വഴക്ക് തീർക്കാനെത്തി, ഒടുവിൽ കുത്തേറ്റു! മ്യൂസിയം സ്റ്റേഷനിലെ സിപിഒയ്ക്ക് പരിക്ക്; എ.ആർ ക്യാമ്പിലെ പൊലീസുകാരൻ പിടിയിൽ
തിരുവനന്തപുരം: കുടുംബ വഴക്ക് പരിഹരിക്കാൻ എത്തിയ പൊലീസുകാരനെ മറ്റൊരു പൊലീസ് ഉദ്യോഗസ്ഥൻ കുത്തിപ്പരിക്കേൽപ്പിച്ചു. മ്യൂസിയം പൊലീസ് സ്റ്റേഷനിലെ സിപിഒ അൻസാറിനാണ് ആക്രമണത്തിൽ പരിക്കേറ്റത്. സംഭവത്തിൽ എ.ആർ ക്യാമ്പിലെ പൊലീസുകാരനായ അനീഷിനെ മ്യൂസിയം പൊലീസ് കസ്റ്റഡിയിലെടുത്തു.
തിരുവനന്തപുരം വികാസ് ഭവൻ ക്വാർട്ടേഴ്സിൽ ഇന്നലെ വൈകിട്ടായിരുന്നു സംഭവം. അയൽവാസിയായ അനീഷിന്റെ വീട്ടിൽ ഉണ്ടായ കുടുംബവഴക്ക് പരിഹരിക്കാനാണ് അൻസാർ എത്തിയത്. സംസാരത്തിനിടെയുണ്ടായ തർക്കം വാക്കേറ്റത്തിലേക്കും തുടർന്ന് ആക്രമണത്തിലേക്കും നീങ്ങുകയായിരുന്നുവെന്നാണ് വിവരം.
കത്തിയുപയോഗിച്ചാണ് ആക്രമണം നടത്തിയതെന്ന് പൊലീസ് പറഞ്ഞു. പരിക്കേറ്റ അൻസാറിനെ ഉടൻ ആശുപത്രിയിലെത്തിച്ചു. ആരോഗ്യനില സംബന്ധിച്ച കൂടുതൽ വിവരങ്ങൾ പുറത്തുവന്നിട്ടില്ല.
സംഭവത്തിൽ മ്യൂസിയം പൊലീസ് അന്വേഷണം ആരംഭിച്ചു. ആക്രമണത്തിനുള്ള കാരണം ഉൾപ്പെടെ വിശദമായി പരിശോധിക്കുകയാണെന്ന് പൊലീസ് അറിയിച്ചു.
English Summary
A police officer was stabbed by another policeman while trying to mediate a family dispute in Thiruvananthapuram. The injured officer, CPO Ansar of Museum Police Station, was attacked by AR Camp policeman Aneesh at Vikas Bhavan quarters on Friday evening. Aneesh has been taken into custody, and police have launched an investigation into the incident.
