ഹിറ്റ്മാൻ അല്ല ഫിറ്റ്മാൻ! രോഹിത് ശർമ വീണ്ടും ഭാരം കുറച്ചു
മുംബൈ: “ഹിറ്റ്മാൻ” ഇനി “ഫിറ്റ്മാൻ”! ദക്ഷിണാഫ്രിക്കയ്ക്കെതിരായ ഏകദിന പരമ്പരക്ക് മുന്നോടിയായി കഠിനമായി പരിശീലനം നടത്തുന്ന രോഹിത് ശർമയെ സോഷ്യൽ മീഡിയ ഇപ്പോൾ അഭിനന്ദനങ്ങൾ കൊണ്ട് മൂടുകയാണ്.
ബാന്ദ്ര-കുർള കോംപ്ലക്സ് മൈതാനത്തിൽ നടന്ന പരിശീലനത്തിനിടെ രോഹിത് പ്രകടിപ്പിച്ച അത്യുജ്ജ്വല ഫിറ്റ്നസ് ആരാധകരെ അത്ഭുതപ്പെടുത്തിയിരിക്കുന്നു.
മുൻകാലത്തേക്കാൾ വ്യക്തമായി ഭാരം കുറച്ചാണ് താരം പ്രത്യക്ഷപ്പെട്ടത്.
ഓസ്ട്രേലിയൻ പര്യടനത്തിൽ സെഞ്ചുറിയും അർദ്ധസെഞ്ചുറിയും നേടി മൂന്ന് മത്സരങ്ങളിൽ നിന്ന് 202 റൺസ് നേടി “പ്ലെയർ ഓഫ് ദി സീരീസ്” ബഹുമതി നേടിയ രോഹിത്, ഇപ്പോൾ അഞ്ചുകിലോ കൂടി കുറച്ചിട്ടുണ്ടെന്നാണ് റിപ്പോർട്ടുകൾ.
ഓസ്ട്രേലിയൻ പര്യടനത്തിന് മുൻപ് തന്നെ 11 കിലോ ഭാരം കുറച്ചിരുന്ന താരം ഇപ്പോൾ കൂടുതൽ ഫിറ്റായിട്ടാണ് കാണുന്നത്.
2027ലെ ലോകകപ്പിൽ ഇന്ത്യയെ നയിക്കാനാണ് രോഹിത്തിന്റെ ലക്ഷ്യമെന്ന് ആരാധകർ പ്രതീക്ഷിക്കുന്നു. ദക്ഷിണാഫ്രിക്ക ഇന്ത്യയിലെത്തുന്നത് ആദ്യം രണ്ട് ടെസ്റ്റ് മത്സരങ്ങൾക്ക് ആയിരിക്കും.
തുടർന്ന് നവംബർ 30ന് ആരംഭിക്കുന്ന ഏകദിന പരമ്പരയിൽ രോഹിത്തും വിരാട് കോഹ്ലിയും പങ്കെടുക്കും.
2024ലെ ടി20 ലോകകപ്പ് വിജയത്തിന് ശേഷം ടി20യിൽ നിന്നും വിരമിച്ച രോഹിത്, ഇപ്പോൾ ഏകദിന ഫോർമാറ്റിൽ മാത്രമാണ് കളിക്കുന്നത്. ഈ വർഷം ടെസ്റ്റിൽ നിന്നും അദ്ദേഹം വിരമിച്ചിരുന്നു.
English Summary:
Indian skipper Rohit Sharma, nicknamed “Hitman,” has impressed fans with his new, lean look ahead of the ODI series against South Africa. A training video from Mumbai’s Bandra-Kurla Complex showing his improved fitness has gone viral. Rohit, who had lost 11 kg before the Australia tour, has reportedly shed another 5 kg. After a stellar performance against Australia, scoring 202 runs in three matches and winning “Player of the Series,” he now aims to stay fit for the 2027 World Cup. Following South Africa’s two-match Test series in India, the ODI series featuring Rohit and Virat Kohli will begin on November 30. Having retired from T20 and Test cricket, Rohit now plays only in ODIs.
