ക്രൂരത: 4 വയസുകാരനെ നിലത്തടിച്ച് യുവാവ്; നില ഗുരുതരം
മുംബൈ: പിതാവുമായുണ്ടായ തർക്കത്തെ തുടർന്ന് നാല് വയസുകാരനെ കാലിൽ തൂക്കിയെടുത്ത് നിലത്തടിച്ച സംഭവത്തിൽ യുവാവ് അറസ്റ്റിൽ. മഹാരാഷ്ട്രയിലെ വസായി പ്രദേശത്തെ ഹൗസിങ് സൊസൈറ്റിയിലാണ് സംഭവം നടന്നത്.
പ്രതിയായ സന്ദീപ് പവാർ കുട്ടിയായ വിഗ്നേഷിനെ ക്രൂരമായി ആക്രമിക്കുകയായിരുന്നു. മറ്റ് കുട്ടികളോടൊപ്പം റോഡരികിൽ നിർത്തിയിട്ടിരുന്ന ഓട്ടോറിക്ഷയിൽ കളിക്കുന്നതിനിടെയാണ് സംഭവം ഉണ്ടായത്.
തർക്കത്തിനിടെ കുട്ടിയെ ഓട്ടോറിക്ഷയിൽ നിന്ന് കാലിൽ തൂക്കിയെടുത്ത് റോഡിന്റെ മധ്യത്തിലേക്ക് കൊണ്ടുവന്ന് വായുവിലേക്കുയർത്തി നിലത്തടിക്കുകയായിരുന്നു. തുടർന്ന് കുട്ടിയെ സമീപത്തെ കെട്ടിടത്തിലേക്ക് കൊണ്ടുപോയി വീണ്ടും ആക്രമിച്ചതായും റിപ്പോർട്ടുണ്ട്.
ഗുരുതരമായി പരിക്കേറ്റ കുട്ടിയെ മീരാ റോഡിലെ ആശുപത്രിയിൽ പ്രവേശിപ്പിച്ചു. നിലവിൽ ഐസിയുവിൽ ചികിത്സയിൽ കഴിയുന്ന കുട്ടിയുടെ നില അതീവ ഗുരുതരമാണെന്ന് ആശുപത്രി അധികൃതർ അറിയിച്ചു.
സംഭവത്തിന്റെ സിസിടിവി ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിച്ചതോടെ പ്രദേശത്ത് പ്രതിഷേധം ശക്തമായി. പൊലീസ് പ്രതിയെ അറസ്റ്റ് ചെയ്ത് വിവിധ വകുപ്പുകൾ ചുമത്തി കേസ് രജിസ്റ്റർ ചെയ്തിട്ടുണ്ട്.
