വിമാനങ്ങൾക്കായി ലോകം ഇന്ത്യയിലേക്ക് നോക്കുന്ന കാലം ഇനി ദൂരെയല്ല; സ്വന്തമായി യാത്രാവിമാനം നിർമ്മിക്കാൻ ഒരുങ്ങുന്നു; ബോയിംഗും എയർബസും വിറയ്ക്കും
ആകാശം ഇനി ഇന്ത്യയ്ക്ക് വെറും ഒരു അതിരല്ല; അത് നമ്മുടെ പുതിയ തട്ടകമാണ്. പതിറ്റാണ്ടുകളായി ബോയിംഗ്, എയർബസ്, എടിആർ തുടങ്ങിയ വിദേശ വിമാന നിർമ്മാതാക്കൾ ആധിപത്യം പുലർത്തിയിരുന്ന മേഖലയിലേക്ക് ഇന്ത്യ ചരിത്രപരമായൊരു കടന്നുവരവിന് തയ്യാറെടുക്കുകയാണ്.
സ്വന്തമായി ഒരു യാത്രാവിമാനം നിർമ്മിക്കുക ഒരു കാർ നിർമ്മിക്കുന്നതുപോലെ ലളിതമല്ല. അത്യന്തം സങ്കീർണ്ണമായ സാങ്കേതികവിദ്യയും കർശനമായ സുരക്ഷാ മാനദണ്ഡങ്ങളും ആവശ്യമായ ഈ രംഗത്ത് ലോകത്ത് വിരലിലെണ്ണാവുന്ന രാജ്യങ്ങൾക്കേ ഇടം ലഭിച്ചിട്ടുള്ളൂ.
ആ ‘എലൈറ്റ് ക്ലബ്ബിലേക്ക്’ ഇന്ത്യയും പ്രവേശിക്കാനിരിക്കുകയാണ്. ഇതിന്റെ ഭാഗമായാണ് റീജിയണൽ ട്രാൻസ്പോർട്ട് എയർക്രാഫ്റ്റ് – 90 (RTA-90) എന്ന മഹത്തായ പദ്ധതി.
ഈ പദ്ധതിയുടെ പ്രാരംഭ ഘട്ടത്തിനായി കേന്ദ്ര സർക്കാർ 12,511 കോടി രൂപയുടെ നിക്ഷേപമാണ് പ്രഖ്യാപിച്ചിരിക്കുന്നത്.
ഈ തുക വിദേശ സാങ്കേതികവിദ്യ വാങ്ങുന്നതിനല്ല, മറിച്ച് വിമാനത്തിന്റെ ഡിസൈൻ മുതൽ വികസനം, പ്രോട്ടോടൈപ്പ് നിർമ്മാണം, പരീക്ഷണ പറക്കലുകൾ വരെ ഇന്ത്യയിൽ തന്നെ നടത്താനാണ് ഉപയോഗിക്കുക.
ഇതിനായി സർക്കാർ ഒരു സ്പെഷ്യൽ പർപ്പസ് വെഹിക്കിൾ (SPV) രൂപീകരിക്കും. ഹിന്ദുസ്ഥാൻ എയറോനോട്ടിക്സ് ലിമിറ്റഡ് (HAL), നാഷണൽ എയറോസ്പേസ് ലബോറട്ടറീസ് (NAL), സ്വകാര്യ മേഖലയിലെ പ്രമുഖ കമ്പനികൾ എന്നിവ ചേർന്നുള്ള സംയുക്ത സംരംഭമായിരിക്കും ഇത്.
ഈ പദ്ധതിയിലൂടെ ഇന്ത്യ നിർമ്മിക്കാൻ പോകുന്നത് ഒരു 90 സീറ്റർ, അത്യാധുനിക, ഇന്ധനക്ഷമതയേറിയ യാത്രാവിമാനമാണ്.
നിലവിൽ ഇന്ത്യ ആഭ്യന്തര റൂട്ടുകൾക്കായി വിദേശ വിമാനങ്ങൾ വാങ്ങാനും ലീസിനെടുക്കാനും വൻതുക ചെലവഴിക്കുന്നുണ്ട്. സ്വന്തം വിമാനം വരുന്നതോടെ ഈ പണം രാജ്യത്തിനകത്ത് തന്നെ നിലനിൽക്കും.
പ്രാദേശിക റൂട്ടുകൾക്ക് ഏറ്റവും അനുയോജ്യമായ രീതിയിലായിരിക്കും ആർടിഎ-90 രൂപകൽപ്പന ചെയ്യുന്നത്. കൊച്ചി–കണ്ണൂർ, സേലം–ചെന്നൈ പോലുള്ള ചെറുദൂര റൂട്ടുകളിൽ വൻ വിമാനങ്ങൾ ലാഭകരമല്ല.
അവിടെയാണ് റീജിയണൽ വിമാനങ്ങൾക്ക് വലിയ പ്രാധാന്യം. ഇന്ത്യയിൽ തന്നെ നിർമ്മിക്കുന്ന ഇത്തരം വിമാനങ്ങൾ സർവീസിൽ വരുന്നതോടെ ടിക്കറ്റ് നിരക്കുകൾ കുറയുകയും സാധാരണക്കാർക്കും വിമാനയാത്ര കൂടുതൽ പ്രാപ്യമാകുകയും ചെയ്യും.
വിമാന നിർമ്മാണ ശാലകൾ ആയിരക്കണക്കിന് ചെറുകിട വ്യവസായങ്ങൾക്ക് ഉണർവേകും. ലക്ഷക്കണക്കിന് തൊഴിലവസരങ്ങൾ സൃഷ്ടിക്കുന്ന ഈ പദ്ധതി ഒരു സ്വപ്നമല്ല;
പണിപ്പുരയിലുള്ള യാഥാർത്ഥ്യമാണ്. നേരത്തെ ‘സരസ്’ (SARAS) വിമാന പദ്ധതി വഴി ഇന്ത്യ തന്റെ കഴിവ് തെളിയിച്ചിട്ടുണ്ട്.
പുതിയ വിമാനത്തിൽ ഫ്ലൈ-ബൈ-വയർ (Fly-by-Wire) പോലുള്ള അത്യാധുനിക സാങ്കേതികവിദ്യകൾ ഉൾപ്പെടുത്തും. പൈലറ്റിന്റെ നിർദ്ദേശങ്ങൾ ഇലക്ട്രോണിക് സിഗ്നലുകളായി കമ്പ്യൂട്ടറുകൾ വഴി വിമാനം നിയന്ത്രിക്കുന്ന ഈ സംവിധാനത്തിലൂടെ സുരക്ഷയും കാര്യക്ഷമതയും വർധിക്കും.
പഴയ മീറ്ററുകളും സ്വിച്ചുകളും പകരം ഡിജിറ്റൽ സ്ക്രീനുകളാകും കോക്ക്പിറ്റിൽ.
എന്നാൽ വെല്ലുവിളികൾ ചെറുതല്ല. അന്താരാഷ്ട്ര സർട്ടിഫിക്കേഷൻ മാനദണ്ഡങ്ങൾ, എൻജിൻ സാങ്കേതികവിദ്യയിലെ സ്വയംപര്യാപ്തത തുടങ്ങിയവ ഇന്ത്യ മറികടക്കേണ്ടതുണ്ട്.
അതിനായി ഒരു അന്താരാഷ്ട്ര പങ്കാളിയെയും പദ്ധതിയിൽ ഉൾപ്പെടുത്തിയിട്ടുണ്ട്. ഇന്ത്യയുടെ കഴിവും ലോകോത്തര സാങ്കേതികവിദ്യയും ഒന്നിക്കുമ്പോൾ, ആഗോള വിപണിയിൽ മത്സരിക്കാവുന്ന ഒരു ഇന്ത്യൻ വിമാനം പിറക്കും.
2030 ഓടെ ഇന്ത്യൻ ആകാശത്ത് പറക്കുന്ന പത്ത് വിമാനങ്ങളിൽ ഒന്ന് ‘മേക്ക് ഇൻ ഇന്ത്യ’ ആയിരിക്കണം എന്നതാണ് ലക്ഷ്യം.
‘തേജസ്’ യുദ്ധവിമാനത്തിന്റെ വിജയാനുഭവവുമായി സിവിലിയൻ വ്യോമയാന മേഖലയിലേക്കുള്ള ഇന്ത്യയുടെ ഈ ചുവടുവെപ്പ്, രാജ്യം ഒരു ഗ്ലോബൽ മാനുഫാക്ചറിങ് ഹബ്ബായി മാറുന്നതിന്റെ ശക്തമായ സൂചനയാണ്.
വിമാനങ്ങൾക്കായി ലോകം ഇന്ത്യയിലേക്ക് നോക്കുന്ന കാലം ഇനി ദൂരെയല്ല.
English Summary
India is set to enter the elite group of nations capable of manufacturing commercial passenger aircraft with the ambitious Regional Transport Aircraft–90 (RTA-90) project.
india-rta-90-regional-aircraft-make-in-india-aviation
India aviation, RTA-90 aircraft, Make in India, regional aircraft, civil aviation, aerospace manufacturing, HAL, NAL, fly-by-wire technology
