ഹൈഡ്രജൻ ബസുകൾ നിരത്തിലിറക്കുന്ന രാജ്യത്തെ ആദ്യ വിമാനത്താവളമാവാൻ സിയാൽ
കൊച്ചി: യാത്രക്കാർക്കായി ഹൈഡ്രജൻ ബസുകൾ നിരത്തിലിറക്കുന്ന രാജ്യത്തെ ആദ്യ വിമാനത്താവളമാകാൻ കൊച്ചി അന്താരാഷ്ട്ര വിമാനത്താവളമായ സിയാൽ (CIAL) ഒരുങ്ങുന്നു.
ഇതുമായി ബന്ധപ്പെട്ട് കേരള ഹൈഡ്രജൻ വാലി ഇന്നൊവേഷൻ ക്ലസ്റ്റർ (K-HVIC) ഫൗണ്ടേഷനും സിയാലും തമ്മിലുള്ള ധാരണാപത്രം ഞായറാഴ്ച ഒപ്പുവച്ചു.
സിയാലിലെ 0484 എയ്റോ ലോഞ്ചിൽ നടന്ന ചടങ്ങിൽ കേരള ഹൈഡ്രജൻ വാലി ഫൗണ്ടേഷനെ പ്രതിനിധീകരിച്ച് വൈദ്യുതി മന്ത്രി കെ. കൃഷ്ണൻകുട്ടി, സിയാൽ ഡയറക്ടറും വ്യവസായ–നിയമ വകുപ്പ് മന്ത്രിയുമായ അഡ്വ. പി. രാജീവ് എന്നിവർ ധാരണാപത്രം കൈമാറി.
കേരള ഹൈഡ്രജൻ വാലി പദ്ധതിയുടെ ഭാഗമായി, ദേശീയ ഗ്രീൻ ഹൈഡ്രജൻ മിഷന്റെ പിന്തുണയോടെ, കൊച്ചി വിമാനത്താവളത്തിൽ മൂന്ന് ഹൈഡ്രജൻ ഫ്യൂവൽ സെൽ ഇലക്ട്രിക് ബസുകൾ പ്രവർത്തനത്തിൽ കൊണ്ടുവരാനാണ് പദ്ധതി.
ബസുകൾ വാങ്ങുന്നതിനായി ഓരോ ബസിനും പരമാവധി 2.90 കോടി രൂപ വീതം, മൊത്തം 8.7 കോടി രൂപ ധനസഹായം കേരള HVIC ഫൗണ്ടേഷൻ ഘട്ടംഘട്ടമായി നൽകും.
ഒരു വർഷത്തിനകം ബസുകൾ വാങ്ങാനാണ് ലക്ഷ്യം. ബസുകളുടെ ഉടമസ്ഥാവകാശം സിയാലിനായിരിക്കും. പ്രവർത്തനച്ചെലവും മറ്റ് അനുബന്ധ ചെലവുകളും സിയാൽ വഹിക്കും.
ബസുകളുടെ പ്രവർത്തന മാതൃകയും സർവീസ് റൂട്ടുകളും സിയാൽ തീരുമാനിക്കുമെന്നും അധികൃതർ വ്യക്തമാക്കി.
ചടങ്ങിൽ സിയാൽ മാനേജിംഗ് ഡയറക്ടർ എസ്. സുഹാസ് ഐ.എ.എസ്, കേരള HVIC ഫൗണ്ടേഷൻ ചെയർമാനും മാനേജിംഗ് ഡയറക്ടറുമായ ഹർഷിൽ ആർ. മീന ഐ.എ.എസ്, കേന്ദ്ര ശാസ്ത്ര–സാങ്കേതിക വകുപ്പിലെ സീനിയർ ഡയറക്ടറും ശാസ്ത്രജ്ഞനുമായ ഡോ. രഞ്ജിത് കൃഷ്ണ പൈ എന്നിവരും പങ്കെടുത്തു.
പദ്ധതി നടപ്പാകുന്നതോടെ വിമാനത്താവളത്തിലെ യാത്രാസൗകര്യം കൂടുതൽ മെച്ചപ്പെടുകയും, സുസ്ഥിരവും പരിസ്ഥിതി സൗഹൃദവുമായ ഗതാഗത സംവിധാനങ്ങളുടെ ഉപയോഗം ശക്തിപ്പെടുകയും ചെയ്യും.
സിയാലും ബി.പി.സി.എല്ലും ചേർന്ന് നിർമിച്ച ഗ്രീൻ ഹൈഡ്രജൻ പ്ലാന്റ് പ്രവർത്തനം ആരംഭിക്കുന്നതോടെ ബസുകൾക്ക് ആവശ്യമായ ഇന്ധനവിതരണവും ഉറപ്പാക്കാനാകും.
ഹൈഡ്രജൻ വിതരണവുമായി ബന്ധപ്പെട്ട നിയമപരമായ അനുമതികൾ ഇതിനകം ലഭിച്ചതിനാൽ പദ്ധതി സമയബന്ധിതമായി നടപ്പാക്കാൻ കഴിയുമെന്നാണ് വിലയിരുത്തൽ.
ENGLISH SUMMARY
Cochin International Airport (CIAL) is set to become India’s first airport to operate hydrogen buses for passenger transport. CIAL and the Kerala Hydrogen Valley Innovation Cluster (K-HVIC) Foundation signed an MoU to deploy three hydrogen fuel cell electric buses under the National Green Hydrogen Mission. K-HVIC will provide financial support of up to Rs 8.7 crore for purchasing the buses, while CIAL will manage operations and related costs.
cial-indias-first-airport-hydrogen-buses-mou-khvic
CIAL, Kochi airport, hydrogen buses, green hydrogen, K-HVIC, Kerala Hydrogen Valley, National Green Hydrogen Mission, fuel cell electric bus, sustainable transport, eco-friendly transport, BPCL, Kerala news, Kochi, transport innovation
