ഇന്ധനവില കുതിക്കുന്നു! നയാര പെട്രോളിന് ₹5.30 കൂട്ടി; വരാനിരിക്കുന്നത് വിലക്കയറ്റത്തിന്റെ നാളുകളോ?
രാജ്യത്ത് ഇന്ധനവിലയിൽ വീണ്ടും വർധന. സ്വകാര്യ മേഖലയിലെ പ്രധാന ഇന്ധന വിതരണക്കാരായ നയാര എനർജി പെട്രോളിന് ലിറ്ററിന് ₹5.30യും ഡീസലിന് ₹3യും കൂട്ടിയതായി പ്രഖ്യാപിച്ചു. പൊതുമേഖലാ എണ്ണക്കമ്പനികളായ ഐഒസി, ബിപിസിഎൽ, എച്ച്പിസിഎൽ എന്നിവ വിലയിൽ മാറ്റമില്ലാതെ തുടരുന്ന സാഹചര്യത്തിലാണ് നയാരയുടെ ഈ തീരുമാനം.
അന്താരാഷ്ട്ര വിപണിയിൽ അസംസ്കൃത എണ്ണവില കഴിഞ്ഞ ആഴ്ചകളിൽ 40 മുതൽ 50 ശതമാനം വരെ ഉയർന്നതാണ് വില വർധനയ്ക്ക് പ്രധാന കാരണം. ഈ സാഹചര്യത്തിലും ഇന്ത്യ ഉൾപ്പെടെ ചില രാജ്യങ്ങൾ ഉപഭോക്താക്കൾക്ക് ആശ്വാസം നൽകാൻ വില വർധന ഒഴിവാക്കിയിരുന്നു. എന്നാൽ ആഗോള സമ്മർദ്ദങ്ങളെ തുടർന്ന് നയാരയ്ക്ക് വില കൂട്ടേണ്ടിവന്നുവെന്നാണ് വിലയിരുത്തൽ.
ഇതിനൊപ്പം, ഗുജറാത്തിലെ വാടിനാർ റിഫൈനറി ഏപ്രിൽ മുതൽ 35 ദിവസത്തേക്ക് അറ്റകുറ്റപ്പണികൾക്കായി അടച്ചിടാനാണ് നയാരയുടെ തീരുമാനം. ഇതുമൂലം വരും ദിവസങ്ങളിൽ ആഭ്യന്തര വിപണിയിൽ ഇന്ധന ലഭ്യതയ്ക്ക് സമ്മർദ്ദം ഉയരാനിടയുണ്ടെന്നാണ് ആശങ്ക.
ഇന്ധനവില വർധന ഗതാഗത ചെലവും സാധനവിലയും ഉയർത്താൻ സാധ്യതയുള്ളതിനാൽ സാധാരണ ജനങ്ങൾക്ക് കൂടുതൽ സാമ്പത്തിക ഭാരം ഉണ്ടാകുമെന്നാണ് വിലയിരുത്തൽ.
English Summary
Nayara Energy has increased fuel prices, raising petrol by ₹5.30 per litre and diesel by ₹3. The move comes amid rising global crude oil prices, which have surged by 40–50% in recent weeks. While public sector oil companies have not revised rates, Nayara cited global pressures for the hike. Additionally, its Vadinar refinery in Gujarat will undergo a 35-day maintenance shutdown, raising concerns about fuel supply.
