ആ കുറവും നികത്തി; വന്ദേ ഭാരത് ട്രെയിനുകൾ ഇനി വേറെ ലെവൽ; ഇതിപ്പോ ട്രെയിനല്ല ഓടുന്ന വിമാനം
രാജ്യത്തെ റെയിൽവേ യാത്രയുടെ മുഖച്ഛായ തന്നെ മാറ്റിമറിച്ച വന്ദേ ഭാരത് ട്രെയിനുകൾ ഇനി ദീർഘദൂര യാത്രകളിലും പുതിയ അനുഭവം സമ്മാനിക്കാൻ ഒരുങ്ങുന്നു.
വേഗതയും ആധുനിക സൗകര്യങ്ങളും കൊണ്ടു ശ്രദ്ധ നേടിയ വന്ദേ ഭാരത് ശ്രേണിയിൽ ഇതുവരെ ഇല്ലാതിരുന്ന സ്ലീപ്പർ സംവിധാനം അവതരിപ്പിച്ചിരിക്കുകയാണ് ഇന്ത്യൻ റെയിൽവേ.
ഗുവാഹത്തി–കൊൽക്കത്ത റൂട്ടിലാണ് ഇന്ത്യയിലെ ആദ്യ സ്ലീപ്പർ വന്ദേ ഭാരത് ട്രെയിൻ സർവീസ് ആരംഭിക്കുന്നത്.
ദീർഘദൂര യാത്രകളുടെ നിലവിലെ അനുഭവം തന്നെ മാറ്റിമറിക്കുന്ന തരത്തിലുള്ള സൗകര്യങ്ങളാണ് ഈ ട്രെയിനിൽ ഒരുക്കിയിരിക്കുന്നതെന്ന് റെയിൽവേ മന്ത്രി അശ്വിനി വൈഷ്ണവ് വ്യക്തമാക്കി.
ഈ പ്രഖ്യാപനത്തോടെയാണ് സ്ലീപ്പർ വന്ദേ ഭാരത് ട്രെയിനുകൾ രാജ്യവ്യാപകമായി ചർച്ചയാകുന്നത്.
സാധാരണ ട്രെയിനുകളെക്കാൾ വിമാനത്തിനുള്ളിലേതുപോലുള്ള ആധുനിക ഡിസൈനും സൗകര്യങ്ങളുമാണ് ഈ ട്രെയിനിന്റെ പ്രത്യേകത. ഉൾവശം കൂടുതൽ വിശാലവും ആകർഷകവുമാണ്.
യാത്രക്കാർക്ക് സുഖകരമായ ഉറക്കം ഉറപ്പാക്കാൻ കൂടുതൽ കുഷൻ നൽകിയ ബെർത്തുകളാണ് ഒരുക്കിയിരിക്കുന്നത്. മുകളിലത്തെ ബെർത്തിലേക്ക് കുട്ടികൾക്കും മുതിർന്നവർക്കും എളുപ്പത്തിൽ കയറാൻ കഴിയുന്ന രീതിയിലാണ് ക്രമീകരണം.
180 കിലോമീറ്റർ വേഗതയിൽ സഞ്ചരിക്കുമ്പോഴും ട്രെയിനിനുള്ളിൽ കുലുക്കമോ ശബ്ദമോ അനുഭവപ്പെടില്ല. ട്രെയിൻ കൂട്ടിയിടി ഒഴിവാക്കുന്നതിനുള്ള ഇന്ത്യയുടെ തദ്ദേശീയ സുരക്ഷാ സംവിധാനമായ ‘കവച്’ ഈ ട്രെയിനിലുണ്ട്.
കൂടാതെ തീപിടിത്തം കണ്ടെത്താനുള്ള സെൻസറുകളും എല്ലാ കോച്ചുകളിലും സിസിടിവി ക്യാമറകളും സ്ഥാപിച്ചിട്ടുണ്ട്.
വിമാനങ്ങളിൽ ഉപയോഗിക്കുന്ന ബയോ-വാക്വം ടോയ്ലറ്റുകളാണ് സ്ലീപ്പർ വന്ദേ ഭാരതിൽ ഉൾപ്പെടുത്തിയിരിക്കുന്നത്. ഇത് കൂടുതൽ വൃത്തിയും ഗന്ധരഹിതവുമായ അനുഭവം നൽകും.
ഫസ്റ്റ് എസി കോച്ചുകളിൽ കുളിക്കാൻ ഷവർ സൗകര്യവും ലഭ്യമാകും. സ്റ്റേഷനിലെത്തുമ്പോൾ ട്രെയിനിന്റെ പ്രധാന വാതിലുകൾ സ്വയം തുറക്കുകയും അടയുകയും ചെയ്യും. കോച്ചുകൾ തമ്മിൽ ബന്ധിപ്പിക്കുന്ന വാതിലുകളും സെൻസർ സംവിധാനത്തിലൂടെയാണ് പ്രവർത്തിക്കുക.
ചെറിയ കുട്ടികളുമായി യാത്ര ചെയ്യുന്ന അമ്മമാർക്ക് സഹായകരമാകുന്ന ബേബി കെയർ ഏരിയയും ട്രെയിനിലുണ്ട്. ഓരോ യാത്രക്കാരനും ഉപയോഗിക്കാവുന്ന റീഡിംഗ് ലൈറ്റുകൾ, എല്ലാ ബെർത്തുകൾക്കടുത്തും ഫോൺ ചാർജിംഗ് സൗകര്യങ്ങൾ എന്നിവയും ഒരുക്കിയിട്ടുണ്ട്.
ദീർഘദൂര യാത്രകൾക്കായി പ്രത്യേകമായി രൂപകൽപ്പന ചെയ്ത ഈ ട്രെയിനിൽ 16 കോച്ചുകളാണുള്ളത്. ആകെ 823 യാത്രക്കാർക്ക് സഞ്ചരിക്കാം.
ടിക്കറ്റ് നിരക്ക് എസി 3 ടയറിന് ₹2,300, എസി 2 ടയറിന് ₹3,000, എസി ഫസ്റ്റ് ക്ലാസിന് ₹3,600 എന്നിങ്ങനെയാണ്.
അടുത്ത ആറുമാസത്തിനുള്ളിൽ എട്ട് സ്ലീപ്പർ വന്ദേ ഭാരത് ട്രെയിനുകൾ കൂടി പുറത്തിറക്കാനാണ് റെയിൽവേയുടെ പദ്ധതി. ഈ വർഷം അവസാനത്തോടെ എണ്ണം 12 ആയി ഉയർത്തുമെന്നും സൂചനയുണ്ട്.
English Summary
Indian Railways has introduced its first-ever sleeper version of the Vande Bharat train on the Guwahati–Kolkata route. Designed for long-distance travel, the train offers aircraft-like interiors, enhanced sleeping comfort, advanced safety systems, and modern amenities. More sleeper Vande Bharat trains are expected to be launched across the country in the coming months.
sleeper-vande-bharat-first-long-distance-train-india
Vande Bharat, Sleeper Vande Bharat, Indian Railways, long distance trains, railway modernization, Ashwini Vaishnaw, train travel India
