കോലഞ്ചേരിയിൽ വെള്ളം കോരുന്നതിനിടെ 30 അടി താഴ്ചയുള്ള കിണറ്റിലേക്ക് കാൽവഴുതി വീണ് വീട്ടമ്മ; പിന്നാലെ ഇറങ്ങി ജീവൻ കാത്ത് ഭർത്താവ്
കൊച്ചി: വെള്ളം കോരുന്നതിനിടെ വീട്ടുമുറ്റത്തെ കിണറ്റിലേക്ക് വീണ വീട്ടമ്മയെ അഗ്നിരക്ഷാസേന രക്ഷപ്പെടുത്തി. കോലഞ്ചേരി പൂതൃക്ക പഞ്ചായത്തിലെ കുടകുത്തിയിലാണ് സംഭവം നടന്നത്.
തവളച്ചാൽ കുഴിയിൽ ശാന്ത (57) ആണ് അപകടത്തിൽപ്പെട്ടത്. ഉച്ചയ്ക്ക് 12 മണിയോടെയായിരുന്നു സംഭവം.
വെള്ളം കോരുന്നതിനിടെ അബദ്ധത്തിൽ കാൽവഴുതി ശാന്ത 30 അടി താഴ്ചയുള്ള കിണറ്റിലേക്ക് വീഴുകയായിരുന്നു.
അപകടസമയത്ത് സമീപത്തുണ്ടായിരുന്ന ഭർത്താവ് മോഹനൻ ഉടൻ കിണറ്റിലേക്ക് ഇറങ്ങി ശാന്തയെ പിടിച്ചുനിർത്തി.
വിവരം ലഭിച്ചതിനെ തുടർന്ന് പുത്തൻകുരിശ് പൊലീസ് പട്ടിമറ്റം അഗ്നിരക്ഷാസേനയെ അറിയിച്ചു.
സ്റ്റേഷൻ ഓഫീസർ എൻ.എച്ച്. അനീസിന്റെ നേതൃത്വത്തിൽ സ്ഥലത്തെത്തിയ അഗ്നിരക്ഷാസേനാംഗങ്ങൾ നെറ്റ് റോപ്പിന്റെ സഹായത്തോടെ ഇരുവരെയും സുരക്ഷിതമായി പുറത്തെടുത്തു.
ശാന്തയെ തുടർന്ന് വൈദ്യപരിശോധനയ്ക്കായി ആശുപത്രിയിലേക്ക് മാറ്റി.
രഞ്ജിത്, ബെന്നി മാത്യു, അനിൽകുമാർ, റെജിമോൻ, ഗഫൂർ, ശുഹൈബ്, വിജിത്ത് കുമാർ, അഖിൽദേവ്, അഭിജിത്ത്, ഷാനവാസ്, ഹോംഗാർഡ് രാമചന്ദ്രൻ എന്നിവരാണ് രക്ഷാപ്രവർത്തനത്തിൽ പങ്കെടുത്തത്.
English Summary
A 57-year-old woman who accidentally fell into a 30-foot-deep well while drawing water in Koothattukulam near Kochi was rescued by the Fire and Rescue Services. Her husband climbed into the well and held her until rescue teams arrived.
കൊച്ചി, കിണർ അപകടം, അഗ്നിരക്ഷാസേന, രക്ഷാപ്രവർത്തനം, കോലഞ്ചേരി, പൂതൃക്ക, കേരള വാർത്ത, അപകട വാർത്ത, ഫയർഫോഴ്സ്, വീട്ടമ്മ
