പൊലീസിനെ അധിക്ഷേപിച്ച പോലീസുകാരനെ പിരിച്ചുവിട്ടു
പത്തനംതിട്ട: സമൂഹമാധ്യമങ്ങളിൽ പൊലീസിനെ അധിക്ഷേപിച്ചതിനെ തുടർന്ന് അച്ചടക്കനടപടിയിൽ സസ്പെൻഷനിലായിരുന്ന സീനിയർ സിവിൽ പൊലീസ് ഓഫീസർ യു. ഉമേഷ് വള്ളിക്കുന്നിനെ സർവീസിൽ നിന്ന് പിരിച്ചുവിട്ടു.
ജോലിയിൽ തുടരാൻ അനുവദിച്ചാൽ പൊലീസിന്റെ മനോവീര്യത്തിനും പൊതുജനങ്ങളിലുളള പ്രതിച്ഛായയ്ക്കും ഗുരുതരമായ തിരിച്ചടിയുണ്ടാകുമെന്ന് ഉത്തരവിൽ വ്യക്തമാക്കുന്നു.
ആറന്മുള പൊലീസ് സ്റ്റേഷനിൽ സേവനമനുഷ്ഠിക്കുമ്പോൾ, കഴിഞ്ഞ വർഷം മേയ് മുതൽ ഉമേഷ് സസ്പെൻഷനിലായിരുന്നു.
സസ്പെൻഷനിലായ ശേഷവും സമൂഹമാധ്യമങ്ങളിലൂടെ പൊലീസിനെതിരായ വിമർശനങ്ങളും പരിഹാസങ്ങളും തുടരുകയായിരുന്നുവെന്ന് അന്വേഷണത്തിൽ കണ്ടെത്തി.
കാരണം കാണിക്കൽ നോട്ടീസിന്റെ ചിത്രം സമൂഹമാധ്യമങ്ങളിൽ പങ്കുവെച്ചതും, സേനയെ അപമാനിക്കുന്ന രീതിയിൽ മറുപടി നൽകിയതുമാണ് പിരിച്ചുവിടലിന് കാരണമായതെന്ന് ജില്ലാ പൊലീസ് മേധാവി ആർ. ആനന്ദ് പുറത്തിറക്കിയ ഉത്തരവിൽ പറയുന്നു.
അച്ചടക്കം പാലിക്കാത്തത്, മേലുദ്യോഗസ്ഥരെയും സർക്കാരിനെയും അവഹേളിക്കുന്ന പ്രതികരണങ്ങൾ നടത്തിയത്, മൊഴി ശേഖരണത്തിന് ഹാജരാകാതിരുന്നത്, പ്രതികളെ ന്യായീകരിക്കുന്ന സമീപനം സ്വീകരിച്ചത് തുടങ്ങിയ ഗുരുതര വീഴ്ചകളും ഉത്തരവിൽ ചൂണ്ടിക്കാട്ടുന്നു.
കോഴിക്കോട് കൊയിലാണ്ടി സ്വദേശിയായ ഉമേഷ് 2003ലാണ് സർവീസിൽ പ്രവേശിച്ചത്. 2017 മുതൽ 2022 വരെ കോഴിക്കോട് ജില്ലയിൽ സേവനമനുഷ്ഠിക്കുമ്പോൾ 11 തവണ അച്ചടക്കനടപടി നേരിട്ടിട്ടുണ്ടെന്നും, സർവീസ് രേഖകൾ പരിശോധിക്കുമ്പോൾ ജോലിയിൽ തുടരാൻ അയോഗ്യനാണെന്നും ഉത്തരവിൽ വ്യക്തമാക്കുന്നു.
തീരുമാനത്തിനെതിരെ ഡി.ഐ.ജിക്ക് അപ്പീൽ നൽകുമെന്നും, അത് തള്ളിയാൽ കോടതിയെ സമീപിക്കുമെന്നും ഉമേഷ് വള്ളിക്കുന്ന് പ്രതികരിച്ചു.
English Summary
A senior civil police officer, U. Umesh Vallikkunnu, who was under suspension for making derogatory remarks against the police on social media, has been dismissed from service in Pathanamthitta. Authorities stated that allowing him to continue would damage the morale and image of the police force. Despite suspension, he allegedly continued posting offensive content online. His past service record also showed multiple disciplinary actions. Umesh has announced plans to appeal the decision.
senior-civil-police-officer-dismissed-for-social-media-posts
Police, Suspension, Dismissal, Social Media, Disciplinary Action, Pathanamthitta, Kerala Police
