കൊച്ചി: ആശ്വാസത്തിന് അറുതി വരുത്തി സംസ്ഥാനത്ത് വീണ്ടും സ്വർണവില കുതിക്കുന്നു. 40 രൂപയാണ് ഇന്ന് ഒരു ഗ്രാമിന് കൂടിയത്. ഇതോടെ ഒരു ഗ്രാം സ്വർണവില 8,235 രൂപയായി. പവന് 320 രൂപ ഉയർന്ന് 65,880 രൂപയിലുമെത്തി.
തുടർച്ചയായ വിലക്കുറവിനു ശേഷം ഇന്നലെ ഗ്രാമിന് 10 രൂപയും പവന് 80 രൂപയും വർധിച്ചിരുന്നു. രാജ്യാന്തരവിലയുടെ തിരിച്ചുകയറ്റത്തിന്റെ ചുവടുപിടിച്ചാണ് കേരളത്തിലും വില കുതിച്ചു കയറുന്നത്. ഈ മാസം 20ന് രേഖപ്പെടുത്തിയ ഗ്രാമിന് 8,310 രൂപയും പവന് 66,480 രൂപയും എന്ന റെക്കോർഡ് ഭേദിക്കുമോ എന്നതാണ് നിലവിലെ ആശങ്ക.
സംസ്ഥാനത്ത് 18 കാരറ്റ് സ്വർണവിലയും ഇന്ന് വർധിച്ചു. ചിലകടകളിൽ ഗ്രാമിന് 30 രൂപ വർധിച്ച് 6,800 രൂപയിലാണ് വ്യാപാരം നടക്കുന്നത്. എന്നാൽ മറ്റു ചിലകടകളിൽ 35 രൂപ കൂടിയെങ്കിലും വില 6,755 രൂപയേയുള്ളൂ.
വെള്ളിക്ക് ഗ്രാമിന് ചില കടകളിൽ ഒരു രൂപ ഉയർന്ന് 110 രൂപയായപ്പോൾ മറ്റു കടകളിൽ 109 രൂപയിൽ മാറ്റമില്ലാതെ വില്പന നടക്കുന്നു. സ്വര്ണ വിലയിലെ കുതിച്ചുചാട്ടത്തിന് നിരവധി പ്രധാന ഘടകങ്ങള് കാരണമായിട്ടുണ്ട്. വര്ധിച്ച് വരുന്ന പണപ്പെരുപ്പ ആശങ്കകള്, ആഗോള പലിശ നിരക്ക് കുറയ്ക്കുമെന്ന പ്രതീക്ഷകള്, ഭൗമരാഷ്ട്രീയ സംഘര്ഷങ്ങള് എന്നിവയാണ് അതില് പ്രധാനം.
