തലയിണയ്ക്കടിയിൽ മരണദൂതനായി വെള്ളിക്കെട്ടൻ; ഉറക്കത്തിൽ പാമ്പുകടിയേറ്റ് എട്ടുവയസുകാരൻ മരിച്ചു; പത്തുവയസുകാരനായ സഹോദരൻ ഗുരുതരാവസ്ഥയിൽ
കോടാലി (തൃശൂർ): തലയിണയ്ക്കടിയിൽ ഒളിച്ചിരുന്ന വിഷപ്പാമ്പ് കടിച്ചതിനെ തുടർന്ന് ഉറങ്ങിക്കിടന്ന എട്ടുവയസുകാരൻ മരിച്ചു. കടിയേറ്റ സഹോദരൻ ഗുരുതരാവസ്ഥയിൽ ചികിത്സയിലാണ്. കടമ്പോട് കാവുങ്ങൽ സിൽജോ–ജോൺസി ദമ്പതികളുടെ ഇളയമകൻ ആൽജോയാണ് മരിച്ചത്. സഹോദരനായ അനോജ് (10) അങ്കമാലിയിലെ സ്വകാര്യ ആശുപത്രിയിൽ അടിയന്തര ശസ്ത്രക്രിയക്ക് വിധേയനായി. ആൽജോയുടെ കൈയിലും അനോജിന്റെ കാലിലുമാണ് പാമ്പ് കടിച്ചത്.
കുട്ടികൾ ഉറങ്ങിയിരുന്ന മുറിയിലെ തലയിണയ്ക്കടിയിൽ നിന്ന് വെള്ളിക്കെട്ടൻ ഇനത്തിൽപ്പെട്ട വിഷപ്പാമ്പിനെ പിന്നീട് കണ്ടെത്തി. പുലർച്ചെ രണ്ടോടെയാണ് കുട്ടികൾക്ക് അസ്വസ്ഥത അനുഭവപ്പെട്ടത്. തലേദിവസം വീടിനടുത്ത് നടന്ന വിരുന്നിൽ പങ്കെടുത്ത ശേഷം വീട്ടിലെത്തി ഉറങ്ങാൻ കിടക്കുന്നതിന് മുൻപ് അവർ ജ്യൂസ് കുടിച്ചിരുന്നു. ആദ്യം ഭക്ഷ്യവിഷബാധയാണെന്ന് കരുതിയ രക്ഷിതാക്കൾ ജീരകവെള്ളം നൽകി വീണ്ടും ഉറങ്ങാൻ കിടത്തി.
പുലർച്ചെ നാലോടെ ആൽജോയുടെ വായിൽ നിന്ന് നുരയും പതയും പുറത്തുവന്നതോടെ ഉടൻ സമീപത്തെ ആശുപത്രിയിലും തുടർന്ന് ചാലക്കുടിയിലെ സ്വകാര്യ ആശുപത്രിയിലും പ്രവേശിപ്പിച്ചു. പരിശോധനയിൽ പാമ്പുകടി സ്ഥിരീകരിക്കുകയും ശരീരത്തിൽ കടിയേറ്റ അടയാളങ്ങൾ കണ്ടെത്തുകയും ചെയ്തു. ചികിത്സ തുടരുന്നതിനിടെ ആൽജോ മരിച്ചു. തുടർന്ന് ഗുരുതരാവസ്ഥയിലായ അനോജിനെ അങ്കമാലിയിലെ സ്വകാര്യ ആശുപത്രിയിലേക്ക് മാറ്റി.
ആൽജോ രണ്ടാം ക്ലാസ് വിദ്യാർത്ഥിയും അനോജ് നാലാം ക്ലാസ് വിദ്യാർത്ഥിയുമാണ്. ഇരുവരും കടമ്പോട് എ.എൽ.പി സ്കൂളിലെ വിദ്യാർത്ഥികളാണ്. സഹോദരി: ഏയ്ഞ്ചൽ.
English Summary
An eight-year-old boy died after being bitten by a venomous snake that was hiding under his pillow in Thrissur, Kerala. His elder brother is in critical condition and undergoing treatment. The incident was initially mistaken for food poisoning, but later doctors confirmed snakebite. The snake was later found under the pillow. The younger boy succumbed despite treatment, while the elder is undergoing emergency care.
thrissur-snakebite-child-death-brother-critical
Thrissur News, Snake Bite, Kerala Incident, Child Death, Health Emergency, Kerala News, Accident News
