ആരാധകരുടെ തിക്കിലും തിരക്കിലും നിലത്ത് വീണ് നടൻ വിജയ്
ചെന്നൈ: ആരാധകരുടെ തിക്കിലും തിരക്കിലും നിലത്ത് വീണ് നടനും തമിഴക വെട്രി കഴകം (ടിവികെ) പാർട്ടി അധ്യക്ഷനുമായ വിജയ്. ചെന്നൈ അന്താരാഷ്ട്ര വിമാനത്താവളത്തിലായിരുന്നു സംഭവം.
വിമാനത്താവളത്തിൽ തടിച്ചുകൂടിയ ആരാധകരെ നിയന്ത്രിക്കാൻ സുരക്ഷാ സേനയ്ക്ക് കഴിയാതിരുന്നതാണ് അപകടത്തിലേക്ക് നയിച്ചത്.
മലേഷ്യയിൽ നടന്ന തന്റെ പുതിയ ചിത്രം ‘ജനനായകൻ’ എന്ന ചിത്രത്തിന്റെ ഓഡിയോ ലോഞ്ചിൽ പങ്കെടുത്ത ശേഷം ചെന്നൈയിലേക്ക് മടങ്ങിയെത്തിയതായിരുന്നു വിജയ്.
ആരാധകരുടെ തിക്കിലും തിരക്കിലും നിലത്ത് വീണ് നടൻ വിജയ്
അദ്ദേഹം എത്തുന്ന വിവരം അറിഞ്ഞതോടെ വലിയ തോതിൽ ആരാധകർ വിമാനത്താവളത്തിൽ എത്തിച്ചേർന്നു. സുരക്ഷാ സേന ഒരുക്കിയ എല്ലാ സുരക്ഷാ വലയങ്ങളും മറികടന്ന് ആരാധകർ വിജയ്ക്ക് സമീപത്തേക്ക് ഓടിക്കൂടുകയായിരുന്നു.
വിമാനത്താവളത്തിൽ നിന്ന് പുറത്തിറങ്ങി വാഹനത്തിലേക്ക് കയറാൻ ശ്രമിക്കുന്നതിനിടെയാണ് സംഭവം. ആരാധകരും പാപ്പരാസികളും വിജയ് ചുറ്റും തടിച്ചുകൂടി.
ക്യാമറകളുമായി സെൽഫി എടുക്കാനും നടനെ തൊടാനും പലരും ശ്രമിച്ചു. ഈ തിക്കിലും തിരക്കിനിടെയാണ് കാറിലേക്ക് കയറുന്നതിനിടെ വിജയ് നിലത്ത് വീണത്.
വീണുപോയ വിജയിനെ ഉടൻ തന്നെ കൂടെയുണ്ടായിരുന്ന സുരക്ഷാ ഉദ്യോഗസ്ഥരും സഹപ്രവർത്തകരും ചേർന്ന് പിടിച്ച് എഴുന്നേൽപ്പിച്ചു. പിന്നീട് അദ്ദേഹത്തെ സുരക്ഷിതമായി കാറിനകത്തേക്ക് കയറ്റി.
വലിയ അപകടം ഒഴിവായതോടെ വിജയ് ഉടൻ തന്നെ വാഹനത്തിൽ നിന്ന് യാത്ര തിരിച്ചു. സംഭവത്തിൽ വിജയിക്ക് പരിക്കുകളില്ലെന്നാണ് ലഭിക്കുന്ന വിവരം.
വിജയിയുടെ പിന്നാലെ വിമാനത്താവളത്തിലെത്തിയ നടി മമിത ബൈജുവിനും ആരാധകരുടെയും പാപ്പരാസികളുടെയും തിരക്ക് നേരിടേണ്ടിവന്നു.
എന്നാൽ സ്ഥിതി നിയന്ത്രണം വിട്ടതായി കണ്ടതോടെ മമിത പിന്മാറുകയും മറ്റൊരു വഴിയിലൂടെയാണ് വിമാനത്താവളം വിട്ടുപോയതെന്നും റിപ്പോർട്ടുകളുണ്ട്.
വിമാനത്താവളത്തിൽ ഉണ്ടായ സംഭവത്തിന്റെ ദൃശ്യങ്ങൾ സാമൂഹ്യമാധ്യമങ്ങളിൽ വ്യാപകമായി പ്രചരിക്കുന്നുണ്ട്. ആരാധകരുടെ അമിത ആവേശവും സുരക്ഷാ ക്രമീകരണങ്ങളിലെ പോരായ്മകളും വീണ്ടും ചർച്ചയാവുകയാണ്.
പൊതുസ്ഥലങ്ങളിൽ താരങ്ങൾ എത്തുമ്പോൾ ആരാധകർ നിയന്ത്രണം പാലിക്കേണ്ടതിന്റെ ആവശ്യകതയാണ് ഈ സംഭവം വീണ്ടും ഓർമിപ്പിക്കുന്നതെന്ന് നിരീക്ഷകർ പറയുന്നു.
അതേസമയം, വിജയിയുടെ പുതിയ ചിത്രം ‘ജനനായകൻ’ പൊങ്കൽ റിലീസായി തിയറ്ററുകളിൽ എത്താനിരിക്കുകയാണ്.
സിനിമയ്ക്കും രാഷ്ട്രീയ പ്രവർത്തനങ്ങൾക്കും ഒരുപോലെ വലിയ ജനപിന്തുണ ലഭിക്കുന്ന സാഹചര്യത്തിൽ, വിജയിയുടെ സുരക്ഷ ഉറപ്പാക്കാൻ കൂടുതൽ ശക്തമായ ക്രമീകരണങ്ങൾ ആവശ്യമാണെന്ന ആവശ്യവും ഉയർന്നിട്ടുണ്ട്.
സംഭവത്തിൽ അന്വേഷണം നടത്തുമെന്നും, ഭാവിയിൽ ഇത്തരം സാഹചര്യങ്ങൾ ആവർത്തിക്കാതിരിക്കാൻ സുരക്ഷാ നടപടികൾ ശക്തമാക്കുമെന്നും ബന്ധപ്പെട്ട അധികൃതർ അറിയിച്ചു.
