അസുഖം മാറാനായി ഒരു മാസം മാത്രം പ്രായമുള്ള പിഞ്ചുകുഞ്ഞിനെ ഇരുമ്പുദണ്ഡ് പഴുപ്പിച്ച് പൊള്ളിച്ചത് 40 തവണ. കുഞ്ഞിന്റെ വയറിലും തലയിലുമായി 30 മുതല് 40 തവണ പൊള്ളിച്ചിട്ടുണ്ട്. ഒഡിഷയിലെ നബറങ്പുരിലാണ് സംഭവം.
ഗുരുതരാവസ്ഥയിലായ കുഞ്ഞ് നിലവില് ആശുപത്രിയില് ചികിത്സയിലാണ്. ഉമക്കോട്ടൈ സബ് ഡിവിഷണല് സര്ക്കാര് ആശുപത്രിയിലാണ് കുഞ്ഞ് ഇപ്പോൾ.
ഇരുമ്പുദണ്ഡ് പഴുപ്പിച്ച് പൊള്ളിച്ചാല് കുഞ്ഞിന്റെ അസുഖം മാറുമെന്ന മാതാപിതാക്കളുടെ അന്ധവിശ്വാസമാണ് എല്ലാത്തിനും കാരണം. കുഞ്ഞ് അപകടനില തരണം ചെയ്തുവെന്ന് നബറങ്പുര് ചീഫ് ജില്ലാ മെഡിക്കല് ഓഫീസര് വ്യക്തമാക്കി.
പത്തു ദിവസങ്ങളോളമായി കുഞ്ഞിന് കടുത്ത പനിയുണ്ട്. കുഞ്ഞ് നിര്ത്താതെ കരയുന്നുമുണ്ടായിരുന്നു. ദുഷ്ടശക്തികള് കുഞ്ഞിനെ ശല്യപ്പെടുത്തുന്നത് കാരണമാണ് കുഞ്ഞ് കരയുന്നത് എന്ന് വീട്ടുകാര് കരുതി.
ദുഷ്ടശക്തികളെ തുരത്താനാണ് കുഞ്ഞിന്റെ ശരീരത്തില് ഇരുമ്പുവടി പഴുപ്പിച്ച് വച്ചത്. പനിയുള്ള കുഞ്ഞിനെ എത്രയും പെട്ടെന്ന് ആശുപത്രിയില് എത്തിക്കേണ്ടതിനു പകരം കുഞ്ഞിനോട് ചെയ്തത് ക്രൂരതയാണെന്ന് മെഡിക്കല് ഓഫീസര് പ്രതികരിച്ചു.
