അശ്ലീല വീഡിയോയിൽ കുരുങ്ങി; ഡിജിപിക്ക് സസ്പെൻഷൻ
ബെംഗളൂരു: അശ്ലീല വീഡിയോ വിവാദത്തെ തുടർന്ന് കർണാടക സിവിൽ റൈറ്റ്സ് എൻഫോഴ്സ്മെന്റ് വിഭാഗം ഡിജിപി കെ. രാമചന്ദ്ര റാവുവിനെ സർക്കാർ സസ്പെൻഡ് ചെയ്തു.
ഓഫീസിനുള്ളിൽ സ്ത്രീകളുമായി അശ്ലീലമായും അനുചിതമായും പെരുമാറുന്ന ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് അടിയന്തര നടപടി സ്വീകരിച്ചത്.
കഴിഞ്ഞ ദിവസങ്ങളിലാണ് രാമചന്ദ്ര റാവുവിന്റേതെന്ന് കരുതുന്ന വീഡിയോകളും ഓഡിയോ ക്ലിപ്പുകളും പുറത്തുവന്നത്. സ്വന്തം ഓഫീസിനുള്ളിൽ വെച്ച് സ്ത്രീകളോട് മോശമായ രീതിയിൽ ഇടപെടുന്ന ദൃശ്യങ്ങളാണ് വൈറലായത്.
സർക്കാർ ഉദ്യോഗസ്ഥന് യോജിക്കാത്ത പെരുമാറ്റം സർക്കാരിന് വലിയ നാണക്കേടുണ്ടാക്കിയതായി സസ്പെൻഷൻ ഉത്തരവിൽ വ്യക്തമാക്കുന്നു.
പ്രാഥമിക അന്വേഷണത്തിൽ തന്നെ രാമചന്ദ്ര റാവു ചട്ടങ്ങളും സേവനനിയമങ്ങളും ലംഘിച്ചതായി കണ്ടെത്തിയതിനെ തുടർന്നാണ് സസ്പെൻഷൻ.
സസ്പെൻഷൻ കാലയളവിൽ സർക്കാരിന്റെ മുൻകൂർ അനുമതിയില്ലാതെ ആസ്ഥാനം വിട്ടുപോകാൻ പാടില്ലെന്നും കർശന നിർദേശമുണ്ട്.
അതേസമയം, തനിക്കെതിരെയുള്ള ആരോപണങ്ങൾ പൂർണമായും വ്യാജമാണെന്നും, പുറത്തുവന്ന വീഡിയോ കെട്ടിച്ചമച്ചതാണെന്നും രാമചന്ദ്ര റാവു പ്രതികരിച്ചു.
എന്നാൽ നിയമത്തിന് മുകളിൽ ആരുമില്ലെന്നും, എത്ര മുതിർന്ന ഉദ്യോഗസ്ഥനായാലും കുറ്റം തെളിഞ്ഞാൽ കർശന നടപടി ഉണ്ടാകുമെന്നും മുഖ്യമന്ത്രി സിദ്ധരാമയ്യ വ്യക്തമാക്കി.
1993 ബാച്ച് ഐപിഎസ് ഉദ്യോഗസ്ഥനായ രാമചന്ദ്ര റാവു മുൻപും വിവാദങ്ങളിൽ അകപ്പെട്ടിട്ടുണ്ട്.
കഴിഞ്ഞ വർഷം സ്വർണക്കടത്ത് കേസിൽ അറസ്റ്റിലായ തന്റെ രണ്ടാം ഭാര്യയുടെ മകളെ രക്ഷിക്കാൻ ഔദ്യോഗിക പദവി ദുരുപയോഗം ചെയ്തുവെന്ന ആരോപണത്തെ തുടർന്ന് അദ്ദേഹത്തെ നിർബന്ധിത അവധിയിൽ പ്രവേശിപ്പിച്ചിരുന്നു.
അന്വേഷണത്തിന് ശേഷം അടുത്തിടെയാണ് വീണ്ടും സർവീസിൽ പ്രവേശിച്ചത്.
English Summary
Karnataka government has suspended Civil Rights Enforcement DGP K. Ramachandra Rao following an obscene video controversy. Videos allegedly showing him behaving inappropriately with women inside his office went viral on social media. The suspension was ordered after a preliminary inquiry found violations of service rules. Rao has denied the allegations, claiming the videos are fabricated, while Chief Minister Siddaramaiah stated that strict action will be taken if guilt is proven.
karnataka-dgp-ramachandra-rao-suspended-obscene-video-row
Karnataka News, DGP Suspension, Obscene Video Controversy, Ramachandra Rao, IPS Officer, Political News, India News
