വിദ്യാർത്ഥി ആത്മഹത്യകൾ: കേന്ദ്രം കണക്കുകൾ മറച്ചുവെക്കുന്നതായി ജോൺ ബ്രിട്ടാസ് എം.പി

ന്യൂഡൽഹി: രാജ്യത്തെ ഉന്നത വിദ്യാഭ്യാസ സ്ഥാപനങ്ങളിലും കോച്ചിങ് സെന്ററുകളിലും ആത്മഹത്യ ചെയ്യുന്ന വിദ്യാർത്ഥികളുടെ എണ്ണത്തിൽ വൻ വർധനയുണ്ടാകുന്നു എന്ന ആശങ്കകൾക്കിടെ,

ഇതുസംബന്ധിച്ച കൃത്യമായ വിവരങ്ങൾ കേന്ദ്ര സർക്കാർ മറച്ചുവെക്കുന്നതായി ആരോപണം.

പട്ടികജാതി-പട്ടികവർഗ (SC/ST), പിന്നാക്ക വിഭാഗങ്ങളിൽ നിന്നുള്ള വിദ്യാർത്ഥികളുടെ ജീവന് സർക്കാർ എന്ത് വിലയാണ് നൽകുന്നതെന്ന് രാജ്യസഭയിൽ ജോൺ ബ്രിട്ടാസ് എം.പി ചോദിച്ചു.

വിദ്യാർത്ഥികളുടെ മരണസംഖ്യ സംബന്ധിച്ച ചോദ്യത്തിന് വ്യക്തമായ ഉത്തരം നൽകാതെ സർക്കാർ ഉരുണ്ടുകളിക്കുകയാണെന്ന് അദ്ദേഹം കുറ്റപ്പെടുത്തി.

കണക്കുകൾ ചോദിച്ചാൽ വെബ്‌സൈറ്റ് നോക്കാൻ മറുപടി; മൂന്ന് വർഷത്തെ വിവരങ്ങൾ ലഭ്യമല്ലാത്തത് ദുരൂഹമെന്ന് ആക്ഷേപം

കഴിഞ്ഞ മൂന്ന് വർഷത്തിനിടെ രാജ്യത്തെ വിവിധ ഉന്നത വിദ്യാഭ്യാസ സ്ഥാപനങ്ങളിലും കോച്ചിങ് സെന്ററുകളിലും ജീവനൊടുക്കിയ വിദ്യാർത്ഥികളുടെ സംസ്ഥാനം, ലിംഗം, ജാതി എന്നിവ തിരിച്ചുള്ള കൃത്യമായ കണക്കുകളാണ് ജോൺ ബ്രിട്ടാസ് തേടിയത്.

എന്നാൽ, മറുപടി നൽകേണ്ട വിദ്യാഭ്യാസ മന്ത്രാലയം കൃത്യമായ ഒരു കണക്കും സഭയിൽ ഹാജരാക്കിയില്ല. പകരം നാഷണൽ ക്രൈം റെക്കോർഡ്‌സ് ബ്യൂറോ (NCRB) പ്രസിദ്ധീകരിക്കുന്ന റിപ്പോർട്ടുകളെ ആശ്രയിക്കാനായിരുന്നു നിർദ്ദേശം.

സർക്കാർ നൽകിയ വെബ്‌സൈറ്റ് പരിശോധിച്ചപ്പോൾ 2023 വരെയുള്ള അപൂർണ്ണമായ വിവരങ്ങൾ മാത്രമാണ് ലഭ്യമായത്.

2026-ൽ എത്തിനിൽക്കുമ്പോഴും കഴിഞ്ഞ മൂന്ന് വർഷത്തെ ഡാറ്റ പുറത്തുവിടാത്തത് ഗൗരവകരമായ വീഴ്ചയാണെന്ന് എം.പി ചൂണ്ടിക്കാട്ടി.

ദളിത്-പിന്നാക്ക വിഭാഗങ്ങളിലെ വിദ്യാർത്ഥികളുടെ മരണം മറച്ചുവെക്കുന്നു; വിവേചനവും അതിക്രമങ്ങളും ചർച്ചയാകാതിരിക്കാൻ നീക്കമോ?

പട്ടികജാതി-പട്ടികവർഗ, പിന്നാക്ക വിഭാഗങ്ങളിൽ നിന്നുള്ള വിദ്യാർത്ഥികൾ നേരിടുന്ന കടുത്ത വിവേചനവും മാനസിക പീഡനങ്ങളുമാണ് പലപ്പോഴും ആത്മഹത്യകളിലേക്ക് നയിക്കുന്നത്.

എന്നാൽ ഈ വിഭാഗങ്ങളിൽ നിന്നുള്ള എത്ര കുട്ടികൾ മരിച്ചു എന്നതിനെക്കുറിച്ച് സർക്കാർ പൂർണ്ണ മൗനം പാലിക്കുകയാണ്.

ഗൾഫിൽനിന്നെത്തിയ കൂട്ടുകാരനെ സത്കാരത്തിന് വീട്ടിലേക്ക് വിളിച്ചുവരുത്തി കൊലപ്പെടുത്തി

കരിയർ സമ്മർദ്ദം, ലഹരി ഉപയോഗം, സാമ്പത്തിക ബുദ്ധിമുട്ട് തുടങ്ങിയ പൊതുവായ കാരണങ്ങൾ നിരത്തി തടിയൂരാനാണ് കേന്ദ്രം ശ്രമിക്കുന്നത്.

ക്യാമ്പസുകളിൽ നടക്കുന്ന ജാതീയമായ വേർതിരിവുകളെയും ചൂഷണങ്ങളെയും കുറിച്ചുള്ള ചോദ്യങ്ങളിൽ നിന്ന് സർക്കാർ ബോധപൂർവ്വം ഒഴിഞ്ഞുമാറുകയാണെന്ന് ബ്രിട്ടാസ് ഫേസ്ബുക്ക് പോസ്റ്റിൽ വിമർശിച്ചു.

പദ്ധതികൾ കടലാസിൽ മാത്രം; മനോദർപ്പണും കൗൺസിലിങ്ങും പരാജയമെന്ന് തെളിയിക്കുന്ന ഡാറ്റയുമായി ബ്രിട്ടാസ് രംഗത്ത്

വിദ്യാർത്ഥികളുടെ മാനസികാരോഗ്യം സംരക്ഷിക്കാൻ ‘മനോദർപ്പൺ’ പോലുള്ള പദ്ധതികൾ നടപ്പിലാക്കുന്നുണ്ടെന്ന് സർക്കാർ അവകാശപ്പെടുമ്പോഴും അതിന്റെ ഫലപ്രാപ്തിയെക്കുറിച്ച് യാതൊരു രേഖയുമില്ല.

ഇത്തരം പദ്ധതികൾ നിലവിലിരിക്കെത്തന്നെ വിദ്യാർത്ഥി ആത്മഹത്യകൾ വർധിക്കുന്നത് വ്യവസ്ഥിതിയുടെ പരാജയമാണ്.

അത്യാധുനിക ഡിജിറ്റൽ സംവിധാനങ്ങളുള്ള കാലത്ത് ഒരു ജീവന്റെ കണക്കെടുക്കാൻ പോലും സർക്കാരിന് കഴിയാത്തത് ജനാധിപത്യത്തോടുള്ള വെല്ലുവിളിയാണെന്നും, ‘

വിദ്യാർത്ഥികളുടെ സംരക്ഷണം സർക്കാരിന്റെ പ്രാഥമിക ഉത്തരവാദിത്തമാണെന്നും അദ്ദേഹം ഓർമ്മിപ്പിച്ചു.

English Summary

MP John Brittas has accused the Central Government of withholding crucial data regarding student suicides, particularly among SC/ST and OBC communities in higher education institutions and coaching centers. Despite questioning the government in the Rajya Sabha for detailed statistics categorized by state, gender, and caste over the last three years, the government directed him to outdated NCRB reports. Brittas termed this lack of transparency as a failure of the system and a challenge to democracy, emphasizing that every student suicide reflects a systematic breakdown and the government’s inability to provide safety to the youth.