണ് വിലയിരുത്തൽ.
തട്ടിപ്പിനുള്ള സാധ്യതകളും ഇതിലൂടെ വർധിക്കുന്നതായി അധികൃതർ ചൂണ്ടിക്കാട്ടുന്നു. “തടസ്സരഹിതമായ യാത്രയ്ക്ക് ഫാസ്ടാഗ് മുൻ ഗ്ലാസിൽ സ്ഥിരമായി ഒട്ടിക്കണം. കൈയിൽ പിടിച്ചാൽ ബ്ലാക്ക്ലിസ്റ്റ് ചെയ്യപ്പെടാം” എന്നാണ് എൻഎച്ച്എഐ സമൂഹമാധ്യമങ്ങളിലൂടെ മുന്നറിയിപ്പ് നൽകിയിരിക്കുന്നത്.
ആർഎഫ്ഐഡി സാങ്കേതികവിദ്യ അടിസ്ഥാനമാക്കിയുള്ള ഫാസ്ടാഗ് സംവിധാനം ടോൾ പിരിവ് ഓട്ടോമാറ്റിക്കാക്കുകയും യാത്ര വേഗത്തിലാക്കുകയും ചെയ്യുന്നതിനായാണ് രൂപകൽപ്പന ചെയ്തിരിക്കുന്നത്. എന്നാൽ സ്റ്റിക്കർ ശരിയായ രീതിയിൽ ഒട്ടിച്ചാൽ മാത്രമേ സംവിധാനം കൃത്യമായി പ്രവർത്തിക്കൂ.
ഇതിനൊപ്പം, ഫാസ്ടാഗുമായി ബന്ധപ്പെട്ട വ്യാജ വെബ്സൈറ്റുകളെക്കുറിച്ചും എൻഎച്ച്എഐ ജാഗ്രത നിർദേശം പുറപ്പെടുവിച്ചിട്ടുണ്ട്. വാർഷിക പാസ് അടക്കമുള്ള ഓഫറുകൾ വാഗ്ദാനം ചെയ്യുന്ന അനധികൃത സൈറ്റുകളിൽ നിന്ന് അകലം പാലിക്കണമെന്നും ഔദ്യോഗിക പ്ലാറ്റ്ഫോമുകൾ മാത്രം ഉപയോഗിക്കണമെന്നും അധികൃതർ നിർദേശിച്ചു.
ഒടിപി, ബാങ്ക് വിവരങ്ങൾ തുടങ്ങിയ രഹസ്യ വിവരങ്ങൾ ആരുമായും പങ്കിടരുതെന്നും മുന്നറിയിപ്പിൽ വ്യക്തമാക്കുന്നു.
English Summary
NHAI has warned that vehicles may be blacklisted if FASTag stickers are not properly affixed to the windshield. Authorities say holding the tag by hand disrupts toll scanning and increases congestion and fraud risks.
