കഴിഞ്ഞ 5 വർഷത്തിനിടെ സംസ്ഥാനത്ത് 61730 കുടുംബങ്ങളാണ് റേഷൻ മുൻഗണനാ പട്ടികയിൽനിന്നു പുറത്തായത്.
സ്ഥിരമായി റേഷൻ വാങ്ങാത്തതിന്റെ പേരിലാണ് പുറത്താക്കൽ.
മലപ്പുറം ജില്ലയിൽ മാത്രം 2363 കുടുംബങ്ങളെ പിഎച്ച്എച്ച്, എഎവൈ, എൻപിഎസ് എന്നീ മുൻഗണനാ വിഭാഗങ്ങളിൽനിന്ന് മുൻഗണനേതര വിഭാഗത്തിലേക്കു മാറ്റി. 3 മാസത്തിലേറെ തുടർച്ചയായി റേഷൻ വാങ്ങാത്തതിന്റെ പേരിലാണ് ഇത്രയും പേർ ഒന്നിച്ച് പുറത്തായത്.
അധികൃതർ വിശദമായ അന്വേഷണം നടത്തിയ ശേഷമാണ് നടപടി സ്വീകരിച്ചത്. ഇവരുടെ മുൻഗണനാ റേഷൻ കാർഡുകളെല്ലാം ഇതിനകം തന്നെ മുൻഗണനേതര വിഭാഗത്തിലേക്കു മാറിയിട്ടുണ്ട്.
അതേസമയം മലപ്പുറം ജില്ലയിൽ വിവിധ കാരണങ്ങളാൽ കഴിഞ്ഞ 3 വർഷത്തിനിടെ ഇവരുൾപ്പെടെ 31978 കുടുംബങ്ങളാണു മുൻഗണനാ പട്ടികയിൽനിന്നു പുറത്തായത്.
മുൻഗണനാ കാർഡിന് അർഹരല്ലെന്ന് ബോധ്യം വന്നതിനാൽ സ്വമേധയാ പൊതുവിഭാഗത്തിലേക്ക് മാറിയവരാണ് ബാക്കിയുള്ളവരിൽ ഏറെയും.
അർഹതയില്ലാത്തതിന്റെ പേരിൽ അധികൃതർ അന്വേഷണം നടത്തി നീക്കംചെയ്തവരുമുണ്ട് ഈ ലിസ്റ്റിൽ. 25,000 രൂപയിലധികം മാസ വരുമാനം, ടാക്സി ഒഴികെയുള്ള നാലുചക്ര വാഹനം,1000 ചതുരശ്ര അടിയിലേറെ വിസ്തീർണമുള്ള വീട്, ഒരേക്കറിലേറെ ഭൂമി എന്നിവയുള്ളവരാണ് മുൻഗണനാ റേഷൻ കാർഡിന് അർഹതയില്ലാത്തവർ.
മുൻഗണനാ വിഭാഗത്തിൽ (പിഎച്ച്എച്ച്) നിന്ന് 1594 പേർ, അന്ത്യോദയ (എഎവൈ) വിഭാഗത്തിൽനിന്ന് 155 പേർ, മുൻഗണനേതരം സബ്സിഡി (എൻപിഎസ്) വിഭാഗത്തിൽനിന്ന് 614 പേർ, എന്നിങ്ങനെയാണ് സ്ഥിരമായി റേഷൻ വാങ്ങാത്തതിന്റെ പേരിൽ പുറത്തായവരുടെ കണക്കുകൾ.
എഎവൈ വിഭാഗത്തിന് പ്രതിമാസം 30 കിലോ അരിയും പിഎച്ച്എച്ച് വിഭാഗത്തിന് ആളൊന്നിന് 4 കിലോ അരിയും സൗജന്യമായാണ് ലഭിക്കുന്നത്.
എൻപിഎസ് വിഭാഗക്കാർക്ക് ആളൊന്നിന് 2 കിലോ അരി വീതം നാലു രൂപ തോതിലാണ് ലഭിക്കുന്നത്. മുൻഗണനേതര വിഭാഗക്കാർക്ക് 5 കിലോ അരിയാണു കിട്ടുന്നത് കിലോഗ്രാമിന് 10.90 രൂപ ഇതിനു നൽകണം.
