വിഷുക്കണി വിളക്കിൽ നിന്ന് തീപടർന്നു; വീട് ഭാഗീകമായി കത്തിനശിച്ചു!
Thiruvananthapuram: നഗരത്തിൽ വീട്ടിൽ തീപിടിത്തം. കുടപ്പനക്കുന്ന് തുമ്പിക്കോണം ലൈൻ സ്വദേശിനി ഗീതയുടെ വീട്ടിലാണ് ഇന്ന് പുലർച്ചെ അപകടം ഉണ്ടായത്.
വിഷുക്കണി വെച്ച നിലവിളക്കിൽ നിന്നാണ് തീ പടർന്നതെന്നാണ് പ്രാഥമിക വിവരം. കണി കാണാനായി പുലർച്ചെ എഴുന്നേറ്റ വീട്ടുകാർ വിളക്കുകൾ കൊളുത്തിയ ശേഷം വീണ്ടും കിടന്നുറങ്ങുകയായിരുന്നു. തുടർന്ന് വിളക്കിൽ നിന്ന് തീ പടർന്ന് വീടിന്റെ ഹാളിലും ഉപകരണങ്ങളിലും വ്യാപിച്ചു.
വീട്ടുകാരുടെ കരച്ചിലും ബഹളവും കേട്ട് എത്തിയ നാട്ടുകാർ ജനാല വഴി വെള്ളം ഒഴിച്ച് തീ നിയന്ത്രിക്കാൻ ശ്രമിച്ചു. പിന്നാലെ വിവരം അറിഞ്ഞ് അഗ്നിരക്ഷാസേന എത്തി തീ പൂർണമായി അണച്ചു.
പുക ശ്വസിച്ചതിനെ തുടർന്ന് ശ്വാസതടസ്സവും മറ്റ് ശാരീരിക ബുദ്ധിമുട്ടുകളും ഉണ്ടായ കുടുംബാംഗങ്ങളെ സ്വകാര്യ ആശുപത്രിയിൽ പ്രവേശിപ്പിച്ചു.
English Summary
A house caught fire in Thiruvananthapuram early morning after flames spread from a Vishu Kani lamp. The incident occurred at a residence in Kudappanakunnu.
