യുകെ മലയാളി നഴ്സിന് യുകെയിലെ റോയൽ കോളജ് ഓഫ് നഴ്സിങ് ‘റൈസിങ് സ്റ്റാർ’ പുരസ്കാരം
യുകെയിലെ ആരോഗ്യ മേഖലയിലേക്ക് മലയാളി സമുദായം വീണ്ടും ഒരു വൻ നേട്ടമാണ് സമ്മാനിച്ചിരിക്കുന്നത്.
ആലപ്പുഴ തിരുവമ്പാടി സ്വദേശിയായ നവീൻ ഹരികുമാർ, റോയൽ കോളജ് ഓഫ് നഴ്സിങ്ങ് (RCN) നൽകുന്ന അത്യുന്നതമായ റൈസിങ് സ്റ്റാർ (Rising Star Award) പുരസ്കാരത്തിന് അർഹനായി.
ആരോഗ്യ പരിചരണ മേഖലയിൽ പുതുമകളും നേതൃപാടവവും തെളിയിച്ചവർക്കു മാത്രമേ ലഭിക്കാറുള്ള ഈ ബഹുമതി, മലയാളികളുടെ ആഗോള സംഭാവനയെ മറ്റൊരിക്കൽ കൂടി തെളിയിച്ചു.
നോർത്ത് വെസ്റ്റ് ലണ്ടൻ എൻഎച്ച്എസ് ട്രസ്റ്റിന് കീഴിലുള്ള നോർത്ത്വിക്ക് പാർക്ക് ഹോസ്പിറ്റലിൽ ക്ലിനിക്കൽ പ്രാക്ടീസ് എജ്യുക്കേറ്ററായി പ്രവർത്തിക്കുന്ന നവീൻ, രോഗിപരിചരണം, പ്രൊഫഷണൽ പരിശീലനം, ആരോഗ്യനിലവാര മെച്ചപ്പെടുത്തൽ എന്നീ മേഖലകളിൽ ശ്രദ്ധേയമായ പ്രവർത്തനങ്ങളാണ് നടത്തിവരുന്നത്.
വെറും ആറു വർഷം മാത്രമാണ് അദ്ദേഹത്തിന് യുകെയിലെ സേവനപരിചയമായി ഉണ്ടായിട്ടുള്ളത് എങ്കിലും, ഇത്ര പെട്ടെന്നുണ്ടായ ഉയർച്ച മലയാളികൾക്ക് അഭിമാനമാകുന്നു.
RCN ലണ്ടൻ നൽകുന്ന ഈ അവാർഡ്, പ്രത്യേകിച്ച് ബ്ലാക്ക്, ഏഷ്യൻ, മറ്റ് ന്യൂനപക്ഷ വിഭാഗങ്ങളിൽപ്പെട്ട ആരോഗ്യപ്രവർത്തകരുടെ സംഭാവനകളെ ആദരിക്കുന്നതിലാണ് ശ്രദ്ധ കേന്ദ്രീകരിക്കുന്നത്.
രോഗിപരിചരണ നിലവാരം ഉയർത്തുന്നതിനുള്ള ശ്രമങ്ങളും നൂതന ആശയങ്ങളും കൈകാര്യം ചെയ്യാനുള്ള നേതൃത്വശേഷിയും ആണ് പുരസ്കാരത്തിന്റെ പ്രധാന മാനദണ്ഡങ്ങൾ.
നവീൻ ഈ മേഖലകളിൽ നൽകിയ സംഭാവനകൾ അദ്ദേഹത്തെ മറ്റു നൂറുകണക്കിന് നഴ്സിങ് പ്രൊഫഷണലുകളിൽ നിന്നും വേറിട്ടുനിർത്തി.
യുകെയിലെത്തുന്ന രാജ്യാന്തര നഴ്സുമാർ അഭിമുഖീകരിക്കുന്ന മാനസികപ്രശ്നങ്ങളും ഭാഷാപ്രശ്നങ്ങളും ജോലിസ്ഥലത്തെ പിന്തുണക്കുറവും തുടങ്ങിയ വെല്ലുവിളികളെ മനസ്സിലാക്കി, നവീൻ പ്രത്യേകമായി രൂപകൽപ്പന ചെയ്തതാണ് ‘IEN ഓറിയന്റേഷൻ ഫ്രെയിംവർക്ക്’.
യുകെ മലയാളി നഴ്സിന് യുകെയിലെ റോയൽ കോളജ് ഓഫ് നഴ്സിങ് ‘റൈസിങ് സ്റ്റാർ’ പുരസ്കാരം
Internationally Educated Nurses എന്ന ഈ വിഭാഗത്തിന് സമഗ്രമായ പരിശീലനം, മാർഗനിർദേശം, ജോലിസ്ഥലത്തിലേക്കുള്ള സജ്ജീകരണം എന്നിവ ആണ് ഈ പ്രോഗ്രാം ഉദ്ദേശിക്കുന്നത്.
ഈ പ്രോഗ്രാമിന്റെ ഫലമായി യൂണിറ്റിൽ ജോലിയിൽ പ്രവേശിച്ച 100 ശതമാനം രാജ്യാന്തര നഴ്സുമാരും ഇപ്പോഴും ജോലിയിൽ തുടർന്നിരിക്കുന്നത് വലിയ നേട്ടമായി വിലയിരുത്തപ്പെടുന്നു.
കൂടാതെ, നവീൻ നൽകിയ പിന്തുണയ്ക്കും പരിശീലനത്തിനും എല്ലാ നഴ്സുമാരും പരമാവധി റേറ്റിംഗ് നൽകിയതു അദ്ദേഹത്തിന്റെ പ്രൊഫഷണൽ നിലവാരം തെളിയിക്കുന്നു.
നവീൻ പ്രവർത്തിക്കുന്ന ടീം HSJ Awards 2025 ൽയും ശ്രദ്ധേയമായ നേട്ടങ്ങൾ കൈവരിച്ചു. പേഷ്യന്റ് സേഫ്റ്റി വിഭാഗത്തിൽ ടീം Highly Commended ആയി തിരഞ്ഞെടുത്തത് വലിയ അംഗീകാരമായി.
Nurse-led patient safety initiative എന്ന ഉപവിഭാഗത്തിൽ ടീം വിജയികളായതും അവരുടെ പ്രവർത്തനങ്ങൾക്ക് വലിയ പിന്തുണ ലഭിച്ചതിന്റെ തെളിവാണ്.
രോഗി സുരക്ഷ മെച്ചപ്പെടുത്തുന്നതിൽ നവീന്റെ പ്രാധാന്യപൂർണ്ണമായ പങ്ക് വിലയിരുത്തപ്പെട്ടതോടൊപ്പം അദ്ദേഹത്തിന്റെ നേതൃത്വശേഷി ആരോഗ്യ മേഖലയിലെ ഉയർന്ന നിലവാരത്തെ പ്രതിഫലിപ്പിച്ചു.
ക്ലിനിക്കൽ പ്രാക്ടീസ് എജ്യുക്കേറ്റർ എന്ന നിലയിലുപരി, നവീൻ ക്വാളിറ്റി ഇംപ്രൂവ്മെന്റ് കോച്ച്, പ്രൊഫഷണൽ നഴ്സ് അഡ്വക്കേറ്റ് എന്നീ നിലകളിലും സേവനം തുടരുന്നു.
യുകെയിലെ ചികിത്സാ നിലവാരവും രോഗി സുരക്ഷയും ഉയർത്തുന്നതിൽ അദ്ദേഹം നിർണായക പങ്കാണ് വഹിക്കുന്നത്.
ഇതുകൂടാതെ, യുകെയിലെ മലയാളികളുടെ ഏറ്റവും വലിയ സംഘടനകളിലൊന്നായ കൈരളി യുകെയുടെ ദേശീയ സെക്രട്ടറിയായും സാമൂഹിക-സാംസ്കാരിക രംഗത്തും അദ്ദേഹം സജീവമാണ്.
നവീൻ ഹരികുമാറിന്റെ വിദ്യാഭ്യാസയാത്രയും അതിശയിപ്പിക്കുന്നതാണ്. ആലപ്പുഴ ഗവൺമെന്റ് കോളേജ് ഓഫ് നഴ്സിങ്ങിൽ നിന്ന് ബിരുദം നേടിയ അദ്ദേഹം, ഇപ്പോൾ പ്രശസ്തമായ ക്വീൻ മേരി യൂണിവേഴ്സിറ്റി ഓഫ് ലണ്ടനിൽ ഹയർ എജ്യുക്കേഷനിൽ പി.ജി ഡിപ്ലോമ പഠനം തുടരുകയാണ്.
മാതാപിതാക്കൾ ഹരികുമാറും ഗീതയും, ഭാര്യ അഥീന ബി. ചന്ദ്രനും മകൾ ഇതൾ മേ നവീനും അദ്ദേഹത്തിന് വലിയ പിന്തുണയാണ്. വിദേശത്ത് തന്റേതായ വ്യക്തിമുദ്ര പതിപ്പിച്ച ഒരു മലയാളി നഴ്സിങ് പ്രൊഫഷണലിന്റെ ഉയർച്ച, ലോകമെമ്പാടുമുള്ള മലയാളികൾക്കും അഭിമാനിക്കാവുന്നൊരു നേട്ടമാണ്.
