നിർത്തിയ ലോറി പെട്ടെന്ന് വലത്തോട്ടെടുത്ത് ബൈക്കിൽ ഇടിച്ചു; ലിഫ്റ്റ് ചോദിച്ച് കയറിയ യുവതിക്ക് ദാരുണാന്ത്യം

നിർത്തിയ ലോറി പെട്ടെന്ന് വലത്തോട്ടെടുത്ത് ബൈക്കിൽ ഇടിച്ചു; ലിഫ്റ്റ് ചോദിച്ച് കയറിയ യുവതിക്ക് ദാരുണാന്ത്യം

ആലുവ: നിർത്തിയിട്ടിരുന്ന ഗ്യാസ് സിലിണ്ടർ ലോറി അപ്രതീക്ഷിതമായി വലത്തോട്ടെടുത്തതിനെ തുടർന്ന് ഉണ്ടായ അപകടത്തിൽ ബൈക്കിൽ ലിഫ്റ്റ് ചോദിച്ച് കയറിയ യുവതിക്ക് ദാരുണാന്ത്യം.

ദേശീയപാതയിൽ ആലുവയിൽ നിന്ന് ഇടപ്പള്ളിയിലേക്കുള്ള വഴിയിലെ അമ്പാട്ടുകാവിനും മുട്ടത്തിനും ഇടയിൽ ഇന്നലെ രാവിലെ 10.30ഓടെയായിരുന്നു അപകടം. ദേശം പുറയാർ ഗാന്ധിപുരം മഠത്തിപ്പറമ്പിൽ ഹരിപ്രസാദിന്റെ മകൾ 23കാരിയായ നന്ദനയാണ് മരിച്ചത്.

അത്താണി സ്വദേശിയായ 22കാരൻ അശ്വിൻ ആന്റണി ഓടിച്ചിരുന്ന ബൈക്കിലാണ് നന്ദന യാത്ര ചെയ്തിരുന്നത്. ഈ സമയത്ത് നിർത്തിയിരുന്ന ലോറി അശ്രദ്ധയായി വലത്തോട്ടെടുത്തപ്പോൾ പിന്നിൽ വന്ന ബൈക്കിൽ ഇടിച്ചു. നിയന്ത്രണം വിട്ട ബൈക്ക് പിന്നാലെ വന്ന കാർ ഇടിച്ച് മറിഞ്ഞു. റോഡിൽ തലയടിച്ചു വീണതാണ് നന്ദനയുടെ മരണത്തിനിടയാക്കിയത്.

ഗുരുതരമായി പരിക്കേറ്റ അശ്വിൻ ആന്റണിയെ ഇടപ്പള്ളിയിലെ അമൃത ആശുപത്രിയിൽ പ്രവേശിപ്പിച്ചു.

നീരജ എയർലൈൻസ് ഇൻസ്റ്റിറ്റ്യൂട്ടിൽ ജീവനക്കാരിയായിരുന്ന നന്ദന, സെൻട്രൽ ജിഎസ്ടി ഓഫിസ് ജീവനക്കാരൻ ഹരിപ്രസാദിന്റെയും ശ്രീമൂലനഗരം പിഎച്ച്സിയിലെ നഴ്സ് സാന്റിയുടെയും മകളാണ്. സഹോദരി: നിവേദ്യ.

English Summary

A 23-year-old woman died in a tragic road accident near Aluva after a parked gas cylinder lorry suddenly moved and hit a bike. The victim, who had taken a lift on the bike, fell and sustained fatal head injuries after the bike lost control and was hit by a car. The rider is undergoing treatment in hospital.