ഐപിഎൽ പൂരം നാളെ മുതൽ! ഇത്തവണ കളി മാറും, കളം നിറയും!
ബെംഗളൂരു: ഇന്ത്യൻ പ്രീമിയർ ലീഗ് (ഐപിഎൽ) 19-ാം എഡിഷൻ ആവേശകരമായ തുടക്കത്തിനൊരുങ്ങുന്നു. ശനിയാഴ്ച ബെംഗളൂരുവിലെ ചിന്നസ്വാമി സ്റ്റേഡിയത്തിൽ നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബെംഗളൂരു (RCB)യും സൺറൈസേഴ്സ് ഹൈദരാബാദ് (SRH)യും ഏറ്റുമുട്ടുന്നതോടെയാണ് ടൂർണമെന്റിന് തുടക്കം കുറിക്കുന്നത്. രാത്രി 7.30-നാണ് മത്സരം.
ഇത്തവണയും ലോക ക്രിക്കറ്റിലെ വമ്പൻ താരനിരയാണ് ഐപിഎലിന്റെ ആകർഷണം. മഹേന്ദ്രസിംഗ് ധോനി, വിരാട് കോലി, രോഹിത് ശർമ, സഞ്ജു സാംസൺ, ശുഭ്മൻ ഗിൽ, ജസ്പ്രീത് ബുംറ, ഋഷഭ് പന്ത് തുടങ്ങി ഇന്ത്യൻ താരങ്ങളും, ജോസ് ബട്ട്ലർ, റാഷീദ് ഖാൻ, പാറ്റ് കമിൻസ്, മിച്ചൽ സ്റ്റാർക്ക്, ട്രാവിസ് ഹെഡ് എന്നിവരുള്പ്പെടെയുള്ള വിദേശ താരങ്ങളും സീസണിനെ ആവേശകരമാക്കും.
രണ്ടാം ഘട്ട ഷെഡ്യൂൾ
ഐപിഎലിന്റെ രണ്ടാംഘട്ട മത്സരക്രമവും പുറത്തുവന്നു. ഏപ്രിൽ 13 മുതൽ മേയ് 24 വരെ 50 മത്സരങ്ങളാണ് വിവിധ വേദികളിലായി നടക്കുക. ആദ്യഘട്ടത്തിൽ 20 മത്സരങ്ങളാണ് പ്രഖ്യാപിച്ചിരുന്നത്. മൊത്തം 84 മത്സരങ്ങളാണ് സീസണിൽ.
പോയിന്റ് പട്ടികയിലെ ആദ്യ രണ്ട് ടീമുകൾ ക്വാളിഫയർ ഒന്നിലേക്ക് കടക്കും. മൂന്നും നാലും സ്ഥാനങ്ങളിലെ ടീമുകൾ എലിമിനേറ്ററിലേക്ക് യോഗ്യത നേടും.
ഉദ്ഘാടനച്ചടങ്ങില്ല
ഈ സീസണിൽ പതിവ് ഉദ്ഘാടനച്ചടങ്ങ് ഉണ്ടായിരിക്കില്ല. കഴിഞ്ഞ സീസണിൽ ആർസിബിയുടെ വിജയാഘോഷത്തിനിടെ ഉണ്ടായ ദുരന്തത്തിൽ മരിച്ചവർക്കുള്ള ആദരസൂചകമായാണ് ഈ തീരുമാനം. എന്നാൽ മേയ് 31-ന് നടക്കുന്ന ഫൈനലിനോടനുബന്ധിച്ച് വമ്പൻ പരിപാടി സംഘടിപ്പിക്കാനാണ് ബിസിസിഐയുടെ പദ്ധതി.
ശ്രദ്ധാകേന്ദ്രം: സഞ്ജു & ധോനി
ഇത്തവണത്തെ ഐപിഎലിൽ പ്രധാന ശ്രദ്ധ മലയാളി താരം സഞ്ജു സാംസണിനും മഹേന്ദ്രസിംഗ് ധോനിയുമാണ്. ചെന്നൈ സൂപ്പർകിങ്സിനായി സഞ്ജു ആദ്യമായി കളിക്കുന്ന സീസൺ കൂടിയാണിത്.
ക്യാപ്റ്റൻ റുതുരാജ് ഗൈക്വാഡിനൊപ്പം സഞ്ജു ഓപ്പണിംഗ് ഇറങ്ങും. സഞ്ജുവിന്റെ പ്രകടനം ടീമിന്റെ ഭാവി നിർണയിക്കാൻ നിർണായകമാകും. ധോനി സീസൺ അവസാനം വിരമിക്കുമെന്ന അഭ്യൂഹങ്ങളും ശക്തമാണ്. സഞ്ജുവിനെ ഭാവിയിലെ നായകനായി ടീം മാനേജ്മെന്റ് കാണുന്നുവെന്നാണ് റിപ്പോർട്ടുകൾ.
English Summary
IPL 2026 kicks off with Royal Challengers Bengaluru facing Sunrisers Hyderabad in the opening match. The season features top Indian and international stars. No opening ceremony will be held this time, while focus is on Sanju Samson’s debut for CSK and MS Dhoni’s possible retirement.
