തെരുവുനായ്ക്കൾക്ക് ഭക്ഷണം നൽകുന്നത് തടയുന്നത് കുറ്റകരമോ? നിർണ്ണായക വിധിയുമായി ഹൈക്കോടതി

മുംബൈ: തെരുവുനായ്ക്കൾക്ക് ഭക്ഷണം നൽകുന്നതുമായി ബന്ധപ്പെട്ട് നിലനിൽക്കുന്ന തർക്കങ്ങളിൽ നിർണ്ണായക നിരീക്ഷണവുമായി ബോംബെ ഹൈക്കോടതി.

നായ്ക്കൾക്ക് ഭക്ഷണം നൽകുന്നത് തടയുന്നതിനെ നിയമവിരുദ്ധമായി കാണാനാവില്ലെന്ന് കോടതി വ്യക്തമാക്കി.

ഹൗസിങ് സൊസൈറ്റികളിലെ കുട്ടികളുടെയും മറ്റ് താമസക്കാരുടെയും സുരക്ഷ മുൻനിർത്തിയാണ് ഇത്തരം പ്രതിരോധങ്ങളുണ്ടാകുന്നതെന്ന നിരീക്ഷണത്തോടെ,

പൂനെ സ്വദേശിനിക്കെതിരെ രജിസ്റ്റർ ചെയ്ത എഫ്.ഐ.ആർ കോടതി റദ്ദാക്കി.

സംഭവം ഇങ്ങനെ

ഈ വർഷം ജനുവരിയിൽ പൂനെയിലെ ഹിഞ്ചേവാഡി പൊലീസ് സ്റ്റേഷനിലാണ് കേസിനാസ്പദമായ സംഭവം നടന്നത്.

ഒരു റെസിഡൻഷ്യൽ സൊസൈറ്റിയുടെ മുൻവശത്ത് തെരുവുനായ്ക്കൾക്ക് ഭക്ഷണം നൽകാൻ എത്തിയ 42-കാരിയേയും സുഹൃത്തുക്കളെയും

സൊസൈറ്റിയിലെ ഒരു സ്ത്രീയും മറ്റ് താമസക്കാരും ചേർന്ന് തടയുകയും അവരുടെ കാറിന് തടസം സൃഷ്ടിക്കുകയും ചെയ്തു.

ഇതിനെതിരെ ഭക്ഷണം നൽകാൻ എത്തിയവർ പോലീസിൽ പരാതി നൽകുകയായിരുന്നു.

കോടതിയുടെ നിരീക്ഷണം

ജസ്റ്റിസുമാരായ രേവതി മോഹിതേ ദേരെ, സന്ദേശ് പാട്ടീൽ എന്നിവരടങ്ങിയ ബെഞ്ചാണ് ഈ കേസ് പരിഗണിച്ചത്.

നായ്ക്കൾക്ക് ഭക്ഷണം നൽകുന്നത് തടഞ്ഞത് ദുരുദ്ദേശപരമല്ലെന്ന് കോടതി വിലയിരുത്തി.

സൊസൈറ്റിയിലെ കുട്ടികളുടെ സുരക്ഷയും നായ്ക്കളുടെ ശല്യവും കണക്കിലെടുത്താണ് പ്രതികൾ പരാതിക്കാരെ തടഞ്ഞത്.

രാത്രിയിൽ ശബ്‌ദം കേട്ട് പുറത്തിറങ്ങി; ഇരച്ചെത്തിയ മുഖമൂടി ധാരികൾ വയോധികയുടെ മുഖത്തും ശരീരത്തും മുളകുപൊടി വിതറി സ്വർണാഭരണം കവർന്നു

താമസക്കാർക്ക് ബുദ്ധിമുട്ടുണ്ടാകുന്ന സാഹചര്യം നിലനിൽക്കുമ്പോൾ ഇത്തരം തടസ്സപ്പെടുത്തലുകളെ കുറ്റകരമായി കാണാനാവില്ല.

സൊസൈറ്റി പരിസരത്ത് 40-ലധികം തെരുവുനായ്ക്കൾ ഉണ്ടെന്നും ഇതിനോടകം നിരവധിപ്പേർക്ക് കടിയേറ്റ സംഭവങ്ങൾ ഉണ്ടെന്നും കോടതി ചൂണ്ടിക്കാട്ടി.

എഫ്.ഐ.ആർ റദ്ദാക്കി

നായ്ക്കളുടെ ആക്രമണ ഭീഷണിയുള്ള ഒരിടത്ത് സമാധാനപരമായ താമസം ഉറപ്പാക്കാനുള്ള ശ്രമത്തിന്റെ ഭാഗമായാണ് പ്രതികൾ പ്രവർത്തിച്ചതെന്ന് കോടതി നിരീക്ഷിച്ചു.

അതുകൊണ്ടുതന്നെ തനിക്കെതിരെയുള്ള ക്രിമിനൽ കേസ് റദ്ദാക്കണമെന്ന പ്രതിയുടെ ആവശ്യം കോടതി അംഗീകരിക്കുകയായിരുന്നു.

തെരുവുനായ പ്രശ്നങ്ങളിൽ പൊതുജനങ്ങളുടെ സുരക്ഷയ്ക്കും തുല്യ പരിഗണന നൽകണമെന്ന സന്ദേശമാണ് ഈ വിധി നൽകുന്നത്.

English Summary

The Bombay High Court recently quashed an FIR against a Pune woman who was accused of obstructing others from feeding stray dogs in front of a housing society. A bench of Justice Revati Mohite Dere and Justice Sandesh Patil observed that stopping someone from feeding strays cannot be considered illegal if done to ensure the safety of residents