തിതിലഗഡ്: ഒഡീഷയിൽ ഗുഡ്സ് ട്രെയിൻ പാളം തെറ്റി അപകടം. വെള്ളിയാഴ്ച രാത്രി 8:30 ഓടെയാണ് അപകടമുണ്ടായത്. റെയിൽവേ സ്റ്റേഷന് സമീപമുള്ള തിതിലഗഡ് യാർഡിലായിരുന്നു സംഭവം.
ഗുഡ്സ് ട്രെയിനിന്റെ മൂന്ന് ബോഗികളാണ് പാളം തെറ്റിയത്. സംഭവത്തിൽ ആളപായമൊന്നും റിപ്പോർട്ട് ചെയ്തിട്ടില്ല. അപകടത്തെ തുടർന്ന് റെയിൽവേയിലെ ഉദ്യോഗസ്ഥരും സാംബൽപൂരിലെ ഡിവിഷണൽ റെയിൽവേ മാനേജരും സ്ഥലത്തെത്തി പരിശോധന നടത്തി. സിമന്റ് പ്ലാന്റിലേക്ക് കൊണ്ടുപോകുന്നതിനായി ചുവന്ന ചെളിയുമായി ലൈൻ 8 ൽ നിന്ന് പുറപ്പെട്ട ട്രെയിനിന്റെ ബോഗികളാണ് പാളം തെറ്റിയതെന്ന് സാംബൽപൂർ ഡിആർഎം തുഷാർകാന്ത പാണ്ഡെ അറിയിച്ചു.
ഗുഡ്സ് ട്രെയിനിന്റെ മൂന്ന് ബോഗികൾ ഒഴികെ ബാക്കി ഭാഗങ്ങളെല്ലാം ട്രാക്കിൽ നിന്ന് നീക്കം ചെയ്തതായും അദ്ദേഹം അറിയിച്ചു. റെയിൽ ട്രാക്കുകൾ വൃത്തിയാക്കുന്നതിനുള്ള പ്രവർത്തനങ്ങൾ ആക്‌സിഡന്റ് റിലീഫ് ട്രെയിനിലെ ജീവനക്കാരും ഉദ്യോഗസ്ഥരും ആരംഭിച്ചു.
