മാധ്യമപ്രവർത്തകൻ കൊല്ലപ്പെട്ട കേസ്: ഗുർമീത് റാം റഹീമിനെ ഹൈക്കോടതി വെറുതെ വിട്ടു
2002-ൽ മാധ്യമപ്രവർത്തകൻ രാം ചന്ദർ ഛത്രപതി കൊല്ലപ്പെട്ട കേസിൽ ദേരാ സച്ചാ സൗദ തലവൻ ഗുർമീത് റാം റഹീം സിംഗിനെ പഞ്ചാബ്–ഹരിയാന ഹൈക്കോടതി വെറുതെ വിട്ടു.
സിബിഐ കോടതി വിധിച്ച ജീവപര്യന്തം ശിക്ഷ ചോദ്യം ചെയ്ത് നൽകിയ അപ്പീലിലാണ് ഹൈക്കോടതിയുടെ നിർണായക വിധി.
2019-ൽ പഞ്ച്കുളയിലെ സിബിഐ പ്രത്യേക കോടതി റാം റഹീമിനും മറ്റ് പ്രതികൾക്കും ജീവപര്യന്തം തടവും 50,000 രൂപ പിഴയും വിധിച്ചിരുന്നു. ഈ വിധി ചോദ്യം ചെയ്ത് റാം റഹീം നൽകിയ അപ്പീലിലാണ് ഹൈക്കോടതിയുടെ തീരുമാനം.
കേസിൽ റാം റഹീമിനെ വെറുതെ വിട്ടെങ്കിലും മറ്റ് രണ്ട് പ്രതികളുടെ ശിക്ഷ കോടതി ശരിവച്ചു.
കേസിന്റെ പശ്ചാത്തലം
2002 ഒക്ടോബർ 24-നാണ് കേസിനാസ്പദമായ സംഭവം നടന്നത്. സിർസയിലെ വസതിക്ക് മുന്നിൽ വെച്ചാണ് മാധ്യമപ്രവർത്തകനായ രാം ചന്ദർ ഛത്രപതി വെടിയേറ്റ് കൊല്ലപ്പെട്ടത്.
ദേരാ സച്ചാ സൗദയിൽ വനിതാ അനുയായികൾ നേരിടുന്ന ലൈംഗിക ചൂഷണങ്ങളെക്കുറിച്ച് തന്റെ പത്രത്തിൽ വാർത്ത പ്രസിദ്ധീകരിച്ചതിന് പിന്നാലെയായിരുന്നു ആക്രമണം.
ഈ റിപ്പോർട്ടുമായി ബന്ധപ്പെട്ട പ്രതികാര നടപടിയെന്നായിരുന്നു അന്വേഷണ ഏജൻസികളുടെ നിഗമനം.
ജയിൽ മോചനം ലഭിക്കില്ല
ഈ കേസിൽ വെറുതെ വിട്ടെങ്കിലും റാം റഹീമിന് ഉടൻ ജയിലിൽ നിന്ന് പുറത്തിറങ്ങാനാവില്ല. രണ്ട് വനിതാ അനുയായികളെ ബലാത്സംഗം ചെയ്ത കേസിൽ ലഭിച്ച 20 വർഷത്തെ തടവുശിക്ഷ ഇപ്പോഴും ഇയാൾ അനുഭവിക്കുകയാണ്.
ഹരിയാനയിലെ റോഹ്തക്കിലുള്ള സുനരിയ ജയിലിലാണ് അദ്ദേഹം കഴിയുന്നത്.
മറ്റ് കേസുകളും
2024 മേയിൽ ദേരാ മാനേജരായിരുന്ന രഞ്ജിത് സിംഗിനെ കൊലപ്പെടുത്തിയ കേസിലും ഹൈക്കോടതി റാം റഹീമിനെ വെറുതെ വിട്ടിരുന്നു. അതേസമയം 2015-ലെ പഞ്ചാബ് വിശുദ്ധ ഗ്രന്ഥ നിന്ദ കേസുകളിൽ ഇയാൾ പ്രതിപ്പട്ടികയിലുണ്ട്. ഈ കേസുകളിൽ അന്വേഷണം തുടരുകയാണ്.
English Summary
The Punjab and Haryana High Court acquitted Dera Sacha Sauda chief Gurmeet Ram Rahim Singh in the 2002 murder case of journalist Ram Chander Chhatrapati. The verdict came on his appeal challenging the life sentence awarded by a CBI court in 2019. While Ram Rahim was acquitted, the court upheld the conviction of two other accused. However, he will remain in jail as he is serving a 20-year sentence in a separate rape case.
