ഭരണം കിട്ടിയതിന് പിന്നാലെ കോൺഗ്രസിൽ പുതിയ പടലപ്പിണക്കം! കെ.പി.സി.സി പ്രസിഡന്റ് സ്ഥാനത്തിനായുള്ള ഡൽഹി ചരടുവലികളുടെ ഇൻസൈഡ് സ്റ്റോറി
തിരുവനന്തപുരം: മുഖ്യമന്ത്രി സ്ഥാനത്തെച്ചൊല്ലിയുള്ള അഭിപ്രായഭിന്നതകൾ പൂർണമായി അവസാനിക്കാനുമുമ്പേ കോൺഗ്രസിൽ കെ.പി.സി.സി അധ്യക്ഷ സ്ഥാനത്തേക്കുള്ള ചർച്ചകൾ സജീവമാകുന്നു. നിലവിലെ സംസ്ഥാന അധ്യക്ഷൻ സണ്ണി ജോസഫും വർക്കിങ് പ്രസിഡന്റുമാരായ എ.പി. അനിൽകുമാറും പി.സി. വിഷ്ണുനാഥും മന്ത്രിസഭയിലെത്തിയതോടെ പാർട്ടിക്ക് പുതിയ നേതൃസംഘത്തെ കണ്ടെത്തേണ്ട സാഹചര്യം രൂപപ്പെട്ടു.
യൂത്ത് കോൺഗ്രസ് സംസ്ഥാന പ്രസിഡന്റായിരുന്ന ഒ.ജെ. ജനീഷും മന്ത്രിയായ സാഹചര്യത്തിൽ യുവജന സംഘടനയുടെ പുതിയ അധ്യക്ഷനെ കണ്ടെത്തുന്നതിനുള്ള ചർച്ചകളും പാർട്ടിക്കുള്ളിൽ ആരംഭിച്ചിട്ടുണ്ട്.
പുതിയ അധ്യക്ഷനെക്കുറിച്ച് ഔദ്യോഗിക ചർച്ചകൾ തുടങ്ങിയിട്ടില്ലെങ്കിലും, ചില നേതാക്കൾ ഇതിനകം ദേശീയ നേതൃത്വവുമായി ആശയവിനിമയം നടത്തിയിട്ടുണ്ടെന്നാണ് സൂചന. സർക്കാരുമായി അനാവശ്യ സംഘർഷങ്ങൾ ഒഴിവാക്കി ഭരണത്തെയും സംഘടനയെയും ഒരുപോലെ മുന്നോട്ടുകൊണ്ടുപോകാൻ കഴിയുന്ന നേതാവിനെയാണ് ഹൈക്കമാൻഡ് പരിഗണിക്കുന്നതെന്നാണ് പാർട്ടി വൃത്തങ്ങൾ പറയുന്നത്.
മുഖ്യമന്ത്രി സ്ഥാനാർത്ഥിയെച്ചൊല്ലി പാർട്ടിക്കുള്ളിൽ വ്യത്യസ്ത വിഭാഗങ്ങൾ രൂപപ്പെട്ടത് ദേശീയ നേതൃത്വത്തിന്റെ ശ്രദ്ധയിൽപ്പെട്ടിട്ടുണ്ട്. അതിനാൽ വിഭാഗീയത കുറച്ച് പാർട്ടിയിൽ ഐക്യം ഉറപ്പാക്കാൻ കഴിയുന്ന വ്യക്തിയെ കണ്ടെത്തുക എന്നതും പുതിയ അധ്യക്ഷനെ തിരഞ്ഞെടുക്കുന്നതിലെ പ്രധാന മാനദണ്ഡമാകും.
ഭരണത്തിൽ പ്രധാന സ്ഥാനങ്ങൾ ഒരു വിഭാഗത്തിനാണ് ലഭിച്ചതെന്ന വിലയിരുത്തലിന്റെ അടിസ്ഥാനത്തിൽ, മറ്റ് വിഭാഗങ്ങളിൽ നിന്നുള്ള നേതാക്കൾക്കും അധ്യക്ഷസ്ഥാനത്തേക്ക് അവസരം ലഭിക്കുമെന്ന വിലയിരുത്തലുണ്ട്.
ഇതിനിടെ ലോക്സഭാംഗം കൊടിക്കുന്നിൽ സുരേഷ് അധ്യക്ഷ സ്ഥാനത്തേക്കുള്ള താൽപര്യം പരസ്യമായി വ്യക്തമാക്കിയിട്ടുണ്ട്. പിന്നാക്ക വിഭാഗങ്ങളിൽ നിന്നുള്ള ഒരാൾ ഇതുവരെ കെ.പി.സി.സി അധ്യക്ഷനായിട്ടില്ലെന്ന വാദമാണ് അദ്ദേഹം ഉയർത്തുന്നത്.
ബെന്നി ബെഹനാൻ, ജോസഫ് വാഴയ്ക്കൻ, ആന്റോ ആന്റണി, കെ.സി. ജോസഫ്, മാത്യു കുഴൽനാടൻ എന്നിവരുടെ പേരുകളും പാർട്ടിക്കുള്ളിൽ സജീവ ചർച്ചയിലുണ്ട്.
മുതിർന്ന നേതാവെന്ന നിലയിലാണ് കെ.സി. ജോസഫിന്റെ പേര് ഉയരുന്നത്. ദീർഘകാല രാഷ്ട്രീയ പ്രവർത്തനങ്ങൾക്കിപ്പുറവും വേണ്ടത്ര പരിഗണന ലഭിച്ചില്ലെന്ന വിലയിരുത്തലാണ് ജോസഫ് വാഴയ്ക്കന് അനുകൂലമായി ഉയരുന്നത്.
ജനപ്രതിനിധികളായിരിക്കുന്നവരെ സംഘടനാ ചുമതലയിൽ നിന്ന് മാറ്റിനിർത്തണമെന്ന തീരുമാനം വന്നാൽ പല പ്രമുഖരും പരിഗണനപ്പട്ടികയിൽ നിന്ന് പുറത്താകാനും സാധ്യതയുണ്ട്.
കെ.പി.സി.സി പ്രസിഡന്റിന്റെയും വർക്കിങ് പ്രസിഡന്റുമാരുടെയും നിയമനം പൂർണമായും ഹൈക്കമാൻഡിന്റെ രാഷ്ട്രീയ കണക്കുകൂട്ടലുകളെ ആശ്രയിച്ചായിരിക്കും. സംസ്ഥാന നേതൃത്വത്തിൽ ഏകാഭിപ്രായം രൂപപ്പെട്ടാൽ തീരുമാനമെടുക്കൽ എളുപ്പമാകുമെന്നാണ് പാർട്ടി വൃത്തങ്ങൾ സൂചിപ്പിക്കുന്നത്.
English Summary
The Congress party in Kerala has begun internal discussions over appointing a new KPCC president after several senior leaders joined the cabinet. Names including Kodikunnil Suresh, Benny Behanan, and Anto Antony are being discussed as the high command looks for a leader capable of balancing both governance and party unity.
