സ്നേഹത്തിന് രണ്ടാം ജന്മം! സൈനയും കശ്യപും വീണ്ടും ഒന്നിച്ചു
ന്യൂഡൽഹി: മുൻ ലോക ഒന്നാം നമ്പർ ബാഡ്മിന്റൻ താരം സൈന നെഹ്വാൾ, ഭർത്താവും മുൻ താരവുമായ പി. കശ്യപുമായി വീണ്ടും ഒന്നിച്ചെന്ന വിവരം സ്ഥിരീകരിച്ചു. വേർപിരിയലിന് പിന്നാലെ ഇരുവരും വീണ്ടും ഒന്നിക്കുന്നതിനെക്കുറിച്ച് എൻഡിടിവിക്ക് നൽകിയ അഭിമുഖത്തിലാണ് സൈന തുറന്നു പറഞ്ഞത്.
2025 ജൂലൈയിൽ ഏഴുവർഷത്തെ ദാമ്പത്യജീവിതം അവസാനിപ്പിക്കുന്നതായി സൈന അറിയിച്ചിരുന്നു. എന്നാൽ ആഴ്ചകൾക്കുശേഷം തന്നെ ബന്ധം പുനഃസ്ഥാപിക്കുന്നതിനുള്ള സൂചനകൾ പുറത്തുവന്നിരുന്നു. ഇപ്പോൾ ആ വിവരം ഔദ്യോഗികമായി സ്ഥിരീകരിച്ചിരിക്കുകയാണ്.
“വിവാഹം ഒരു രേഖ മാത്രമല്ല; അത് മനസ്സിലാക്കലിന്റെയും ക്ഷമയുടെയും യാത്രയാണ്. ഞങ്ങളുടെ ബന്ധത്തിൽ ആശയവിനിമയത്തിന്റെ പ്രാധാന്യം ഞങ്ങൾ തിരിച്ചറിഞ്ഞു,” സൈന പറഞ്ഞു. ബന്ധങ്ങൾ വാദത്തിൽ ജയിക്കലല്ല, ഒരുമിച്ച് വളരലാണെന്നും അവർ കൂട്ടിച്ചേർത്തു.
ഇഗോയും തെറ്റിദ്ധാരണകളും ബന്ധങ്ങളെ ബാധിക്കാമെന്നും, പരസ്പരം ബഹുമാനവും പിന്തുണയും നൽകുന്നതാണ് പ്രധാനമെന്നും സൈന ചൂണ്ടിക്കാട്ടി. വ്യക്തിഗത സ്വപ്നങ്ങൾക്കും ഇടം നൽകണമെന്നും അവർ പറഞ്ഞു.
മാതൃത്വം വ്യക്തിപരമായ തീരുമാനമാണെന്നും സമൂഹത്തിന്റെ സമ്മർദ്ദങ്ങൾക്ക് വഴങ്ങാതെ സ്ത്രീകൾക്ക് സ്വന്തം സമയത്ത് തീരുമാനങ്ങൾ എടുക്കാൻ സ്വാതന്ത്ര്യമുണ്ടാകണമെന്നും സൈന അഭിപ്രായപ്പെട്ടു.
2018 ഡിസംബറിൽ വിവാഹിതരായ സൈനയും കശ്യപും പത്തു വർഷത്തെ പ്രണയത്തിനുശേഷമാണ് വിവാഹിതരായത്. കായികരംഗത്ത് ഇരുവരും ശ്രദ്ധേയ നേട്ടങ്ങൾ സ്വന്തമാക്കിയ താരങ്ങളാണ്.
English Summary
Badminton star Saina Nehwal confirmed that she has reunited with her husband Parupalli Kashyap after a brief separation. She emphasized the importance of communication, patience, and mutual respect in relationships, calling marriage a journey of understanding and growth.
