കാലുകൾ ചങ്ങലയിട്ട് പൂട്ടി… നടുറോഡിൽ കിടന്ന സ്ത്രീയെ രക്ഷപ്പെടുത്തി അഗ്നിരക്ഷാസേന; പിന്നിൽ ഭർത്താവിന്റെ ക്രൂരതയോ അതോ നിസ്സഹായാവസ്ഥയോ?
കൊല്ലങ്കോട്: കാലുകൾ ചങ്ങലയിട്ട് പൂട്ടിയ നിലയിൽ റോഡരികിൽ കണ്ടെത്തിയ സ്ത്രീയെ അഗ്നിരക്ഷാസേനയും പൊലീസും ചേർന്ന് രക്ഷപ്പെടുത്തി. സംഭവത്തിൽ ഭർത്താവാണ് ഭാര്യയെ ഇത്തരത്തിൽ ബന്ധിച്ചതെന്ന് കണ്ടെത്തി.
ശനിയാഴ്ച ഉച്ചയോടെ കൊല്ലങ്കോട് പട്ടണത്തിനടുത്തുള്ള ആനമാറി റോഡിൽ തമിഴ്നാട് നാമക്കൽ സ്വദേശിനിയായ 55കാരിയെ ചങ്ങലയിട്ട് പൂട്ടിയ നിലയിൽ നാട്ടുകാർ കണ്ടതിനെ തുടർന്നാണ് സംഭവം പുറത്തറിയുന്നത്. വിവരം ലഭിച്ചതിനെ തുടർന്ന് സ്ഥലത്തെത്തിയ അഗ്നിരക്ഷാസേനാംഗങ്ങൾ കട്ടർ ഉപയോഗിച്ച് ചങ്ങല മുറിച്ചുമാറ്റി സ്ത്രീയെ മോചിപ്പിച്ചു.
തുടർന്ന് സ്ത്രീയെ പൊലീസിന് കൈമാറി. ഊട്ടറ പ്രദേശത്ത് ഷെഡ്ഡ് കെട്ടി താമസിക്കുന്ന ദമ്പതികളാണിവരെന്ന് പൊലീസ് അറിയിച്ചു.
ഭാര്യയുടെ അമിത മദ്യപാനം കാരണം വീട്ടിൽ പ്രശ്നങ്ങൾ ഉണ്ടാകുകയും, പുറത്തേക്ക് പോകുന്നത് തടയാനായി കാലുകൾ പൂട്ടിയതാണെന്ന് ഭർത്താവ് പൊലീസിനോട് പറഞ്ഞു. മദ്യപിച്ചാൽ ഇവർ വിവസ്ത്രയായി പുറത്തേക്കിറങ്ങുന്ന സാഹചര്യമുണ്ടാകുന്നതായും ഇയാൾ അവകാശപ്പെട്ടു.
സംഭവത്തിനിടെ പൂട്ടിയ നിലയിലായിരുന്ന സ്ത്രീ ഒരു സ്കൂട്ടർ യാത്രക്കാരന്റെ സഹായത്തോടെ സമീപത്തെ വർക്ഷോപ്പിന് മുന്നിലെത്തിയതായും വിവരം ലഭിച്ചു.
ഇതിനുശേഷം ദമ്പതികളെ പൊലീസ് വിളിച്ചുവരുത്തി ചർച്ച നടത്തി. ഇനിമുതൽ ഇത്തരം സംഭവങ്ങൾ ആവർത്തിക്കില്ലെന്ന ഉറപ്പിന്റെ അടിസ്ഥാനത്തിൽ കേസ് രജിസ്റ്റർ ചെയ്യാതെ ഇരുവരെയും വിട്ടയച്ചതായി അധികൃതർ അറിയിച്ചു.
English Summary
A woman found chained by her legs on a roadside in Kollengode was rescued by fire force and police. Her husband admitted to restraining her due to alleged alcohol-related issues. The couple was later released after a warning.
Kerala News, Kollengode, Crime News, Human Rights, Police Case, Fire Force, Domestic Issue
