സദ്യയ്ക്ക് ഒഴിച്ച് കൂടാനാകാത്ത വിഭവമാണ് കൂട്ടുക്കറി. വെറും പത്ത് മിനുട്ട് മതി, സദ്യയ്ക്ക് വിളമ്പുന്ന കൂട്ടുകറി തയ്യാറാക്കാം. നല്ല രുചികരമായ കൂട്ടുകറി തയ്യാറാക്കുന്നത് എങ്ങനെയെന്ന് നോക്കിയാലോ
ചേരുവകൾ
∙ ചേന തൊലി കളഞ്ഞു വലുതാക്കി നുറുക്കിയത് -1 കപ്പ് ( 1/2 കിലോ).
∙ കടല-200 ഗ്രാം ( 6 മണിക്കൂർ കുതിർത്തത് ).
∙ രണ്ടു നേന്ത്രക്കായ -തൊലിയോടെ വലുതാക്കി നുറുക്കിയത്.
∙ മുളക് പൊടി-1 ടേബിൾ സ്പൂൺ.
∙ മഞ്ഞൾ പൊടി- 1/2 ടേബിൾ സ്പൂൺ.
∙ ഉപ്പ-പാകത്തിന്.
∙ കറി വേപ്പില-2 തണ്ട്.
∙ നാളികേരം-ഒരു വലിയ തേങ്ങ ചിരകിയത്.
∙ വെളിച്ചെണ്ണ-3 ടേബിൾ സ്പൂൺ.
∙ നെയ്യ്-1 ടേബിൾ സ്പൂൺ.
∙ കടുക്-2 ടേബിൾ സ്പൂൺ.
∙ വറ്റൽ മുളക്- 6 എണ്ണം.
∙ ചെറിയ ജീരകം-1/2 സ്പൂൺ .
പാചകം ചെയ്യുന്ന വിധം
ഒരു പാനിൽ അരകപ്പ് വെള്ളം ഒഴിച്ചു നുറുക്കി വച്ച കഷണങ്ങളും കടലയും മുളകുപൊടിയും മഞ്ഞൾ പൊടിയും പാകത്തിന് ഉപ്പും ഒരു തണ്ട് കറിവേപ്പിലയും ചേർത്ത് ഉടഞ്ഞു പോകാതെ വെള്ളം വറ്റുന്നതു വരെ ചെറു തീയിൽ വേവിച്ചെടുക്കുക. ചിരകിയെടുത്ത നാളികേരത്തിൽ പകുതി വെള്ളം ഇല്ലാതെ നന്നായി അരച്ചെടുക്കുക. ഒരു പാനിൽ രണ്ട് സ്പൂൺ വെളിച്ചെണ്ണ ചൂടാക്കി ഒരു സ്പൂൺ കടുക് താളിച്ച ശേഷം ബാക്കിയുള്ള തേങ്ങ ചേർത്ത് ചെറു തീയിൽ നല്ല ബ്രൗൺ നിറമാകുന്നതു വരെ വറുത്തെടുക്കുക. അതിനുശേഷം വറുത്ത തേങ്ങയിൽ നിന്ന് രണ്ടു ടേബിൾ സ്പൂൺ മാറ്റി വച്ച് ബാക്കി തേങ്ങ വെള്ളം ചേർക്കാതെ പൊടിച്ചെടുക്കുക. കഷണം വെന്തു പാകമായാൽ അതിലേക്കു നാളികേരം അരച്ചതു ചേർത്ത് ഒന്ന് തിളപ്പിച്ച ശേഷം വറുത്തു പൊടിച്ച തേങ്ങയും, വറുത്തു മാറ്റിവച്ച തേങ്ങയും ചേർത്ത് നന്നായി ഇളക്കി യോജിപ്പിക്കുക. പാകത്തിന് ഉപ്പും ചേർക്കുക. അതിനു ശേഷം പാനിൽ വെളിച്ചെണ്ണയും നെയ്യും ഒഴിച്ചു ചെറിയ ജീരകം, കടുക്, കറിവേപ്പില, വറ്റൽ മുളക് എന്നിവ വറുത്തു കൂട്ടു കറിയിലേക്കു ചേർക്കുക. നല്ല രുചിയേറും കൂട്ടു കറി തയ്യാർ .
Read Also : ഒരു ബനാന മിൽക്ക് ഷേക്ക് കഴിക്കാം
