കോടതി ലോക്കറിൽ സ്വർണ്ണത്തിന് പകരം മുക്കുപണ്ടം; 23 വർഷം മുൻപ് മരിച്ച യുവതിയുടെ എട്ടര പവൻ എവിടെ?
തൃശൂർ ∙ തൃശൂർ ആർ.ഡി.ഒ കോടതിയുടെ ലോക്കറിൽ സൂക്ഷിച്ചിരുന്ന എട്ടര പവൻ സ്വർണം കാണാതായതായി പരാതി. 23 വർഷം മുൻപ് മരിച്ച യുവതിയുടെ ആഭരണങ്ങളാണ് നഷ്ടപ്പെട്ടത്.
സ്വർണമാണെന്ന് പരിശോധിച്ച് ഉറപ്പാക്കിയ ശേഷമാണ് ആഭരണങ്ങൾ ലോക്കറിൽ സൂക്ഷിച്ചതെങ്കിലും, പിന്നീട് തിരികെ വാങ്ങാൻ എത്തിയപ്പോൾ ലോക്കറിലുണ്ടായിരുന്നത് മുക്കുപണ്ടമാണെന്ന് കണ്ടെത്തി.
തൃശൂർ കാട്ടൂർ സ്വദേശിനിയായ 28കാരി റംലത്ത് തലച്ചോറിലെ അണുബാധയെ തുടർന്ന് 2003-ലാണ് മരിച്ചത്. അന്ന് റംലത്തിന് രണ്ട് കൈക്കുഞ്ഞുങ്ങളുണ്ടായിരുന്നു.
റംലത്തിന്റെ ദേഹത്തുണ്ടായിരുന്ന എട്ടര പവന്റെ ആഭരണങ്ങൾ ആർ.ഡി.ഒ കോടതിയുടെ ലോക്കറിലാണ് സൂക്ഷിച്ചത്.
റംലത്തിന്റെ മക്കൾ പ്രായപൂർത്തിയായതോടെ ആഭരണങ്ങൾ തിരികെ വാങ്ങാൻ മൂന്നു വർഷം മുൻപ് റംലത്തിന്റെ അമ്മ സുലേഖ ആർ.ഡി.ഒ കോടതിയിലെത്തി.
ആവശ്യമായ രേഖകൾ മുഴുവൻ കൈവശമുണ്ടായിരുന്നുവെന്നും ഉദ്യോഗസ്ഥർ പരിശോധന നടത്തിയപ്പോഴാണ് ലോക്കറിൽ സ്വർണമല്ല, മുക്കുപണ്ടമാണുള്ളതെന്ന് വ്യക്തമായതെന്നും പറയുന്നു.
ഇതിനെ തുടർന്ന് ഉദ്യോഗസ്ഥരുടെ പരാതിയിൽ തൃശൂർ വെസ്റ്റ് പൊലീസ് കേസെടുത്തു അന്വേഷണം ആരംഭിച്ചു.
എന്നാൽ മൂന്നു വർഷമായി അന്വേഷണം നടന്നിട്ടും സ്വർണം കണ്ടെത്താനായില്ല. സുലേഖ മാറിമാറി വന്ന കലക്ടർമാർക്ക് പരാതി നൽകിയെങ്കിലും ഫലമുണ്ടായിട്ടില്ല.
സ്വന്തമായി താമസിക്കാൻ കിടപ്പാടം പോലും ഇല്ലാത്ത സുലേഖയും പേരക്കുട്ടികളും എട്ടര പവന്റെ സ്വർണം തിരികെ ലഭിച്ചാൽ ഭൂമി വാങ്ങി കുറഞ്ഞത് ഒരു കുടിൽപോലുമെങ്കിലും പണിയാനാകുമെന്ന പ്രതീക്ഷയിലാണ്.
2003 മുതൽ 2022 വരെ ആർ.ഡി.ഒ കോടതിയിലെ ലോക്കറിന്റെ ചുമതലയുണ്ടായിരുന്ന ഉദ്യോഗസ്ഥരെ കേന്ദ്രീകരിച്ചാണ് അന്വേഷണം നടക്കുന്നതെന്ന് റിപ്പോർട്ടുണ്ട്. നീതി തേടി മൂന്നു വർഷമായി ആർ.ഡി.ഒ കോടതിയുടെ ഓഫിസിൽ കയറിയിറങ്ങുകയാണ് സുലേഖ.
English Summary
Gold jewellery weighing 8.5 sovereigns kept in the Thrissur RDO court locker has allegedly gone missing and was found replaced with imitation ornaments. The jewellery belonged to a woman who died in 2003 and was deposited officially after verification. Despite a police case and three years of investigation, the missing gold has not been traced, leaving the family still seeking justice.
thrissur-rdo-court-locker-missing-gold-replaced-imitation
Thrissur, RDO Court, Missing Gold, Locker Theft, Imitation Jewellery, Police Investigation, Kerala News, Court Locker, Ramla, Sulekha
