പറന്നുയർന്നതിന് പിന്നാലെ എയർ ഇന്ത്യ വിമാനത്തിന് എൻജിൻ തകരാർ; അടിയന്തരമായി തിരിച്ചിറക്കി

പറന്നുയർന്നതിന് പിന്നാലെ എയർ ഇന്ത്യ വിമാനത്തിന് എൻജിൻ തകരാർ; അടിയന്തരമായി തിരിച്ചിറക്കി

മുംബൈ: മുംബൈയിൽ നിന്ന് ബെംഗളൂരുവിലേക്ക് പുറപ്പെട്ട എയർ ഇന്ത്യ വിമാനത്തിൽ ആകാശത്ത് വെച്ച് എൻജിൻ തകരാർ സംഭവിച്ചതിനെ തുടർന്ന് അടിയന്തരമായി തിരിച്ചിറക്കി. വ്യാഴാഴ്ച പുലർച്ചെ AI 2812 വിമാനത്തിലാണ് സംഭവം.

എയർബസ് A320 നിയോ വിഭാഗത്തിൽപ്പെട്ട വിമാനം രാവിലെ 2.05-ന് പുറപ്പെടേണ്ടിയിരുന്നുവെങ്കിലും ചെറിയ വൈകല്യത്തോടെ പറന്നു. പറന്നുയർന്നതിന് പിന്നാലെ എൻജിൻ തകരാറ് ശ്രദ്ധയിൽപ്പെട്ടതോടെ പൈലറ്റുമാർ ജാഗ്രതാ സന്ദേശം നൽകി ഉടൻ മുംബൈ വിമാനത്താവളത്തിലേക്ക് മടങ്ങി. 2.35 ഓടെയാണ് വിമാനം സുരക്ഷിതമായി ലാൻഡ് ചെയ്തത്.

വിമാനത്തിൽ 47 യാത്രക്കാരുണ്ടായിരുന്നു. എല്ലാവരും സുരക്ഷിതരാണെന്ന് അധികൃതർ അറിയിച്ചു.

പറന്നുയരുമ്പോൾ വലിയ ശബ്ദവും തീപ്പൊരിയും കണ്ടതായി ചില യാത്രക്കാർ പറഞ്ഞു. തുടർന്ന് നടത്തിയ പരിശോധനയിലാണ് രണ്ടാമത്തെ എൻജിൻ പ്രവർത്തനരഹിതമായതായി കണ്ടെത്തിയത്.

സാങ്കേതിക തകരാറിനെ തുടർന്ന് വിമാനം തിരിച്ചുവിട്ടതായും യാത്രക്കാർക്ക് ബദൽ സംവിധാനം ഒരുക്കിയതായും എയർ ഇന്ത്യ അറിയിച്ചു. യാത്രക്കാർക്കുണ്ടായ അസൗകര്യത്തിൽ ഖേദവും രേഖപ്പെടുത്തി.

മണിക്കൂറുകൾക്ക് ശേഷം പുലർച്ചെ 4.45-ഓടെ ബദൽ വിമാനം ബെംഗളൂരുവിലേക്ക് പുറപ്പെട്ടു.

English Summary

An Air India flight (AI 2812) from Mumbai to Bengaluru made an emergency return after one of its engines failed mid-air.

The aircraft landed safely with 47 passengers onboard. Air India arranged an alternative flight and confirmed that all passengers were safe.