തഹാവൂർ റാണയുടെ പൗരത്വം കാനഡ റദ്ദാക്കും; നീക്കം മാർക് കാർണി ഇന്ത്യ സന്ദർശിക്കാനിരിക്കെ
ഒട്ടാവ: 2008ലെ മുംബൈ ഭീകരാക്രമണ കേസിലെ പ്രതിയായ തഹാവൂർ റാണയുടെ കാനഡ പൗരത്വം റദ്ദാക്കുന്നതിനുള്ള നടപടികൾ ആരംഭിച്ചു. ഫെബ്രുവരി 26-ന് കാനഡ പ്രധാനമന്ത്രി മാർക്ക് കാർണി ഇന്ത്യ സന്ദർശിക്കാനിരിക്കെയാണ് നടപടി പുരോഗമിക്കുന്നത്.
ഭീകരവാദവുമായി ബന്ധപ്പെട്ട കുറ്റാരോപണങ്ങളല്ല, മറിച്ച് പൗരത്വത്തിനായി അപേക്ഷിക്കുമ്പോൾ തെറ്റായ വിവരങ്ങൾ നൽകിയെന്നാരോപണമാണ് നടപടിക്ക് ആധാരമാകുന്നത്.
2000-ൽ പൗരത്വത്തിനായി അപേക്ഷിക്കുമ്പോൾ കാനഡയിലെ താമസ രേഖകളിൽ റാണ കൃത്രിമം കാണിച്ചതായി ഇമിഗ്രേഷൻ അധികൃതർ കണ്ടെത്തിയിട്ടുണ്ട്.
കാനഡയിൽ താമസിച്ചിരുന്നുവെന്ന അവകാശവാദം ഉന്നയിച്ച സമയത്ത് അദ്ദേഹം അമേരിക്കയിലെ ചിക്കാഗോയിൽ വ്യവസായം നടത്തുകയായിരുന്നുവെന്ന് റോയൽ കനേഡിയൻ മൗണ്ടഡ് പൊലീസ് റിപ്പോർട്ട് ചെയ്തു.
വിഷയം നിലവിൽ കാനഡ ഫെഡറൽ കോടതിയുടെ പരിഗണനയിലാണ്.
പൗരത്വം റദ്ദാക്കാനുള്ള നീക്കത്തിനെതിരെ റാണയുടെ അഭിഭാഷകർ കോടതിയെ സമീപിച്ചിട്ടുണ്ട്. പാക്കിസ്ഥാൻ വംശജനായ തഹാവൂർ റാണ നിലവിൽ ഇന്ത്യയിൽ കസ്റ്റഡിയിലാണ്.
യുഎസിൽ നിന്ന് കൈമാറപ്പെട്ട ഇയാളെ എൻഐഎ അറസ്റ്റ് ചെയ്തിരുന്നു. മുൻ പ്രധാനമന്ത്രി ജസ്റ്റിൻ ട്രൂഡോയുടെ കാലത്ത് വഷളായ ഇന്ത്യ-കാനഡ ബന്ധം മെച്ചപ്പെടുത്താനുള്ള നീക്കത്തിന്റെ ഭാഗമായാണ് പുതിയ നടപടി വിലയിരുത്തപ്പെടുന്നത്.
English Summary
Canada has initiated proceedings to revoke the citizenship of Tahawwur Rana, accused in the 2008 Mumbai terror attacks. The move is reportedly based on allegations that he provided false information in his citizenship application, not on terrorism charges. Immigration authorities found discrepancies in his residency claims. The matter is currently before Canada’s Federal Court. Rana, of Pakistani origin, is presently in custody in India after being extradited from the US. The development comes ahead of Canadian Prime Minister Mark Carney’s planned visit to India.
