അശ്ലീലം അടങ്ങിയ പ്രാങ്ക് വീഡിയോ യൂട്യൂബിൽ അപ്ലോഡ് ചെയ്തതിനെ തുടർന്ന് അപമാന ഭാരത്താൽ മെഡിക്കൽ വിദ്യാർഥിയായ യുവതി ആത്മഹത്യയ്ക്ക് ശ്രമിച്ചു. പരാതിയെ തുടർന്ന് യൂട്യൂബ് ചാനൽ ഉടമ, ക്യാമറാമാൻ, വീഡിയോ ജോക്കിയായ യുവതി എന്നിവരെ പോലീസ് അറസ്റ്റ് ചെയ്തു.
കഴിഞ്ഞദിവസം ചെന്നൈയിലാണ് സംഭവം. ചാനലിനു വേണ്ടി വീഡിയോ ചെയ്യാൻ എത്തിയ ഇവർ യുവതിയോട് ദ്വയാർഥം കലർന്ന ചോദ്യങ്ങൾ ചോദിക്കുകയായിരുന്നു. ഇതിനു യുവതി മറുപടി പറയാൻ വിസമ്മതിച്ചപ്പോൾ ഇതൊരു പ്രാങ്ക് വീഡിയോ ആണെന്നും തങ്ങൾ ഇത് യൂട്യൂബിൽ അപ്ലോഡ് ചെയ്യുകയില്ല എന്നും യുവതിയെ ഇവർ പറഞ്ഞു വിശ്വസിപ്പിച്ചു. ഇതേ തുടർന്ന് ഇവർ ചോദിച്ച ചോദ്യങ്ങൾക്ക് യുവതി ഉത്തരം നൽകി. എന്നാൽ പിന്നീട് ഇവർ യുവതിയുടെ സമ്മതമില്ലാതെ ഈ വീഡിയോ യൂട്യൂബിൽ അപ്ലോഡ് ചെയ്യുകയായിരുന്നു.
വീഡിയോ പുറത്തായതോടെ നിരവധി ആളുകളാണ് ഇതിനു താഴെ അശ്ലീല കമന്റുകളുമായി രംഗത്തെത്തിയത്. ഇതിനുപുറമേ ഇവർ ഈ വീഡിയോ ഇൻസ്റ്റാഗ്രാമിലും അപ്ലോഡ് ചെയ്തതോടെ അവിടെയും അശ്ലീല കമന്റുകൾ നിറഞ്ഞു. ഇതോടെ അപമാനത്താൽ മനോവിഷമത്തിലായ യുവതി എലിവിഷം കഴിച്ച് ആത്മഹത്യയ്ക്ക് ശ്രമിക്കുകയായിരുന്നു. സംഭവത്തിൽ ‘വീര ടോക്സ് ഡബിൾ എക്സ്’ എന്ന പേരിലുള്ള യൂട്യൂബ് ചാനൽ ഉടമ എസ് യോഗരാജ്, എസ് റാം, ചാനലിൽ പ്രവർത്തിക്കുന്ന ആർ ശ്വേത എന്നിവരെയാണ് ചെന്നൈ സിറ്റി പോലീസ് അറസ്റ്റ് ചെയ്തത്.
