ജയ്പൂർ: റെയിൽവേ ട്രാക്കിലേക്ക് ഥാർ ഓടിച്ചുകയറ്റിയ യുവാവ് പിടിയിൽ. രാജസ്ഥാനിലെ ജയ്പൂരിലാണ് സംഭവം. മദ്യലഹരിയിൽ റീൽസ് ചിത്രീകരിക്കുന്നതിനായാണ് ട്രാക്കിലേക്ക് വാഹനം ഓടിച്ചു കയറ്റിയത്.(Drunken driver arrested on railway track with Thar to shoot reel)
മഹീന്ദ്ര ഥാർ എസ് യു വി റെയിൽവേ ട്രാക്കിലൂടെ ഓടിക്കാനായിരുന്നു യുവാവിന്റെ ശ്രമം. ഈ സമയത്ത് വന്ന ഗുഡ്സ് ട്രെയിൻ കണ്ട് ട്രാക്കിൽ നിന്ന് വാഹനമെടുക്കാൻ ശ്രമിച്ചപ്പോൾ ട്രാക്കിൽ കുടുങ്ങുകയായിരുന്നു. ലോക്കോ പൈലറ്റിന് യഥാസമയം ട്രെയിൻ നിർത്താൻ സാധിച്ചതിനാൽ വൻ അപകടമാണ് ഒഴിവായത്.
സംഭവസ്ഥലത്തെത്തിയ ആളുകൾ ചേർന്ന് 15 മിനിറ്റോളം സമയമെടുത്താണ് വാഹനം ട്രാക്കിന് പുറത്തെത്തിച്ചത്. തുടർന്ന് ഇയാൾ വാഹനവുമായി കടന്നുകളയാൻ ശ്രമിച്ചു. ഇതിനിടെ ഇയാൾ മൂന്ന് പേരെ ഇടിച്ചതായും റിപ്പോർട്ടുണ്ട്. പോലീസ് പിന്തുടർന്നാണ് ഇയാളെ പിടികൂടിയത്.
