കോട്ടയം: കോട്ടയം കുറവിലങ്ങാട് ലഹരിക്കടിമയായ യുവാവ് മറ്റൊരു യുവാവിനെ കിണറ്റിൽ തള്ളിയിട്ടു. നിരവധി ലഹരി കേസുകളിൽ പ്രതിയായ ജിതിനാണ് ഇത്തരത്തിലൊരു ആക്രമണം നടത്തിയത്. കുറവിലങ്ങാട് സ്വദേശി ജോൺസനാണ് യുവാവിന്റെ ആക്രമണത്തിൽ കിണറ്റിൽ വീണത്.
കഴിഞ്ഞ ദിവസം രാത്രിയിലായിരുന്നു സംഭവം. ഉടൻ തന്നെ ഫയർ ഫോഴ്സ് സംഘം എത്തിയാണ് ജോൺസനെ കരയ്ക്കെത്തിച്ചത്. പ്രതിക്കായി പൊലീസ് വ്യാപക അന്വേഷണം നടത്തിവരികയാണ്.
അതേസമയം ലഹരി കേസുകളുമായി ബന്ധപ്പെട്ട് ടാൻസാനിയൻ സ്വദേശി പ്രിൻസ് സാംസൺ ആണ് കേരള പൊലീസിന്റെ പിടിയിലായത്. ബാംഗ്ലൂരിൽ നിന്നാണ് ഇയാളെ പൊലീസ് സംഘം പിടികൂടിയത്. മാരക ലഹരിയായ എംഡിഎംഎ കേരളത്തിലേക്ക് വൻ തോതിൽ കടത്തുന്ന സംഘത്തിലെ പ്രധാന കണ്ണിയാണ് പിടിയിലായ പ്രിൻസ് സാംസൺ.
കഴിഞ്ഞ 24 ന് മുത്തങ്ങയിൽ 94 ഗ്രാം എംഡിഎംഎ പിടിച്ച കേസിൽ നടത്തിയ അന്വേഷണമാണ് ഇയാളിലേക്ക് കൊണ്ടെത്തിച്ചത്. ബാംഗ്ലൂരിൽ ബിസിഎ വിദ്യാർത്ഥിയാണ് പിടിയിലായ പ്രിൻസ് സാംസൺ.
