ദുബായ്:പശ്ചിമേഷ്യയിൽ യുദ്ധമേഘങ്ങൾ പടരുകയും ആഗോള സാമ്പത്തിക വിപണി അനിശ്ചിതത്വത്തിലാവുകയും ചെയ്യുമ്പോൾ,
പതിനായിരക്കണക്കിന് പ്രവാസി കുടുംബങ്ങൾക്ക് ആശ്വാസത്തിന്റെ തണലുമായി ലുലു ഗ്രൂപ്പ് ചെയർമാൻ എം.എ. യൂസഫലി.
മേഖലയിലെ സംഘർഷ സാഹചര്യങ്ങൾക്കിടയിലും ജീവനക്കാരുടെ ശമ്പളം കൃത്യസമയത്ത് ഉറപ്പാക്കുമെന്ന അദ്ദേഹത്തിന്റെ പ്രഖ്യാപനം പ്രവാസ ലോകത്തിന് വലിയൊരു കരുത്താവുകയാണ്.
ബാങ്ക് വായ്പ എടുത്താണെങ്കിലും ശമ്പളം നൽകും; പ്രതിസന്ധിയിൽ ജീവനക്കാരെ കൈവിടില്ലെന്ന് യൂസഫലി
ഫുജൈറയിൽ മാധ്യമപ്രവർത്തകരോട് സംസാരിക്കവെയാണ് ലുലു ഗ്രൂപ്പ് ജീവനക്കാർക്ക് വലിയ ആത്മവിശ്വാസം നൽകുന്ന പ്രഖ്യാപനം അദ്ദേഹം നടത്തിയത്.
കമ്പനിയുടെ കൈവശം പണമില്ലാത്ത സാഹചര്യം വന്നാൽ പോലും ബാങ്ക് വായ്പ എടുത്താണെങ്കിലും ജീവനക്കാരുടെ ശമ്പളം മുടങ്ങാതെ നൽകുമെന്ന് അദ്ദേഹം ഉറപ്പിച്ചു പറഞ്ഞു.
ഒരു ബിസിനസ് സ്ഥാപനം ലാഭത്തിൽ മാത്രം കണ്ണുവെച്ചാകരുത് പ്രവർത്തിക്കേണ്ടതെന്നും,
പ്രതിസന്ധി ഘട്ടങ്ങളിൽ പതറാതെ നിൽക്കുക എന്നത് സ്ഥാപനത്തിന്റെ കടമയും ബാധ്യതയുമാണെന്നും യൂസഫലി ഓർമിപ്പിച്ചു.
കോവിഡ് കാലത്തെ സമാനതകളില്ലാത്ത കാരുണ്യം; ചരിത്രം ആവർത്തിക്കുമെന്ന് ലുലു ഗ്രൂപ്പ്
ലോകം മുഴുവൻ സാമ്പത്തികമായി തകർന്നുപോയ കോവിഡ് കാലത്തെ ലുലുവിന്റെ മാതൃക അദ്ദേഹം വാർത്താസമ്മേളനത്തിൽ ചൂണ്ടിക്കാട്ടി.
അന്ന് പല വമ്പൻ കോർപ്പറേറ്റ് കമ്പനികളും ശമ്പളം വെട്ടിക്കുറയ്ക്കുകയോ ലേ-ഓഫ് പ്രഖ്യാപിക്കുകയോ ചെയ്തപ്പോൾ,
ലുലു ഗ്രൂപ്പ് ഒരു രൂപ പോലും കുറയ്ക്കാതെ ജീവനക്കാരെ ചേർത്തുപിടിച്ചിരുന്നു.
അന്നും ബാങ്ക് വായ്പയെടുത്താണ് ശമ്പളം വിതരണം ചെയ്തതെന്നും ആ ചരിത്രം വരുംകാലത്തെ ഏത് പ്രതിസന്ധിയിലും തുടരുമെന്നും അദ്ദേഹം വ്യക്തമാക്കി.
നാട്ടിലെ കുടുംബങ്ങളുടെ കണ്ണീരൊപ്പണം; ഓരോ ജീവനക്കാരന്റെയും സുരക്ഷ കമ്പനിയുടെ ഉത്തരവാദിത്തം
“ഗൾഫിൽ ജോലി ചെയ്യുന്ന ഓരോ ജീവനക്കാരന്റെയും നാട്ടിലെ കുടുംബങ്ങൾ കാത്തിരിക്കുന്നത് മാസാമാസം ഇവിടെ നിന്ന് അയക്കുന്ന തുകയിലാണ്.
അവരുടെ പട്ടിണി മാറ്റേണ്ടത് നമ്മുടെ ഉത്തരവാദിത്തമാണ്,” എന്ന യൂസഫലിയുടെ വാക്കുകൾ ലക്ഷക്കണക്കിന് പ്രവാസി കുടുംബങ്ങളുടെ ആശങ്കയകറ്റുന്നതാണ്.
ഉപഭോക്താക്കൾക്ക് തടസ്സമില്ലാതെ സാധനങ്ങൾ എത്തിക്കുന്നതിനോടൊപ്പം തന്നെ ജീവനക്കാരുടെ ക്ഷേമത്തിന് മുൻഗണന നൽകുമെന്നും ലുലു ഗ്രൂപ്പ് അറിയിച്ചു.
English Summary
Lulu Group Chairman M.A. Yusuff Ali has announced that all employees will receive their salaries on time despite the ongoing tensions in the Middle East. Speaking in Fujairah, he emphasized that the group is committed to the welfare of its staff and their families. He stated that the company is prepared to take bank loans if necessary to ensure that salaries are not delayed, recalling a similar commitment made during the COVID-19 pandemic. He noted that the livelihoods of thousands of families back in India depend on these remittances, making it a social responsibility for the company.
