ഇംഫാൽ: സമാധാനത്തിലേക്ക് മടങ്ങുകയാണെന്ന് കരുതിയ മണിപ്പൂരിൽ വീണ്ടും വംശീയ സംഘർഷം ആളിപ്പടരുന്നു.
നാഗാ വിഭാഗത്തിന് ഭൂരിപക്ഷമുള്ള ഉഖ്റൂൽ ജില്ലയിലാണ് പുതിയ സംഘർഷങ്ങൾ പൊട്ടിപ്പുറപ്പെട്ടത്.
കുക്കി-നാഗ വിഭാഗങ്ങൾ തമ്മിലുണ്ടായ ഏറ്റുമുട്ടലിനെത്തുടർന്ന് ഉഖ്റൂലിൽ ജില്ലാ ഭരണകൂടം നിരോധനാജ്ഞ (Section 144) പ്രഖ്യാപിച്ചു.
സ്ഥിതിഗതികൾ നിയന്ത്രണവിധേയമാക്കാൻ കനത്ത ജാഗ്രതയാണ് പോലീസ് പുലർത്തുന്നത്.
തർക്കം പരിഹരിക്കാനുള്ള ഗോത്ര നേതാക്കളുടെ ശ്രമം പാളി; തെരുവിൽ അരങ്ങേറിയത് മണിക്കൂറുകൾ നീണ്ട കല്ലേറും അക്രമവും
കഴിഞ്ഞ ദിവസം രാത്രി ലിറ്റാൻ ഗ്രാമത്തിൽ വെച്ച് ഒരു നാഗാ യുവാവിനെ ഒരു സംഘം ആക്രമിച്ചതോടെയാണ് പ്രശ്നങ്ങളുടെ തുടക്കം.
സംഭവം അറിഞ്ഞ ഉടൻ തന്നെ ഇരു വിഭാഗങ്ങളിലെയും ഗോത്രനേതാക്കൾ ഇടപെട്ട് ചർച്ചകളിലൂടെ സമാധാനപരമായ പരിഹാരത്തിന് ശ്രമിച്ചെങ്കിലും വൈകാരികമായ നീക്കങ്ങൾ ചർച്ചകളെ പരാജയപ്പെടുത്തി.
ഇതോടെ വൈകുന്നേരത്തോടെ ഇരുവിഭാഗങ്ങളും തമ്മിൽ ചേരിതിരിഞ്ഞ് കല്ലേറും രൂക്ഷമായ സംഘട്ടനവുമുണ്ടായി.
മണിക്കൂറുകൾ നീണ്ട അക്രമസംഭവങ്ങളാണ് ഉഖ്റൂലിൽ ഇന്നലെ രാത്രി അരങ്ങേറിയത്.
സായുധ സംഘങ്ങൾ ഗ്രാമങ്ങൾ വളഞ്ഞ് തീയിട്ടു; വെടിയൊച്ചകൾക്കിടയിൽ പ്രാണരക്ഷാർത്ഥം കാടുകയറി നൂറുകണക്കിന് ഗ്രാമീണർ
ലിറ്റാൻ സാരയ്ഖോങ് ഗ്രാമത്തിലേക്ക് അപ്രതീക്ഷിതമായി കടന്നുകയറിയ സായുധ സംഘങ്ങൾ വീടുകൾക്ക് ഒന്നിനുപുറകെ ഒന്നായി തീയിട്ടതോടെ സ്ഥിതിഗതികൾ നിയന്ത്രണാതീതമായി.
നിരവധി വീടുകളാണ് നിമിഷനേരം കൊണ്ട് അഗ്നിക്കിരയായത്. സായുധ ഗ്രൂപ്പുകൾ ഗ്രാമത്തിന് ചുറ്റും നിന്ന് ആകാശത്തേക്ക് പലവട്ടം
വെടിയുതിർത്തതോടെ ഭയചകിതരായ ഗ്രാമീണർ കയ്യിൽ കിട്ടിയതുമെടുത്ത് അയൽ ജില്ലയായ കാങ്പോക്പിയിലേക്ക് കൂട്ടത്തോടെ പാലായനം ചെയ്യുകയാണ്.
സ്ത്രീകളും കുട്ടികളും പ്രായമായവരും അടക്കം നൂറുകണക്കിന് ആളുകളാണ് കൊടുംകാടുകളിലൂടെ അഭയം തേടി പലായനം ചെയ്യുന്നത്.
ഉഖ്റൂലിൽ കർശനമായ നിരോധനാജ്ഞ; അക്രമികൾക്കെതിരെ വെടിവെയ്ക്കാൻ ഉത്തരവിട്ട് ജില്ലാ ഭരണകൂടം
നിലവിൽ സംഘർഷത്തിന് നേരിയ അയവ് വന്നിട്ടുണ്ടെങ്കിലും പ്രദേശം വലിയ ആയുധധാരികളായ പോലീസിന്റെയും സുരക്ഷാസേനയുടെയും നിശ്ചിത നിരീക്ഷണത്തിലാണ്.
ഉഖ്റൂൽ ജില്ലയിൽ ഉടനീളം അഞ്ചോ അതിലധികമോ ആളുകൾ കൂട്ടംകൂടുന്നത് ജില്ലാ ഭരണകൂടം കർശനമായി നിരോധിച്ചിട്ടുണ്ട്.
പൊതുമുതൽ നശിപ്പിക്കാനോ ആയുധങ്ങളുമായി പുറത്തിറങ്ങാനോ ശ്രമിക്കുന്നവർക്കെതിരെ കർശന നടപടിയുണ്ടാകുമെന്ന് പോലീസ് വ്യക്തമാക്കി.
മണിപ്പൂരിലെ വംശീയ കലാപം പുതിയ മേഖലകളിലേക്ക് പടരുന്നത് കേന്ദ്ര-സംസ്ഥാന സർക്കാരുകൾക്ക് വലിയ സുരക്ഷാ വെല്ലുവിളിയാണ് ഉയർത്തുന്നത്.
English Summary:
Tension escalated in Manipur’s Ukhrul district after a clash between Kuki and Naga communities. The violence began following an assault on a Naga youth. Armed groups reportedly set fire to houses in Litan Saraykhong village, leading to a mass exodus of villagers to Kangpokpi district. The district administration has imposed Section 144 and deployed heavy security to maintain law and order.
