പശ്ചിമേഷ്യൻ യുദ്ധം 60-ാം ദിവസത്തിലേക്ക്: ആണവായുധ നിർമാണം തടയാൻ എന്ത് വിലയും നൽകുമെന്ന് യുഎസ്; ഇറാൻ യുദ്ധത്തിനായി ഇതുവരെ ചെലവാക്കിയത് 25 ബില്യൺ ഡോളർ

പശ്ചിമേഷ്യൻ യുദ്ധം 60-ാം ദിവസത്തിലേക്ക്

ടെഹ്റാൻ: പശ്ചിമേഷ്യയെ സമ്പൂർണ്ണ യുദ്ധത്തിലേക്ക് തള്ളിവിട്ട് ഇറാനെതിരെ അമേരിക്കയും ഇസ്രയേലും ചേർന്ന് ആരംഭിച്ച സംയുക്ത സൈനിക നടപടികൾ അറുപതാം ദിവസത്തിലേക്ക് കടന്നിരിക്കുകയാണ്. ഫെബ്രുവരി 28ന് പുലർച്ചെ “Operation Epic Fury” എന്ന പേരിൽ ആരംഭിച്ച ഈ സൈനികാക്രമണം മേഖലയിൽ വലിയ ആശങ്കയും അനിശ്ചിതത്വവും സൃഷ്ടിച്ചിട്ടുണ്ട്. ഇറാന്റെ ആണവ ശേഷി പൂർണ്ണമായും ഇല്ലാതാക്കുകയാണ് തങ്ങളുടെ പ്രധാന ലക്ഷ്യമെന്ന് പെന്റഗൺ മേധാവി Pete Hegseth അമേരിക്കൻ പ്രതിനിധി സഭയിൽ വ്യക്തമാക്കി. ആക്രമണങ്ങൾ ഇറാനെ ഗൗരവമായി ദുർബലമാക്കിയെന്ന അവകാശവാദവും അദ്ദേഹം ഉന്നയിച്ചു.

യുദ്ധത്തിന്റെ സാമ്പത്തിക വശവും ശ്രദ്ധേയമാണ്. ഇറാനുമായുള്ള ഈ സംഘർഷത്തിനായി അമേരിക്ക ഇതിനകം 25 ബില്യൺ ഡോളർ, ഏകദേശം 2.08 ലക്ഷം കോടി രൂപ, ചെലവഴിച്ചതായി പെന്റഗൺ വെളിപ്പെടുത്തി. ബുധനാഴ്ച നടന്ന House Armed Services Committee യോഗത്തിലാണ് Pete Hegseth യുദ്ധത്തിന്റെ ആദ്യ ഔദ്യോഗിക ചെലവ് കണക്കുകൾ പുറത്തുവിട്ടത്. ഇറാൻ ആണവായുധം വികസിപ്പിക്കുന്നത് തടയാൻ ഏതൊരു വിലയും നൽകാൻ അമേരിക്ക തയ്യാറാണെന്ന് അദ്ദേഹം വ്യക്തമാക്കി.

അതേസമയം, ഹോർമൂസ് കടലിടുക്കിൽ നാവിക ഉപരോധം തുടരുമെന്നും Pete Hegseth അറിയിച്ചു. യുദ്ധം എപ്പോൾ അവസാനിക്കും എന്നതിനെക്കുറിച്ച് വ്യക്തമായ മറുപടി നൽകാൻ അദ്ദേഹം തയ്യാറായില്ല. മറുവശത്ത്, രാജ്യത്തെ എണ്ണക്കിണറുകൾക്ക് യാതൊരു കേടുപാടും സംഭവിച്ചിട്ടില്ലെന്നും ആവശ്യമായാൽ അത് ലൈവ് സ്ട്രീമിംഗിലൂടെ ലോകത്തിന് കാണിക്കാമെന്നും ഇറാൻ പ്രതികരിച്ചു.

ഇതിനിടെ, യുദ്ധത്തിന്റെ സാമ്പത്തിക ഭാരം അമേരിക്കൻ ജനങ്ങളുടെ ദൈനംദിന ജീവിതത്തെ ബാധിക്കുന്നുവെന്ന വിമർശനം ശക്തമാകുകയാണ്. ഡെമോക്രാറ്റിക് നേതാക്കൾ ഈ വിഷയത്തിൽ ശക്തമായ പ്രതിഷേധവുമായി രംഗത്തെത്തിയിട്ടുണ്ട്. യുദ്ധച്ചെലവ് രാജ്യത്തിന്റെ ആഭ്യന്തര സാമ്പത്തിക സാഹചര്യത്തെ ദോഷകരമായി ബാധിക്കുകയാണെന്ന ആശങ്കയും അവർ ഉയർത്തുന്നു.