കോഴിക്കോട്: ഷിരൂരിലെ മണ്ണിടിച്ചിലിൽ കാണാതായ ലോറി ഡ്രൈവർ അർജുൻ്റെ ഭാര്യ കൃഷ്ണപ്രിയ ജോലിയിൽ പ്രവേശിച്ചു. കോഴിക്കോട് വേങ്ങേരി സർവീസ് സഹകരണ ബാങ്കിൽ ജൂനിയർ ക്ലർക്കായാണ് നിയമനം. കഴിഞ്ഞ ദിവസമാണ് വേങ്ങേരി സഹകരണ ബാങ്കിൽ കൃഷ്ണ പ്രിയയ്ക്ക് ജോലി നൽകുന്നതുമായി ബന്ധപ്പെട്ട ഉത്തരവ്, സഹകരണ വകുപ്പ് പുറത്തിറക്കിയത്.(Driver Arjun’s wife Krishnapriya entered the job in Cooperative bank)
ജൂനിയർ ക്ലർക്ക് തസ്തികയിൽ ആണ് നിയമനം. നിയമത്തിൽ ഇളവുകൾ നൽകിയാണ് തീരുമാനമെന്ന് മന്ത്രി വി എൻ വാസവൻ പറഞ്ഞിരുന്നു. കൂടെ നിന്നവർക്ക് നന്ദിയെന്ന് ജോലി ഏറ്റെടുത്ത ശേഷം കൃഷ്ണ പ്രിയ പറഞ്ഞു. അതേസമയം ഷിരൂരിൽ കാലാവസ്ഥ അനുകൂലമായാൽ ഡ്രഡ്ജർ എത്തിച്ച് തിരച്ചിൽ പുനരാരംഭിക്കാനാണ് നിലവിലെ തീരുമാനം. ഇക്കാര്യം ആവശ്യപ്പെട്ട് അർജുന്റെ കുടുംബം കർണാടക മുഖ്യമന്ത്രിയെ കണ്ടിരുന്നു.
ഒന്നരമാസം മുൻപ് ഉണ്ടായ മണ്ണിടിച്ചിലിലാണ് ഗംഗാവലി പുഴയ്ക്ക് സമീപത്ത് വച്ച് അർജുൻറെ ലോറി അപകടത്തിൽ പെടുന്നത്. പലതവണ തിരച്ചിൽ നടത്തിയിട്ടും അർജുൻ ഇനിയും കാണാമറയത്താണ്.
