കനത്ത മഴയിൽ മലവെള്ളം കുത്തിയൊലിച്ചെത്തിയതോടെ ഇടുക്കി തൊമ്മൻകുത്ത് വെള്ളച്ചാട്ടത്തിന് സമീപം ഞായറാഴ്ച കുടുങ്ങിയത് നൂറുകണക്കിന് സഞ്ചാരികൾ. തുടർന്ന് വനം വകുപ്പും, ടൂറിസ്റ്റ് ഗൈഡുകളും, നാട്ടുകാരും ചേർന്നാണ് ഇവരെ രക്ഷപെടുത്തിയത്. tourists trapped in island in thommankuth waterfall
ഞായറാഴ്ച വൈകീട്ട് തൊമ്മൻകുത്തിലെ ഏഴുനിലകുത്തിനടുത്താണ് സംഭവം. അവധി ദിമമായതിനാൽ ഏറെ സഞ്ചാരികൾ എത്തിയിരുന്നു. ഇവിടെ മഴയില്ലായിരുന്നെങ്കിൽ വൃഷ്ടി പ്രദേശങ്ങളായ വെൺമണി, പാൽക്കുളംമേട്, മനയത്തടം എന്നിവിടങ്ങളിൽ ശക്തമായ മഴപെയ്തതാണ് മലവെള്ളം കുതിച്ചെത്താൻ കാരണം.
ഈ സമയത്ത് വെള്ളച്ചാട്ടത്തിലെ തുരുത്തിൽ നിന്നവരാണ് പുറത്തെത്താൻ കഴിയാതെ കുടുങ്ങിയത്. തുരുത്തിന് ചുറ്റും വെള്ളം നിറഞ്ഞതോടെ വനം വകുപ്പും ഉദ്യോഗസ്ഥരും ചേർന്ന് സമീപത്തെ മരത്തിലൂടെ കയറി ഇവർക്ക് അരികിലെത്തി.
തുടർന്ന് കുടുങ്ങിയവരെ ഗോവണി വെച്ച് മരത്തിൽ കയറ്റിയാണ് പുറത്തെത്തിച്ചത്. വെള്ളച്ചാട്ടത്തിലെ നീരൊഴുക്ക് വർധിച്ചപ്പോൾ തന്നെ പലരും തുരുത്തിൽ നിന്നും പുറത്തെത്തിയതിനാൽ വൻ ദുരന്തമാണ് ഒഴിവായത്.
